ໄຂຫ້ອງໃຫ້ຄໍາປຶກສາແກ່ເດັກພິການແຫ່ງທໍາອິດ ຢູ່ຊຽງຂວາງ

ວັນທີ 19 ມິຖຸນາ 2023 ພະແນກສາທາລະນະສຸກແຂວງຂຽງຂວາງ ຮ່ວມກັບ ກະຊວງແຮງງານ ແລະສະຫວັດດີການສັງຄົມ ແລະການສະໜັບສະໜູນຈາກອົງການຢູນີເຊັບ ໄດ້ຈັດພິທີໄຂຫ້ອງໃຫ້ຄໍາປຶກສາແກ່ເດັກພິການ ແລະຄອບຄົວ ຂອງພວກເຂົາແຫ່ງທໍາອິດຢູ່ແຂວງຊຽງຂວາງ. ຫ້ອງໃຫ້ຄໍາປຶກສາ ແລະເບີໂທ 061 166 ຈະໃຫ້ການບໍລິການແກ່ເດັກພິການ ແລະຄອບຄົວຂອງພວກເຂົາຢູ່ແຂວງຊຽງຂວາງ ແລະບັນດາແຂວງໃກ້ຄຽງເຊັ່ນ: ການໃຫ້ຄໍາປຶກສາ, ຟື້ນຟູສຸຂະພາບ, ການປະກອບອົງຄະທຽມ-ເຄື່ອງຄໍ້າຊູ ແລະການບໍາບັດທາງດ້ານຮ່າງກາຍ ແລະຈິດໃຈ.

ດຣ ເຢ້ ຢ່າງ ຮອງຫົວໜ້າພະແນກສາທາລະນະສຸກແຂວງຊຽງຂວາງກ່າວວ່າ: “ຊຽງຂວາງເປັນແຂວງໜຶ່ງທີ່ໄດ້ຮັບຜົນກະທົບຢ່າງໜັກໜ່ວງໃນປາງສົງຄາມຍັງມີສິ່ງເສດເຫຼືອຂອງລູກລະເບີດບໍ່ທັນແຕກຕົກຄ້າງຢ່າງຫຼວງຫຼາຍ, ສະພາບສິ່ງແວດລ້ອມມີການປ່ຽນແປງ, ການລະບາດຂອງພະຍາດໄດ້ສົ່ງຜົນກະທົບທາງກົງແລະທາງອ້ອມຕໍ່ສຸຂະພາບຂອງຄົນເຮົາລວມທັງເດັກພິການ. ສ່ວນຫຼາຍເຂົາເຈົ້າຍັງບໍ່ສາມາດເຂົ້າເຖິງການບໍລິການທີ່ຈໍາເປັນຍ້ອນມີຂໍ້ຈໍາກັດໃນການເດີນທາງ ແລະອື່ນໆ ໂດຍສະເພາະ ຜູ້ທີ່ຢູ່ເຂດຫ່າງໄກສອກຫຼີກ.” ຊຶ່ງການໃຫ້ຄໍາປຶກສາແກ່ເດັກພິການໂດຍບໍ່ເສຍຄ່າຈະເປັນການປະກອບສ່ວນຕໍ່ການຈັດຕັ້ງປະຕິບັດ 4 ສິດທິພື້ນຖານຂອງເດັກ. ດຣ ທອງເພັດ ສິດທິວັນ ຫົວໜ້າສູນການແພດຟື້ນຟູໜ້າທີການກະຊວງສາທາລະນະສຸກກ່າວວ່າ: ການບໍລິການຄົນພິການໃນສາຂາສູນການແພດຟື້ນຟູໜ້າທີ່ການແຂວງຊຽງຂວາງແມ່ນບາດກ້າວອັນໃໝ່ໃນການປະຕິບັດພັນທະຂອງພວກເຮົາຕໍ່ຄົນທີ່ມີຄວາມພິການ. ນີ້ແມ່ນສ່ວນໜຶ່ງທີ່ສຳຄັນຂອງການລິເລີ່ມການພັດທະນາໂຍບາຍ ແລະຄຸນນະພາບການບໍລິການສຸຂະພາບໂດຍອີງຕາມຫລັກການ "5 ດີ" (ການຮັບຕ້ອນ, ຄວາມສະອາດ, ຄວາມສະດວກ, ການບົ່ງມະຕິພະຍາດ ແລະການປິ່ນປົວທີ່ດີ) ຫລັກການ "1 ພໍໃຈ" ມາຈັດຕັ້ງປະຕິບັດຕົວຈິ່ງຢູ່ໃນສາຂາສູນຂອງແຂວງ.

• 20/06/2023