ຄໍາມ່ວນ ພົບຜູ້ຕິດເຊື້ອໄຂ້ຍຸງລາຍ 719 ກໍລະນີ

ທ່ານ ແສງທອງ ເສີມລໍາວັນ ຮອງຫົວໜ້າພະແນກສາທາລະນະສຸກແຂວງຄໍາມ່ວນ ໄດ້ໃຫ້ສໍາພາດຕໍ່ນັກຂ່າວທ້ອງຖິ່ນໃນວັນທີ 16 ມິຖຸນາຜ່ານມາວ່າ: ທົ່ວແຂວງຄໍາມ່ວນ ພົບຜູ້ຕິດເຊື້ອໄຂ້ຍຸງລາຍ 719 ກໍລະນີ ທີ່ມາຮັບການບໍລິການປິ່ນປົວຢູ່ພາຍໃນໂຮງໝໍ ແລະສຸກສາລາແຫ່ງຕ່າງໆທົ່ວແຂວງໃນນີ້ເຂດທີ່ມີໂຕເລກຜູ້ຕິດເຊື້ອຫຼາຍແມ່ນເມືອງທ່າແຂກມີເຖິງ 193 ກໍລະນີ, ຮອງລົງມາແມ່ນເມືອງຍົມມະລາດ 171 ກໍລະນີ, ຫີນບູນ 138 ກໍລະນີ ແລະເມືອງບົວລະພາ 85 ກໍລະນີ. ປະຈຸບັນຍັງບໍ່ພົບກໍລະນີທີ່ເສຍຊີວິດຈາກພະຍາດດັ່ງກ່າວ.

ນອກຈາກພະຍາດໄຂ້ຍຸງລາຍແລ້ວຍັງມີພະຍາດຖອກທ້ອງຮຸນແຮງເຊັ່ນ: ໄຂ້ທໍລະພິດ, ໄຂ້ວັດໃຫຍ່, ເບື່ອອາຫານ (ເບື່ອເຫັດ) ທີ່ພວກເຮົາຕິດຕາມເຝົ້າລະວັງໃນປັດຈຸບັນ. ພະຍາດໄຂ້ຍຸງລາຍແມ່ນສາມາດພົບເຫັນໄດ້ຕະຫຼອດປີ, ສ່ວນຫຼາຍແມ່ນໃນຊ່ວງລະດູຝົນ ໂດຍການແຜ່ລະບາດດ້ວຍວິທີຍຸງລາຍກັດຄົນທີ່ຕິດເຊື້ອແລ້ວນຳເຊື້ອໄປສູ່ຄົນອື່ນໆ. ສ່ວນຜູ້ອາການທີ່ຕິດເຊື້ອຈະມີອາການເປັນໄຂ້, ໂຕຮ້ອນ, ເລືອດອອກຕາມຮ່າງກາຍ ແລະບາງກໍລະນີກໍ່ມີອາການຖອກທ້ອງຕື່ມອີກ.

ທ່ານ ແສງທອງ ເສີມລາວັນ ໄດ້ຮຽກຮ້ອງມາຍັງສັງຄົມຈົ່ງຊ່ວຍກັນສ້າງຂະບວນການເປັນເຈົ້າການໃນການມີສ່ວນຮ່ວມ, ກໍາຈັດແຫຼ່ງເພາະພັນຂອງຍຸງລາຍໂດຍການອະນາໄມແອ່ງນໍ້າ, ກະໂປະ, ກະປ໋ອງ ແລະພາສະນະກັກຂັງນໍ້າອື່ນໆ ໃຫ້ເປັນປະຈໍາທີ່ຍຸງສາມາດໄຂ່ ແລະຂະຫຍາຍພັນໄດ້. ຖ້າຫາກບຸກຄົນໃດເກີດມີອາການບໍ່ສະບາຍ, ເປັນໄຂ້ ໂຕຮ້ອນກໍໃຫ້ຮີບນໍາຄົນໄຂ້ມາໂຮງໝໍ ຫຼືສຸກສາລາໃກ້ບ້ານທ່ານເພື່ອຮັບການປິ່ນປົວໂດຍໄວ ແລະແກ້ໄຂໃຫ້ທັນກັບສະພາບການ.

(ຂ່າວ ມະນີວັນ)

• 19/06/2023