ເມືອງບາຈຽງຈະເລີນສຸກ ເລັ່ງແກ້ໄຂການລັກລອບຊື້-ຂາຍຢາງພາລາ ທີ່ເຄື່ອນໄຫວບໍ່ຖືກຕ້ອງ

ແຫຼ່ງຂ່າວຈາກແຂວງຈຳປາສັກໃຫ້ຮູ້ວ່າ: ຫ້ອງການອຸດສາຫະກຳ ແລະການຄ້າ ເມືອງບາຈຽງຈະເລີນສຸກ ແຂວງຈຳປາສັກ ປືກສາຫາລືແກ້ໄຂປະກົດການຫຍໍ້ທໍ້ໃນການເຄື່ອນໄຫວຊື້-ຂາຍຢາງພາລາພາຍໃນເມືອງ ໂດຍການເປັນປະທານຂອງທ່ານ ສົມລິດ ປັນທະບົວສີ, ເຈົ້າເມືອງບາຈຽງຈະເລີນສຸກມີບັນດາຫົວໜ້າຫ້ອງການ, ຮອງຫົວໜ້າຫ້ອງການອ້ອມຂ້າງເມືອງ ແລະນັກທຸລະກິດຜູ້ປະກອບການທີ່ເກັບຊື້ຢາງພາລາພາຍໃນເມືອງຈຽງຈະເລີນສຸກເຂົ້າຮ່ວມ.

ທ່ານ ບຸນທົງ ລັດຕະນະວົງ ຫົວໜ້າຫ້ອງການ ອຸດສາຫະກຳ ແລະການຄ້າ ເມືອງຈຽງຈະເລີນສຸກ ໄດ້ລາຍງານການຄຸ້ມຄອງທຸລະກິດຊື້-ຂາຍຢາງພາລາ, ເຊິ່ງທົ່ວເມືອງບາຈຽງຈະເລີນສຸກມີບໍລິສັດເກັບຊື້ທັງໝົດ 14 ຫົວໜ່ວຍ ຍັງເຄື່ອນໄຫວຕົວຈິງ 9 ຫົວໜ່ວຍ; ວິສາຫະກິດສ່ວນບຸກຄົນ 11 ຫົວໜ່ວຍ ຍັງເຄື່ອນໄຫວຕົວຈິງ 7 ຫົວໜ່ວຍ; ເນື້ອທີ່ປູກຢາງພາລາ 22 ພັນກວ່າເຮັກຕາ ແລະ ເປັນສວນ 2 ພັນກວ່າເຮັກຕາ. ການຊື້-ຂາຍຢາງພາລາ ຂອງສວນປະຊາຊົນທີ່ຈໍາໜ່າຍພາຍໃນ ແລະ ສົ່ງອອກໃນລາຄາປີ 2022 ແມ່ນ 7.000-12.000 ກີບ/ຕໍ່ກິໂລ ແລະ ປີ 2023 ແມ່ນ 10.000-11.000 ກີບ/ຕໍ່ກິໂລ.

ສະນັ້ນ, ກອງປະຊຸມຄັ້ງນີ້ແມ່ນເພື່ອພ້ອມກັນເປັນເຈົ້າການໃນການຄຸ້ມຄອງ, ການເກັບຊື້ນໍ້າຢາງພາລາຂອງບໍລິສັດ ແລະຕິດຕາມການລັກລອບຊື້-ຂາຍນໍ້າຢາງພາລາຈາກພໍ່ຄ້າທາງນອກທີ່ມາເກັບຊື້ນໍ້າຢາງຢູ່ພາຍໃນເມືອງໂດຍສະເພາະແມ່ນປາກົດການລັກຊື້ຢາງພາລາສ່ວນບຸກຄົນ, ລວມໝູ່ຂອງບໍລິສັດ ແລະບັນຫາຜົນກະທົບທາງດ້ານສິ່ງແວດລ້ອມ (ສົ່ງກິ່ນເໝັນ) ໃຫ້ນັບມື້ຫລຸດລົງ.

แชร์