ໂຄງການກໍ່ສ້າງປ້ອງກັນຕາຝັ່ງ ແລະພັດທະນາແຄມຂອງໄລຍະທີ II ຈະໃຫ້ສຳເລັດປີ 2025

ການຈັດຕັ້ງປະຕິບັດໂຄງການປ້ອງກັນຕາຝັ່ງ ແລະພັດທະນາແຄມຂອງ ໄລຍະທີ II ຢູ່ ນະຄອນຫຼວງວຽງຈັນ (ນວ) ເຖິງແມ່ນວ່າໂດຍລວມມີຄວາມຄືບໜ້າໃນການກໍ່ສ້າງບາງຈຸດ, ແຕ່ກໍຍັງປະສົບກັບຫຼາຍສິ່ງທ້າທາຍ. ຂະນະ, ທີ່ວາງຄາດໝາຍຈະໃຫ້ສໍາເລັດພາຍໃນເດືອນພະຈິກ ປີ 2025.

ໂຄງການປ້ອງກັນຕາຝັ່ງ ແລະພັດທະນາແຄມຂອງໄລຍະທີ II ປະກອບມີ 3 ຈຸດ ຄື: 1). ການກໍ່ສ້າງເສັ້ນທາງເບຕົ່ງຢູ່ເຂດເມືອງສີໂຄດຕະບອງ ນັບແຕ່ບ້ານສີບຸນເຮືອງທ່າ ລົງໄປເຊື່ອມໃສ່ທາງເບຕົ່ງເຂດຮ້ານອາຫານມູນເດີໄນ (ເຂດບ້ານອຸມຸງ); 2). ການກໍ່ສ້າງຈຸດເຊື່ອມຕໍ່ລະຫວ່າງໄລຍະທີ I ແລະ ໄລຍະທີ II (ແຕ່ ຫຼັກ 3 ຫາທ່າເຮືອຫຼັກ 4) ເມືອງສີສັດຕະນາກ; 3). ການກໍ່ສ້າງສວນສາທາລະນະຢູ່ເຂດບ້ານແກ້ງຍາງ ເມືອງຫາດຊາຍຟອງ. ລວມມູນຄ່າການກໍ່ສ້າງທັງໝົດ 67 ລ້ານກວ່າໂດລາສະຫະລັດ ໃນນີ້ເປັນເງິນກູ້ຢືມດອກເບ້ຍຕໍ່າຈາກ ສ.ເກົາຫລີ 57 ລ້ານກວ່າໂດລາສະຫະລັດ ແລະທຶນສົມທົບຂອງລັດຖະບານລາວ 9,9 ລ້ານກວ່າໂດລາສະຫະລັດ.

ທ່ານ ພຸດທະເສນ ສິນທະວົງ ຮອງຫົວໜ້າພະແນກໂຍທາທິການ ແລະຂົນສົ່ງ ນວ ໃຫ້ສໍາພາດ ວັນທີ 15 ມິຖຸນາ 2023 ວ່າ: ການກໍ່ສ້າງການໂຄງການກໍ່ສ້າງປ້ອງກັນຕາຝັ່ງ ແລະພັດທະນາແຄມຂອງໄລຍະທີ II ເພື່ອປ້ອງກັນນໍ້າຖ້ວມປ້ອງກັນດິນເຊາະເຈື່ອນພ້ອມທັງເປັນພັດທະນາເຂດແຄມຂອງໃຫ້ກາຍເປັນຈຸດທ່ອງທ່ຽວໃນຍາມແລງໃນນະຄອນຫຼວງວຽງຈັນ ທັງເປັນການປະກອບສ່ວນສ້າງລາຍຮັບໃຫ້ປະຊາຊົນທີ່ຢູ່ໃກ້ຄຽງກໍຄືປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ນວ ໃນຕໍ່ໜ້າ.

ປະຈຸບັນແຕ່ລະຈຸດຂອງໂຄງການໄລຍະທີ II ໂດຍລວມແມ່ນດຳເນີນໄປຢ່າງພົ້ນເດັ່ນແມ່ນ: ຈຸດທີ 1 ການກໍ່ສ້າງເສັ້ນທາງເບຕົ່ງຢູ່ເຂດ ເມືອງສີໂຄດຕະບອງ ນັບແຕ່ບ້ານສີບຸນເຮືອງ ລົງໄປເຊື່ອມໃສ່ທາງເບຕົ່ງເຂດຮ້ານອາຫານມູນເດີໄນມີຄວາມຍາວ 4 ກິໂລແມັດ ປັດຈຸບັນກໍ່ສ້າງສໍາ ເລັດ 85% ໜ້າວຽກທີ່ຍັງເຫຼືອແມ່ນການກໍ່ສ້າງເສົາໄຟ ແລະຮ່ອງລະບາຍນໍ້າ.

ຈຸດທີ 2ແມ່ນການກໍ່ສ້າງຈຸດເຊື່ອມຕໍ່ລະຫວ່າງໄລຍະທີ I ແລະໄລຍະທີ II (ແຕ່ຫລັກ 3 ຫາທ່າເຮືອຫຼັກ 4) ເມືອງສີສັດຕະນາກ ມີຄວາມຍາວເກືອບ 1 ກິໂລແມັດ ກຳລັງເລັ່ງຈັດຕັ້ງປະຕິບັດປັດຈຸບັນສຳເລັດ 30% ຈຸດທີ 3 ແມ່ນ ການກໍ່ສ້າງສວນສາທາລະນະຢູ່ເຂດບ້ານແກ້ງຍາງ ເມືອງຫາດຊາຍຟອງ ໃນເນື້ອທີ່ເກືອບ 6 ເຮັກຕາ ປັດຈຸບັນໄດ້ສຳເລັດການຕິດຕັ້ງປ້າຍ ແລະຮ່ວມກັບອົງການປົກຄອງທ້ອງຖິ່ນໂຄສະນາເຜີຍແຜ່ໃຫ້ປະຊາຊົນຮັບຮູ້ເຂົ້າໃຈກ່ຽວກັບການກໍ່ສ້າງໂຄງການກໍ່ສ້າງດັ່ງກ່າວ.

ທີ່ມາ: ສນພ ວຽງຈັນໃຫມ່

แชร์