ສວສສຊ ລະດົມຄວາມຄິດເຫັນຕໍ່ກັບການແກ້ໄຂບັນຫາອັດຕາເງິນເຟີ້ ແລະລາຄາສິນຄ້າ

ໃນວັນທີ 16 ມິຖຸນານີ້ ທີ່ຫ້ອງປະຊຸມສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດກອງປະຊຸມລະດົມຄວາມຄິດເຫັນຈາກພາກທຸລະກິດ ເພື່ອຄົ້ນຄວ້າບັນດາມາດຕະການແກ້ໄຂຕໍ່ກັບບັນຫາອັດຕາເງິນເຟີ້ ແລະລາຄາສິນຄ້າທີ່ເພີ່ມສູງຂຶ້ນໂດຍການເປັນປະທານຂອງທ່ານ ກິແກ້ວ ຈັນທະບູລີ ຮອງເລຂາຄະນະພັກຮອງປະທານສະຖາບັນວິທະຍາສາດເສດຖະກິດ ແລະສັງຄົມແຫ່ງຊາດ ຮອງຫົວໜ້າທັງເປັນຜູ້ປະຈຳການ ຄະນະສະເພາະກິດ 44/ນຍ, ມີບັນດາຜູ້ຕາງໜ້າຈາກສະພາການຄ້າ ແລະອຸດສາຫະກຳແຫ່ງຊາດລາວ, ບັນດາສະມາຄົມທຸລະກິດ, ທະນາຄານທຸລະກິດ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມສຳມະນາໃນຄັ້ງນີ້ຈັດຂຶ້ນເພື່ອລະດົມຄວາມຄິດເຫັນຈາກພາກທຸລະກິດກ່ຽວກັບປັດໄຈໃດທີ່ເປັນສາເຫດຕົ້ນຕໍກໍ່ໃຫ້ເກີດສະພາບບັນຫາອັດຕາເງິນເຟີ້ ແລະ ລາຄາສິນຄ້າສູງຂຶ້ນຢ່າງຕໍ່ເນື່ອງ, ວິທີການໃນການຮັບມືຂອງພາກທຸລະກິດຕໍ່ກັບບັນຫາດັ່ງກ່າວລວມເຖິງຂໍ້ສະເໜີແນະຈາກພາກທຸລະກິດເພື່ອໃຫ້ຄະນະສະເພາະກິດ ນຳໄປຄົ້ນຄວ້າລົງເລິກເພື່ອຊອກຫາແນວທາງ ແລະມາດຕະການໃນການແກ້ໄຂໃນຕໍ່ໜ້າ.

ຕອນທ້າຍກອງປະຊຸມ, ທ່ານ ກິແກ້ວ ຈັນທະບູລີ ໄດ້ເນັ້ນໜັກ ເພື່ອຂໍຄວາມຮ່ວມມືຈາກພາກທຸລະກິດໃນການປະສານສົບທົບກັບກອງເລຂາຊ່ວຍວຽກຄະນະສະເພາະກິດ 44/ນຍ ເພື່ອສະໜອງຂໍ້ມູນອັນເປັນປະໂຫຍດເພື່ອໃຫ້ທີມງານສາມາດນຳມາຄົ້ນຄວ້າ, ວິເຄາະວິໄຈໃຫ້ຖືກຕາມສະພາບການຕົວຈິງຢ່າງພາວະວິໄສເພື່ອຊອກຫາແນວທາງ ແລະມາດຕະການແກ້ໄຂໃຫ້ສອດຄ່ອງເພື່ອຊ່ວຍຊຸກຍູ້ພາກທຸລະກິດໃຫ້ສາມາດຂ້າມຜ່ານວິກິດການໃນຄັ້ງນີ້ໃຫ້ໄດ້ໂດຍໄວ.

แชร์