ສະຖານທູດຈີນ ປະຈຳ ສປປ ລາວ ຍິນດີສືບຕໍ່ເສີມຂະຫຍາຍບົດບາດອັນດີງາມ ທີ່ເປັນຂົວເຊື່ອມຕໍ່ຊຸກຍູ້ການຮ່ວມມືໃນດ້ານຕ່າງໆລະຫວ່າງ ສປ ຈີນ ກັບ ສປປ ລາວ, ໂດຍສະເພາະແມ່ນການປັບປຸງ ແລະຍົກລະດັບການຮ່ວມມືດ້ານສື່ມວນຊົນລະຫວ່າງສອງປະເທດຢ່າງບໍ່ຢຸດຢັ້ງ ແລະປະກອບສ່ວນໃໝ່ເຂົ້າໃນຄູ່ຮ່ວມຊາຕາກຳລາວ-ຈີນ.
ທ່ານ ເຫີວຍ ຢານ ຊຽງ ເລຂາເອກສະຖານທູດຈີນປະຈໍາ ສປປ ລາວ ໄດ້ກ່າວວ່າ: ນັບແຕ່ປີ 2013 ເປັນຕົ້ນມາ, ທ່ານ ສີຈິ້ນຜິງ ປະທານປະເທດຈີນໄດ້ເອົາໃຈໃສ່ເຖິງອະນາຄົດ, ຈຸດໝາຍປາຍທາງຂອງມວນມະນຸດ ແລະທ່າອ່ຽງການພັດທະນາຂອງປະເທດຈີນ, ຂອງໂລກ ແລະ ໄດ້ສະ ເໜີຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ" ຊຶ່ງ ສປປ ລາວ ກໍໄດ້ໃຫ້ການຕອບຮັບຢ່າງຕັ້ງໜ້າຕໍ່ແນວຄິດນີ້, ທ່ານ ສີຈິ້ນຜິງ ເປັນຜູ້ບຸກເບີກຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ" ແລະ ແນວຄິດຄູ່ຮ່ວມຊາຕາກຳຂອງມວນມະນຸດ, ໄດ້ປະກອບສ່ວນອັນພົ້ນເດັ່ນໃຫ້ແກ່ປະຊາຄົມໂລກ ແລະ ສປປ ລາວ ຍັງໄດ້ຮັບຜົນປະໂຫຍດຢ່າງຫຼວງຫຼາຍ. ຜູ້ນຳສູງສຸດຂອງສອງລັດຖະບານຈີນ ແລະ ລາວ ໄດ້ຮ່ວມກັນລົງນາມ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ ໂດຍຄວາມມຸ່ງໝັ້ນຈະຄົ້ນຄວ້າ ແລະ ກໍ່ສ້າງສາຍພົວພັນສັງຄົມນິຍົມແບບໃໝ່ລະຫວ່າງບັນດາປະເທດບົນພື້ນຖານການພົວພັນສາກົນແບບ ໃໝ່ ຊຶ່ງເປັນວຽກງານບຸກເບີກທີ່ສຳຄັນໃນປະຫວັດສາດການທູດຂອງ 2 ປະເທດຈີນ ແລະ ລາວ ໄດ້ຈັບມືກັນຮ່ວມສ້າງ ໜຶ່ງແລວ ໜຶ່ງເສັ້ນທາງ. ໃນວັນທີ 3 ທັນວາ 2021, ລົດໄຟລາວ-ຈີນໄດ້ເປີດໃຫ້ນຳໃຊ້ຢ່າງເປັນທາງການຊຶ່ງໄດ້ຫັນປະເທດລາວຈາກ "ປະເທດທີ່ບໍ່ມີຊາຍແດນຕິດກັບທະເລເປັນປະເທດເຊື່ອມຕໍ່" ແລະກາຍເປັນເສັ້ນທາງຄຳທີ່ເຊື່ອມຕໍ່ການພັດທະນາຂອງສອງປະເທດ. ເສັ້ນທາງຄຳນີ້, ຈະເຮັດໃຫ້ຂະແໜງອຸດສາຫະກຳ, ກະສິກຳ ແລະການທ່ອງທ່ຽວຂອງລາວກ້າວເຂົ້າສູ່ລະດູໃບໄມ້ປົ່ງ ຊຶ່ງເປັນຄວາມຫວັງໃໝ່ໃຫ້ແກ່ການຫຼຸດຜ່ອນຄວາມທຸກຍາກ ແລະ ການເຕີບໂຕທາງດ້ານເສດຖະກິດຂອງລາວ, ນອກຈາກທາງລົດໄຟແລ້ວ, ຍັງມີການຮ່ວມມືໃນດ້ານນໍ້າມັນເຊື້ອໄຟ, ໄຟຟ້າ, ກະສິກຳ - ປ່າໄມ້ ແລະເຂດເສດຖະກິດພິເສດ.
