ລາວ ໄດ້ຮັບສາງເກັບເຄື່ອງ ມູນຄ່າ 8 ລ້ານກວ່າບາດ ຈາກໄທ

ພິທີມອບ-ຮັບສາງເຄື່ອງບັນເທົາທຸກອົງການກາແດງແຫ່ງຊາດລາວໄດ້ຈັດຂຶ້ນໃນວັນທີ 19ມິຖຸນາ 2023ຢູ່ທີ່ຫຼັກ 16 ຖະໜົນ 13ໃຕ້ ເມືອງໄຊທານີ ນະຄອນຫຼວງວຽງຈັນ ໃຫ້ກຽດກ່າວມອບໂດຍທ່ານ ເຕດ ບຸນນາກ ເລຂາທິການໃຫຍ່ສະພາກາຊາດໄທ ແລະກ່າວຮັບໂດຍແມ່ນທ່ານ ສຈ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວມີບັນດາພະນັກງານຈາກກະຊວງບໍລິສັດຮັບເໝົາກໍ່ສ້າງ ແລະພະນັກງານທີ່ກ່ຽວຂ້ອງເຂົ້າຮ່ວມ.

ສາງເກັບມ້ຽນເຄື່ອງດັ່ງກ່າວໄດ້ລົງມືກໍ່ສ້າງແຕ່ວັນທີ 13 ກັນຍາ 2022 ເປັນຕົ້ນ ແລະໄດ້ສຳເລັດໃນເດືອນພຶດສະພາ 2023 ໃຊ້ເວລາກໍ່ສ້າງຈັກ 9 ເດືອນ ໂຄງສ້າງປະກອບມີ ຂະໜາດກວ້າງ 10 ແມັດ ຍາວ 30 ແມັດ ລວງສູງ 5,85 ແມັດ ເປັນໂຄງເຫຼັກ ຝາກໍ່ດ້ວຍດິນຈີ່ ພື້ນເທດ້ວຍເປຕົງເສີມເຫຼັກ ພາຍໃນອາຄານສາງປະກອບມີ ຫ້ອງສາງມ້ຽນເຄື່ອງ ຫ້ອງການບັນຊີ ຫ້ອງນໍ້າ 2 ຫ້ອງ ແລະທາງນອກຍັງປະກອບມີທາງຍ່າງອອ້ມອາຄານຂັ້ນໄດທັງລົດຂຶ້ນ 165 m2 ລວມທັງໝົດ 465 m2 ຮາກຖານ ຄານດິນ ແລະ ພື້ນ ເປັນໂຄງສ້າງເບຕົງເສີມເຫຼັກ ເສົາດ້ວຍເຫຼັກ H-BEAM ແລະ ໂຄງຫຼັງຄາດ້ວຍເຫຼັກກ່ອງ ກໍ່ດ້ວຍດິນຈີ່ທັນສະໄໝ 6 ຮູ ມຸງດ້ວຍແຜ່ນຊິ້ງ VXP ນອກນັ້ນຍັງໄດ້ບຸກເບີກຖົມດິນກໍ່ສ້າງຮົ້ວອ້ອມໂຄງການອາຄານຈອດລົດລວມມູນຄ່າທັງໝົດ 8.346.867 ບາດ ໂດຍການສະໜັບສະໜູນສະພາກາຊາດໄທ.

ສາງດັ່ງກ່າວຈະຊ່ວຍໃຫ້ການເກັບມ້ຽນເຄື່ອງບັນເທົາທຸກອົງການກາແດງລາວມີຄວາມສະດວກສະບາຍຮັບປະກັນການໃນການຮັກສາເຄື່ອງໃຫ້ມີຄຸນນະພາບ ແລະທັງເປັນການກະກຽມເຄື່ອງແຮໄວ້ເພື່ອໃຫ້ການຊ່ວຍເຫຼືອໃນເວລາເກີດໄພພິບັດໃຫ້ທັນກັບຄວາມຕ້ອງການ.

แชร์