ຍົກລະດັບເຕັກນິກການລຽງເຜິ້ງໂກນ ໃຫ້ປະຊາຊົນເມືອງນາແລ

ເມື່ອບໍ່ດົນຜ່ານມານີ້ໂຄງການເຂື່ອນໄຟຟ້ານໍ້າທາ 1 ຈັດຝຶກອົບຮົມ ໃນຫົວຂໍ້ເຕັກນິກການລຽງເຜິ້ງໂກນ ໃຫ້ປະຊາຊົນ 18 ຄອບຄົວ ຢູ່ບ້ານວາດ ເມືອງນາແລ ແຂວງຫລວງນໍ້າທາ ເພື່ອເປັນການສ້າງອາຊີບ ແລະສ້າງລາຍຮັບໂດຍຄູຝຶກຈາກສະມາຄົມລ້ຽງເຜິ້ງແຂວງອຸດົມໄຊ.

ບ້ານວາດແມ່ນບ້ານໜຶ່ງໃນ 12 ບ້ານ ເຂດເມືອງນາແລ ທີ່ໄດ້ຮັບຜົນກະທົບຈາກໂຄງການເຂື່ອນໄຟຟ້ານໍ້າທາ 1, ເຊິ່ງທາງໂຄງການມີແຜນໃຫ້ທຸກຄອບຄົວລ້ຽງເຜິ້ງໂກນແບບທໍາມະຊາດໃຫ້ເປັນຕົວແບບກາຍເປັນຜະລິດຕະພັນຂອງເມືອງນາແລໃນຕໍ່ໜ້າ.

ການຝຶກອົບຮົມຄັ້ງນີ້ໄດ້ດຳເນີນເປັນເວລາ 2 ວັນ ພາຍຫລັງຮຽນທິດສະດີແລ້ວຄູຝຶກກໍໄດ້ນໍາພານັກສໍາມະນາກອນລົງມືປະຕິບັດຕົວຈິງໂດຍເລີ່ມຈາກການສ້າງໂກນເຜິ້ງ ຫລືບ່ອນຢູ່ຂອງເຜິ້ງ, ການເລືອກສະຖານທີ່ໂກນເຜິ້ງ,ວິທີການນໍາເອົາເຜິ້ງເຂົ້າໂກນ,ແນະນໍາອຸປະກອນການລ້ຽງການເກັບກູ້ນໍ້າເຜິ້ງລວມເຖິງວິທີການບົວລະບັດຮັກສາ. ການລ້ຽງເຜິ້ງແມ່ນເປັນວຽກງານໜຶ່ງໄດ້ຄຽງຄູ່ກັບປະຊາຊົນລາວ ແລະໄດ້ສືບທອດຕໍ່ກັນມາແຕ່ປູ່ຢ່າຕາຍາຍໂດຍທຽບໃສ່ກິດຈະກໍາອື່ນໆ ແມ່ນກໍາໄລດີເນື່ອງຈາກລົງທຶນໜ້ອຍ, ເຮັດວຽກເບົາ, ໃຊ້ໂກນອາຍຸຍືນທັງນີ້ການລ້ຽງຍັງເປັນການປະສົມຝຸນລະອອງເກສອນໃຫ້ກັບຕົ້ນໄມ້ພືດພັນ, ຜົນລະປູກ ແລະຕົ້ນໄມ້ທໍາມະຊາດ.

ພ້ອມກັນນີ້, ນໍ້າເຜິ້ງຍັງໃຫ້ຄຸນປະໂຫຍດຕໍ່ການປຸງແຕ່ງຢາພື້ນເມືອງຫລາຍປະເພດທັງເປັນອາຫານເສີມໃນຮ່າງກາຍຂອງຄົນເຮົາ ແລະພາກສ່ວນຂີ້ເຜິ້ງຍັງສາມາດນຳມາປະດິດເປັນທູບທຽນບູຊາ ຫລືຕົບແຕ່ງຜາສາດເຜິ້ງຢູ່ຕາມວັດວາອາລາມນຳອີກ.

ຂ່າວ: ອຸດົມສຸກ ວັນສະໝອນ

แชร์