ລາວ ເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສດ້ານສາທາລະນະສຸກອາຊຽນ

ກອງປະຊຸມເຈົ້າໜ້າທີ່ອາວຸໂສດ້ານສາທາລະນະສຸກອາຊຽນຄັ້ງທີ 17 ແລະກອງປະຊຸມທີ່ກ່ຽວຂ້ອງ (ASEAN Senior Officials’ Meeting on Health Development (SOMHD) and Related Meetings)ໄຂຂື້ນຢ່າງເປັນທາງການໃນຕອນເຊົ້າວັນທີ 19 ມີຖຸນາ 2023, ທີ່ ໂຮງແຮມຄຣາວພາຊ່າ, ນະຄອນຫຼວງວຽງຈັນ ເປັນກຽດເຂົ້າຮ່ວມເປີດກອງປະຊຸມໂດຍທ່ານ ດຣ. ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ແລະເຈົ້າໜ້າທີ່ອາວຸໂສດ້ານການສາທາລະນະສຸກຈາກ 10 ປະເທດສະມາຊິກອາຊຽນ, ປະເທດຕີມໍເລດສະເຕ, ກອງເລຂາອາຊຽນທີ່ເຂົ້າຮ່ວມທັງຮູບແບບເຊີ່ງໜ້າ ແລະທາງໄກ.

ອງປະຊຸມໃນຄັ້ງນີ້ຈະໄດ້ດໍາເນີນເປັນເວລາ 05 ວັນ ນັບແຕ່ວັນທີ19-23 ມິຖຸນາ 2023, ໂດຍຈະໄດ້ປຶກສາຫາລືໃນຫຼາຍບັນຫາດ້ານສາທາລະນະສຸກ ແລະບັນດາເອກະສານທີ່ສຳຄັນທາງດ້ານການພັດທະນາສາທາລະນະສຸກອາຊຽນໂດຍສະເພາະແມ່ນຄວາມຄືບໜ້າການຈັດຕັ້ງປະຕິບັດແຜນພັດທະນາສາທາລະນະສຸກອາຊຽນ ສົກປີ 2021-2025, ລວມທັງບັນດາແຜນຈັດຕັ້ງປະຕິບັດ ທີ່ຮ່ວມມືກັບບັນດາປະເທດຄູ່ເຈລະນາ ແລະຄູ່ຮ່ວມພັດທະນາ. ກອງປະຊຸມຈະໄດ້ມີການທົບທວນບັນດາກິດຈະກໍາ,ໂຄງການທີ່ໄດ້ຈັດຕັ້ງປະຕິບັດໃນໄລຍະຜ່ານມາຈົນຮອດປະຈຸບັນ ແລະວາງທິດທາງແຜນການຕໍ່ໜ້າຮ່ວມກັນ; ໂດຍສະເພາະການຕິດຕາມ ແລະລາຍງານຄວາມຄືບໜ້າບັນດາວຽກງານທີ່ໄດ້ຕົກລົງໃນກອງປະຊຸມຄັ້ງທີ່ຜ່ານມາຂອງເຈົ້າໜ້າທີ່ອາວຸໂສດ້ານສາທາລະນະສຸກອາຊຽນຄັ້ງທີ16 (16th ASEAN SOMHD) ແລະ ກອງປະຊຸມລັດຖະມົນຕີສາທາລະນະສຸກອາຊຽນ ຄັ້ງທີ 15 (15th ASEAN Health Ministers Meeting and Related Meeting), ຊຶ່ງກອງປະຊຸມໃນຄັ້ງນີ້ຈະໄດ້ເນັ້ນໜັກປຶກສາຫາລືໃນຫຼາຍບັນຫາດັ່ງນີ້:

  • - ຄວາມຄືບໜ້າໃນການຈັດຕັ້ງປະຕິບັດວຽກງານແຜນພັດທະນາສາທາລະນາສາທາລະນະສຸກອາຊຽນຂອງບັນກຸ່ມສຸຂະພາບອາຊຽນໃນໄລຍະ 2021-2025 (ASEAN Health Clusters);
  • - ການຈັດຕັ້ງປະຕິບັດບັນດາຖະແຫຼງການຜູ້ນໍາອາຊຽນທີ່ຕິດພັນກັບວຽກງານສາທາລະນະສຸກ (Health-related declarations and commitments);                                 
  • - ປຶກສາຫາລືກ່ຽວກັບຄວາມຄືບໜ້າການພິຈາລະນາສັນຍາການສ້າງຕັ້ງສູນອາຊຽນວ່າດ້ວຍພາວະສຸກເສີນດ້ານສາທາລະນະສຸກ ແລະພະຍາດທີ່ເກີດຂື້ນໃໝ່(ASEAN Centre for Public Health Emergency and Emerging Diseases)
  • - ຂອບຂອງລະບົບກົນໄກການປະສານງານອາຊຽນກ່ຽວກັບພາວະສຸກເສີນດ້ານສາທາລະນະສຸກ (ASEAN Public Health Emergency Coordination System Framework); ແລະ ບັນຫາອື່ນໆທີ່ສຳຄັນ ທີ່ຈະໄດ້ປຶກສາຫາລືຮ່ວມກັນຂອງເຈົ້າໜ້າທີ່ອາວຸໂສດ້ານການພັດທະນາສາທາລະນະສຸກ ລະຫວ່າງ ບັນດາປະເທດສະມາຊິກອາຊຽນ, ປະເທດຄູ່ເຈລະຈາ ແລະບັນດາປະເທດຄູ່ຮ່ວມພັດທະນາຕ່າງໆ.
  • ແຫຼ່ງຂໍ້ມູນ Lao National Radio

แชร์