ລົງນາມ ຜ່ອນຄຳພໍໃຈ ຜ່ານບໍລິສັດມະຫະທຶນ

ເມື່ອບໍ່ດົນຜ່ານມານີ້ທີ່ແຂວງສະຫວັນນະເຂດ ບໍລິສັດມະຫະທຶນ ເຊົ່າສິນເຊື່ອໄດ້ລົງນາມບົດບັນທຶກຂໍ້ຕົກລົງຮ່ວມມື ກັບຮ້ານຄຳພໍໃຈ ເພື່ອຜ່ອນຄຳພໍໃຈ ຜ່ານບໍລິສັດມະຫະທຶນ.

ທ່ານ ມານົບ ຕຣີລິດວິໄລ ຜູ້ອຳນວຍການບໍລິສັດມະຫະທຶນ ເຊົ່າສິນເຊື່ອມະຫາຊົນ ໄດ້ກ່າວວ່າ: ບໍລິສັດມະຫະທຶນ ເປັນບໍລິສັດທີ່ຢູ່ໃນຕະຫຼາດຫຼັກຊັບລາວ ແລະ ໃຫ້ບໍລິການດ້ານສິນເຊື່ອ ທີ່ມີປະສົບການປະມານ 13 ປີ ໂດຍດຳເນີນກິດຈະການເຊົ່າສິນເຊື່ອລົດຈັກທັງມືໜຶ່ງ ແລະມືສອງກ່ອນຈະຂະຫຍາຍຜະລິດຕະພັນໄປຍັງລົດໃຫຍ່ມື 2 ລວມໄປເຖິງເຄື່ອງຈັກທາງການກະເສດໂດຍປະຈຸບັນຕ້ອງການຂະຫຍາຍໂອກາດເຂົ້າເຖິງການຊື້ຄຳໃຫ້ເປັນເລື່ອງງ່າຍ, ບໍລິສັດມະຫາທຶນຈຶ່ງອອກຜະລິດຕະພັນສິນເຊື່ອຄຳເພື່ອຕອບໂຈດການຊື້ຄຳແບບບໍ່ຕ້ອງໃຊ້ເງິນກ້ອນ, ທັງຍັງສາມາດເປັນທາງເລືອກໃນການລົງທຶນ ແລະເພີ່ມມູນຄ່າໃນອານາຄົດອີກດ້ວຍ.

ທ່ານ ນາງ ພາວະດີ ຫຼ່ຽມສະໄຫວ ຜູ້ອຳນວຍການໃຫຍ່ ຮ້ານຄຳພໍໃຈ ໄດ້ກ່າວວ່າ: ຮ້ານຄຳພໍໃຈໄດ້ສ້າງຕັ້ງມາແຕ່ປີ 2017, ປະຈຸບັນ ມີ 4 ສາຂາ ໂດຍກິດຈະການທາງຮ້ານແມ່ນຢູ່ໃນເຄືອຂ່າຍຮ້ານຄຳພູວົງ ເຊິ່ງດຳເນີນທຸລະກິດມາດ້ວຍຄວາມໂປ່ງໃສ, ມີບໍລິການຄົບວົງຈອນ ບໍ່ວ່າຈະເປັນການຊື້-ຂາຍ, ປ່ຽນຄືນ ໂຮມຄຳ ທັງຮັບຊວດຈໍາຄໍາ ດອກເບ້ຍຕໍ່າ ໂດຍອີງໃສ່ການຊີ້ນຳຂອງພັກລັດ ແລະສອດຄ່ອງກັບລະບຽບກົດໝາຍທີ່ຂັ້ນເທິງວາງອອກ.

ການຮ່ວມມືລະຫວ່າງບໍລິສັດມະຫາທຶນກັບຮ້ານຄຳພໍໃຈ ຈະເປັນການເພີ່ມຄວາມສາມາດໃນການເຂົ້າເຖິງຊັບສິນຄຳທີ່ເປັນທີ່ນິຍົມຂອງປະຊາຊົນໃນການສວມໃສ່ຄຳ ເປັນເຄື່ອງປະດັບ ແລະການສະສົມຄຳເພື່ອຄວາມໝັ້ນຄົງໃນອະນາຄົດ,ໂດຍຈະມີການນຳເອົາລະບົບອອນລາຍທີ່ຊ່ວຍໃຫ້ຂໍ້ມູນການປະເມີນສິນເຊື່ອຂອງລູກຄ້າຖືກຕ້ອງ ແລະ ໄວທີ່ສຸດ, ຊຶ່ງຄາດວ່າຈະໄດ້ຮັບຜົນຕອບຮັບຕາມຄາດໝາຍທີ່ວາງໄວ້ເນື່ອງຈາກຄວາມຕ້ອງການຂອງລູກຄ້າທີ່ມີຕໍ່ຄຳທີ່ມັກໃຊ້ເປັນເຄື່ອງປະດັບ ແລະສະສົມເປັນການລົງທຶນແລ້ວຍັງສາມາດໃຊ້ໃນກໍລະນີສຸກເສີນແທນເງິນສົດໄດ້ບວກກັບການທີ່ບໍລິສັດມະຫະທຶນ ໄດ້ມີຖານລູກຄ້າເກົ່າຢູ່ແລ້ວ ແລະຍັງມີລູກຄ້າກຸ່ມໃຫຍ່ທີ່ມີຄວາມສົນໃຈກັບຜະລິດຕະພັນນີ້ເປັນຈຳນວນຫຼາຍ.
 
 
 
 
 

แชร์