ທ່ານ ເຫີວຍ ຢານ ຊຽງ ກ່າວຕື່ມວ່າ: ນໍ້າມັນເຊື້ອໄຟແມ່ນເລືອດຂອງຂະແໜງການອຸດສາຫະກໍາຊຶ່ງມີຄວາມສຳຄັນໃນໄລຍະຂອງການຫັນເປັນອຸດສາຫະກໍາຂອງລາວ, ສອງຝ່າຍໄດ້ຮ່ວມມືກັນກໍ່ສ້າງໂຮງກັ່ນນ້ໍາມັນທີ່ທັນສະໄໝແຫ່ງທໍາອິດຂອງລາວເພື່ອຂຽນຄືນປະຫວັດສາດຂອງປະເທດລາວ ໃນການອາໄສການນຳເຂົ້າຜະລິດຕະພັນນໍ້າມັນ. ປະເທດລາວເປັນໝໍ້ໄຟແຫ່ງອາຊຽນແຕ່ການກໍ່ສ້າງຕາຂ່າຍໄຟຟ້າຍັງຂາດແຄນ ແລະ ບໍ່ທັນທົ່ວເຖິງ, ປັດຈຸບັນສອງຝ່າຍໄດ້ປຶກສາຫາລື ແລະຮ່ວມມືກັນຢ່າງຕັ້ງໜ້າເພື່ອກໍ່ສ້າງຕາຂ່າຍໄຟຟ້າທີ່ສຳຄັນເພື່ອຫັນໝໍ້ໄຟໃຫ້ເປັນໝໍ້ສົມບັດອັນລໍ້າຄ່າ. ຊັບພະຍາກອນດ້ານກະສິກຳຂອງລາວຍັງບໍ່ທັນໄດ້ພັດທະນາຢ່າງມີປະສິດທິພາບ ແລະປອດໄພ, ປັດຈຸບັນສອງຝ່າຍໄດ້ຊຸກຍູ້ການຮ່ວມມືດ້ານການສົ່ງອອກຊີ້ນງົວໄປຈີນເພື່ອຫັນຄວາມໄດ້ປຽບຂອງຊັບພະຍາກອນທຳມະຊາດຂອງລາວ ໄປສູ່ຄວາມໄດ້ປຽບຂອງການພັດທະນາ ແລະຄວາມຈະເລີນຮຸ່ງເຮືອງ. ການຮ່ວມມືດັ່ງກ່າວບໍ່ພຽງແຕ່ສອດຄ່ອງກັບກົນໄກການຕະຫຼາດເທົ່ານັ້ນຍັງສະແດງໃຫ້ເຫັນເຖິງສາຍພົວພັນມິດຕະພາບທີ່ເປັນມູນເຊື້ອລະຫວ່າງຈີນ - ລາວເປັນຢ່າງດີ, ໂດຍສະເພາະແມ່ນມີຜົນດີຕໍ່ການຍົກລະດັບຄວາມສາມາດໃນການພັດທະນາທີ່ເປັນເອກະລາດຂອງຝ່າຍລາວຊຶ່ງໄດ້ປະກອບສ່ວນຢ່າງເຕັມສ່ວນໃນຄູ່ຮ່ວມຊາຕາກຳ.
ໂດຍ: ບຸນຕອມ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |