ລັດຖະບານລາວ ຈັດກອງປະຊຸມເປົ້າໝາຍການພັດທະນາແບບຍືນຍົງ

ກອງປະຊຸມຄະນະຊີ້ນໍາລະດັບຊາດ ເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ປະຈໍາປີ 2023 ຈັດຂຶ້ນໃນວັນທີ 20 ມິຖຸນາ 2023 ຢູ່ນະຄອນຫລວງວຽງຈັນ ໂດຍການເປັນປະທານຂອງ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ໂດຍຮັບການສະໜັບສະໜູນຈາກອົງການ ອຸຍນີເຊບ ປະຈໍາ ສປປ ລາວ.

ກອງປະຊຸມຈັດຂຶ້ນເພື່ອທົບທວນຄືນການຈັດຕັ້ງປະຕິບັດ ປພຍ ຢູ່ ສປປ ລາວ ໄລຍະ 2 ປີຜ່ານມາ ແລະວາງທິດທາງແຜນການໃນຕໍ່ໜ້າ ໃນນັ້ນ ໄດ້ມີການລາຍງານຄວາມຄືບໜ້າ, ອັນພົ້ນເດັ່ນ, ຂໍ້ຄົງຄ້າງ ແລະ ສິ່ງທ້າທາຍຕ່າງໆ ໃນການຈັດຕັ້ງປະຕິບັດ ປພຍ ທີ່ເປັນບູລິມະສິດ ຂອງ ສປປ ລາວ ຕາມທີ່ໄດ້ເຊື່ອມສານເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 9 ກໍຄື ແຜນພັດທະນາຂອງຂະແໜງການ ໂດຍສະເພາະໃນສະພາບການທີ່ຫລາຍປະເທດໃນທົ່ວໂລກກໍາລັງຟື້ນຟູຈາກຜົນກະທົບຂອງການລະບາດຂອງພະຍາດໂຄວິດ-19 ກໍຄືວິກິດການທີ່ເກີດຂຶ້ນຈາກສະພາບການຜັນແປໃນພາກພື້ນ ແລະສາກົນ, ລວມທັງການປ່ຽນແປງດິນຟ້າອາກາດ.

ພ້ອມນີ້, ກອງປະຊຸມຍັງໄດ້ຮັບຟັງການສະເໜີກ່ຽວກັບແຜນການຮ່າງບົດລາຍງານແຫ່ງຊາດແບບສະໝັກໃຈ ສະບັບ 3 ຂອງ ສປປ ລາວ ທີ່ຈະນຳໄປລາຍງານຕໍ່ອົງການສະຫະປະຊາຊາດໃນກາງປີ 2024, ພ້ອມທັງໄດ້ປຶກສາຫາລືກ່ຽວກັບການປັບປຸງກົນໄກ ແລະ ຂອດປະສານງານຂອງຄະນະຊີ້ນຳລະດັບຊາດກໍຄືຄະນະຈຸດປະສານງານ ເພື່ອຈັດຕັ້ງປະຕິບັດ ປພຍ ໃຫ້ມີຄວາມສອດຄ່ອງ ແລະ ມີປະສິດທິພາບຍິ່ງຂຶ້ນ.

แชร์