6 ເດືອນທ້າຍປີ ເຂື່ອນໄຟຟ້ານໍ້າເທີນ 1 ຈະປະຕິບັດ 4 ໂຄງການ ເພື່ອພັດທະນາຊຸມຊົນ

ໃນວັນທີ 19 ມິຖຸນາຜ່ານມາ , ພະແນກພະລັງງານ ແລະບໍ່ແຮ່ແຂວງບໍລິຄຳໄຊ ສະຫລຸບຕີລາຄາຄືນການຄຸ້ມຄອງ-ນໍາໃຊ້ທຶນພັດທະນາຊຸມຊົນໂຄງການເຂື່ອນໄຟຟ້ານໍ້າເທີນ 1 ປະຈຳ 6 ເດືອນຕົ້ນປີ 2023 ແລະວາງທິດທາງແຜນການ 6 ເດືອນທ້າຍປີ ໂດຍການເປັນປະທານຂອງທ່ານ ບຸນເສັງ ປະທຳມະວົງ ຮອງເຈົ້າແຂວງປະທານຄະນະກຳມະການຄຸ້ມຄອງ-ນໍາໃຊ້ທຶນພັດທະນາຊຸມຊົນໂຄງການເຂື່ອນໄຟຟ້ານໍ້າເທີນ 1 ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຄຳສິງ ສາຍພູວົງ ຮອງຫົວໜ້າພະແນກພະລັງງານ ແລະບໍ່ແຮ່ແຂວງບໍລິຄຳໄຊ ໄດ້ລາຍງານວ່າ: ການຈັດຕັ້ງປະຕິບັດທຶນພັດທະນາຊຸມຊົນໂຄງການເຂື່ອນໄຟຟ້ານໍ້າເທີນ 1 ປີ ໃນໄລຍະຜ່ານມາສາມາດປະຕິບັດ 3 ກິດຈະກໍາຄື: ໂຄງການກໍ່ສ້າງເສັ້ນທາງປູຢາງ 2 ຊັ້ນ ໃນເທສະບານເມືອງປາກຊັນຈຳນວນ 5 ເສັ້ນຄວາມຍາວ 8 ກວ່າກິໂລແມັດ, ໂຄງການປູຢາງ 2 ຊັ້ນ ແຕ່ແຍກທາງ 13 ໃຕ້ບ້ານນາເຄືອໃນຫາບ້ານນາຫີນ ເມືອງປາກກະດິງ ແລະໂຄງການກໍ່ສ້າງລະບົບນໍ້າປະປາ ບ້ານຈອມທອງ ເມືອງວຽງທອງ ລວມມູນຄ່າທັງໝົດ 54,7 ຕື້ກວ່າກີບ,ເຊິ່ງຊໍາລະແລ້ວ 7 ຕື້ກວ່າກີບ ຍັງຄ້າງຊໍາລະ 47,6 ຕື້ກວ່າກີບ. ປະຈຸບັນບໍລິສັດໄຟຟ້ານໍ້າເທີນ 1 ຈໍາກັດ ໄດ້ປະຕິບັດພັນທະຈຳນວນ 500.000 ໂດລາສະຫະລັດ, ສໍາລັບ 6 ເດືອນທ້າຍປີ 2023 ຈະຈັດຕັ້ງປະຕິບັດ 4 ກິດຈະກຳຢູ່ເມືອງປາກກະດິງຄື: ໂຄງການປັບປຸງເສັ້ນທາງປູຢາງເຂົ້າຮ່ອມ ບ້ານໂພນຈະເລີນ, ປັບປຸງລະບົບໄຟຟ້າ ບ້ານປາກປາງ ແລະບ້ານໂພນຈະເລີນ, ໂຄງການກໍ່ສ້າງເສັ້ນທາງປູຢາງບ້ານດອນໄຊ ຫາທ່າບັກໄປປາກປາງ ແລະ ໂຄງການກໍ່ສ້າງທາງດິນອັດແໜ້ນທາງຊອຍ ບ້ານຫາດຊາຍຄຳ. ໃນໂອກາດດຽວກັນ ໂຄງການດັ່ງກ່າວໄດ້ມອບເງິນຈຳນວນ 1 ລ້ານສະຫະລັດ ຕາງໜ້າມອບໂດຍ ອຳນວຍການໃຫຍ່ໂຄງການເຂື່ອນໄຟຟ້ານໍ້າເທີນ 1 ແລະຕາງໜ້າຮັບໂດຍທ່ານ ບຸນເສັງ ປະທຳມະວົງ.

แชร์