ໂຄງການ 1 ຄົນລອຍ ຫລາຍຄົນໃຫ້ ມອບອຸປະກອນການແພດໃຫ້ໂຮງໝໍແຂວງຄຳມ່ວນ

ພິທີມອບ-ຮັບ ອຸປະກອນການແພດຈາກໂຄງການ 1 ຄົນລອຍ ຫລາຍຄົນໃຫ້ (One man and the River) ຈັດຂຶ້ນ ໃນວັນທີ 19 ມິຖຸນາ 2023 ທີ່ແຂວງຄໍາມ່ວນໂດຍການເຂົ້າຮ່ວມຂອງ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ ວັນໄຊ ຈັນພອນ ຜູ້ວ່າຣາຊະການຈັງຫວັດ ນະຄອນພະນົມ ຣາຊະອານາຈັກໄທ, ທ່ານ ພາຄີນ ຄໍາວິໄລສັກ ຫລື ໂຕໂນ່ ພ້ອມດ້ວຍທີມງານຈາກໂຄງການດັ່ງກ່າວເຂົ້າຮ່ວມ.

ໂຄງການ 1 ຄົນລອຍ ຫລາຍຄົນໃຫ້ ທີ່ໄດ້ຈັດຕັ້ງປະຕິບັດໃນໄລຍະຜ່ານມາໂດຍ ທ່ານ ພາຄີນ ຄໍາວິໄລສັກ ພ້ອມດ້ວຍທີມງານ ທີ່ສາມາດປະຕິບັດກິດຈະກໍາໄດ້ສໍາເລັດເພື່ອການລະດົມທຶນຈາກສາຍທານນໍ້າໃຈຂອງພໍ່ແມ່ປະຊາຊົນເພື່ອສອງຟາກຝັ່ງ ລາວ-ໄທ ມາຊ່ວຍເຫລືອດ້ານການແພດໃຫ້ແກ່ສອງໂຮງໝໍຄື: ໂຮງໝໍແຂວງຄໍາມ່ວນ ແລະໂຮງໝໍຈັງຫວັດນະຄອນພະນົມ ໂດຍໄດ້ຮັບການຕອບຮັບຈາກພໍ່ແມ່ປະຊາຊົນເຮັດໃຫ້ໂຄງການສາມາດບັນລຸການລະດົມທຶນໄດ້ເກີນເປົ້າໝາຍທີ່ຕັ້ງໄວ້, ເຊິ່ງຍອດລວມການບໍລິຈາກທັງໝົດ 87.704.542 ບາດ ແລະໄດ້ຈັດຊື້ອຸປະກອນການແພດທີ່ທັນສະໄໝໃຫ້ແກ່ສອງໂຮງໝໍດັ່ງກ່າວ.

ສ່ວນໂຮງໝໍແຂວງຄໍາມ່ວນ ໄດ້ຮັບງົບປະມານໃນການຈັດຊື້ອຸປະກອນທີ່ທັນສະໄໝ ປະມານ 17.100.000.000 ກີບ (ປະມານ 29.200.000 ບາດ), ເຊິ່ງການຈັດສົ່ງ ແລະມອບ-ຮັບອຸປະກອນການແພດຊຸດທໍາອິດໃຫ້ແກ່ໂຮງໝໍແຂວງຄໍາມ່ວນ ໃນວັນທີ່ 8 ມີນາ 2023 ລວມມີ 8 ລາຍການ ມູນຄ່າ 2 ຕື້ກວ່າກີບ (4.165.000 ບາດ), ຄັ້ງທີ 2 ໃນວັນທີ່ 30 ພຶດສະພາ 2023 ລວມມີ 11 ລາຍການ ມູນຄ່າ 8,3 ຕື້ກວ່າກີບ (15.830.649 ບາດ). ສ່ວນອຸປະກອນຊຸດກວດຫູ-ດັງ-ຄໍ ແລະ ອຸປະກອນອີກຈໍານວນໜຶ່ງ ເປັນມູນຄ່າ 10 ລ້ານກວ່າບາດ ແມ່ນຈະໄດ້ຮັບໃນໄວໆນີ້. ອຸປະກອນທີ່ໄດ້ຮັບຈາກໂຄງການ ລ້ວນແຕ່ແມ່ນຄວາມຮຽກຮ້ອງຕ້ອງການທີ່ຈໍາເປັນໃຫ້ແກ່ໂຮງໝໍແຂວງຄໍາມ່ວນເພື່ອຍົກລະດັບຄວາມສາມາດຂອງວິຊາການໂຮງໝໍເພື່ອໃຫ້ການບົ່ງມະຕິ ແລະປີ່ນປົວແກ່ພໍ່ແມ່ປະຊາຊົນມີປະສິດທິພາບປະສິດທິຜົນ ແລະມີຄຸນນະພາບສູງຂຶ້ນກວ່າເກົ່າ.

แชร์