ຈໍາປາສັກ ຫາລືຄຸ້ມຄອງລາຄາສິນຄ້າ ແລະຄ່າບໍລິການ

ແຫ່ງຂ່າວຈາກແຂວງຈໍາປາສັກໃຫ້ຮູ້ວ່າ: ພະແນກ​ອຸດສາຫະກໍາ​ ແລະ​ການຄ້າ​ແຂວງ​ຈໍາປາສັກ​ ໄດ້​ຈັດກອງປະຊຸມປຶກສາຫາລືການຄຸ້ມຄອງລາຄາສິນຄ້າ ແລະຄ່າບໍລິການ​ ຂຶ້ນ​ຢູ່​ພະແນກ​ດັ່ງກ່າວ​ໃນວັນທີ 19 ມິຖຸນາ​ຜ່ານມາໂດຍການ​ເປັນປະທານ​ຂອງ​ທ່ານ​ ຄໍາ​ແດງ​ ພົມມາ​ພັກດີ​ ຮອງຫົວໜ້າ​ພະແນກ​ອຸດສາຫະກໍາ​ ແລະ​ການຄ້າ​ແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ຈຸດປະສົງຂອງກອງປະຊຸມກໍ່ເພື່ອປຶກສາຫາລື,​ ຊອກວິທີແກ້ໄຂວຽກງານການຄຸ້ມຄອງລາຄາສິນຄ້າ ແລະຄ່າບໍລິການພ້ອມທັງຄົ້ນຄວ້າ,​ ຊຸກຍູ້ສົ່ງເສີມການຜະລິດສິນຄ້າ​ ທົດແທນການນໍາເຂົ້າ ແລະເປັນສິນຄ້າສົ່ງອອກເພື່ອສ້າງລາຍຮັບທີ່ເຂັ້ມແຂງ-​ຍືນຍົງ,​ ຫັນປ່ຽນໄປສູ່ສັງຄົມການຜະລິດ​ໃຫ້ມີຜົນສຳເລັດຕາມຄາດໝາຍ ແລະປະສິດທິຜົນສູງ​ເພື່ອເຮັດໃຫ້ວຽກງານຄຸ້ມຄອງລາຄາສິນຄ້າ ແລະຄ່າບໍລິການໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ,​ ມີປະສິດທິຜົນທັງເປັນການປົກປ້ອງສິດ -​ ຜົນປະໂຫຍດອັນຊອບທຳຂອງຜູ້ດຳເນີນທຸລະກິດທີ່ຖືກຕ້ອງ ແລະຫັນທຸລະກິດໃຫ້ເຂົ້າສູ່ລະບຽບກົດໝາຍຢ່າງແທ້ຈິງ.

• 20/06/2023