ເຂື່ອນໄຟຟ້າຫີນບູນຕອນລຸ່ມ ປະກອບສ່ວນພັດທະນາພື້ນຖານໂຄງລ່າງຂອງແຂວງ

ທ່ານ ປະກາຍສິດ ບຸນໄຕ ຫົວໜ້າພາກສະໜາມ ເຂື່ອນໄຟຟ້ານໍ້າຫີນບູນຕອນລຸ່ມຂອງບໍລິສັດ ຣາຊີຕ້າ ຈໍາກັດ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 19 ມິຖຸນາ ຜ່ານມາ ກ່ຽວກັບຜົນສໍາເລັດ ຂອງໂຄງການກໍ່ສ້າງເຂື່ອນໄຟຟ້ານໍ້າຫີນບູນ ຕອນລຸ່ມວ່າ: ໂຄງການດັ່ງກ່າວ ໄດ້ດໍາເນີນການກໍ່ສ້າງໃນປີ 2016 ຈົນຮອດຕົ້ນປີ 2020 ຈິ່ງສໍາເລັດ 100%, ມີກໍາລັງການຜະລິດ 15 ເມກາວັດ ມູນຄ່າການກໍ່ສ້າງ 40 ລ້ານໂດລາສະຫະລັດ ແລະ ໄດ້ຜະລິດກະແສໄຟຟ້າອອກຈໍາໜ່າຍໃຫ້ແກ່ລັດວິສາຫະກິດໄຟຟ້າລາວ ນັບຕັ້ງແຕ່ປີ 2021 ເປັນຕົ້ນມາ,ເຊິ່ງປະຕິບັດໄດ້ 63 ລ້ານກິໂລວັດໂມງ, ປີ 2022 ປະຕິບັດໄດ້ 58 ລ້ານກິໂລວັດໂມງ, ເຊິ່ງຫລຸດແຜນທີ່ຕັ້ງໄວ້ (ແຜນ 79 ລ້ານກິໂລວັດໂມງ ຕໍ່ປີ).

ທ່ານ ປະກາຍສິດ ບຸນໄຕ ຍັງໄດ້ຍົກໃຫ້ເຫັນເຖິງການປະກອບສ່ວນດ້ານສາທາລະນະປະໂຫຍດຊ່ວຍເຫລືອສັງຄົມໃນໄລຍະຜ່ານມາໂດຍສະເພາະແມ່ນການປະກອບສ່ວນຊ່ວຍພັດທະນາພື້ນຖານໂຄງລ່າງໃຫ້ແກ່ບັນດາບ້ານອ້ອມຂ້າງຂອງໂຄງການເປັນຕົ້ນນະໂຍບາຍຂອງເຂື່ອນໃນໄລຍະການກໍ່ສ້າງ, ເຊິ່ງທາງໂຄງການໄດ້ມີການຊ່ວຍເຫລືອປະຊາຊົນໃນຫລາຍບ້ານທີ່ຢູ່ໃນຂອບເຂດການກໍ່ສ້າງເຂື່ອນໂດຍຕິດພັນກັບທ້ອງຖິ່ນເຊິ່ງໄດ້ປະກອບສ່ວນຊ່ວຍເຫລືອພັດທະນາໃນຫລາຍດ້ານໂດຍສະເພາະ ດ້ານສິ່ງແວດລ້ອມສ້າງໃຫ້ບ້ານໃກ້ຄຽງມີສະຖານທີ່ເກັບມ້ຽນຂີ້ເຫຍື້ອທີ່ເໝາະສົມບໍ່ໃຫ້ຖິ້ມຊະຊາຍໃຫ້ມີການເຕົ້າໂຮມຢູ່ບ່ອນດຽວເນື່ອງຈາກວ່າຢູ່ເຂດນີ້ມີບ້ານກະແຈກກະຈາຍ, ການປັບປຸງໂຄງລ່າງພື້ນຖານ ເຊັ່ນ: ທາງເຂົ້າຫາບ້ານໃຫ້ມີການທ່ຽວສັນຈອນ ໄປ-ມາ ໄດ້ສະດວກສະບາຍຫລາຍຂຶ້ນ, ມີການດຶງສາຍຕາຂ່າຍສາຍໄຟເຂົ້າຫາບ້ານບ່ອນທີ່ບໍ່ມີໄຟຟ້າໃຫ້ໄດ້ໃຊ້ຢ່າງພຽງພໍ. ນອກຈາກນີ້, ທາງບໍລິສັດ ຣາຊີຕ້າ ຈໍາກັດ ຍັງໄດ້ມອບພັນທະເຂົ້າໃນງົບປະມານຂອງລັດໃນແຕ່ລະປີອີກດ້ວຍ.

ຂ່າວ-ພາບ: ແດງສະຫວັດ ແສນພານິດ

แชร์