ໄຟຟ້າລາວສາຂາສາລະວັນ ຫາລືເກັບກູ້ໜີ້ສິນຄ່າຊົມໃຊ້ກະແສໄຟຟ້າ 20 ຕື້ກວ່າກີບ

ການຊົມໃຊ້ພະລັງງານໄຟຟ້າໃນທົ່ວແຂວງສາລະວັນນັບມື້ມີທ່າອ່ຽງເພີ່ມຂຶ້ນເລື້ອຍໆ ໂດຍສະເພາະໃນຍຸກເສດຖະກິດມີການຂະຫຍາຍຕົວ, ການຊົມໃຊ້ຂອງແຕ່ລະຄອບຄົວເພີ່ມຂຶ້ນ, ບັນດາໂຮງຈັກ, ໂຮງງານອຸດສາຫະກໍາຕ່າງໆ ລວມທັງປະເພດລັດບໍລິຫານກໍເພີ່ມຂຶ້ນເຊັ່ນດຽວກັນໂດຍສະເພາະແມ່ນລະບົບຊົນລະປະທານ, ສຳນັກງານຫ້ອງການ ແລະ ອື່ນໆ. ຊື່ງຈາກການສົມທຽບໃນໄລຍະ 5 ປີ (2018-2022) ມີຜູ້ຊົມໃຊ້ເພີ່ມຂຶ້ນ 10.379 ຫົວໜ່ວຍ. ປະຈຸບັນມີລູກຄ້າທັງໝົດ 77.836 ຫົວໜ່ວຍ ນຳໃຊ້ພະລັງງານໄຟຟ້າທັງໝົດ 106 ລ້ານກິໂລວັດໂມງ (KWH). ສ່ວນການຊໍາລະຄ່າກະແສພະລັງງານໄຟຟ້າມີບາງຫົວໜ່ວຍກໍ່ບໍ່ທັນຊຳລະ 100% ໃນທຸກໆປີ ຈຶ່ງເກີດມີໜີ້ສິນຄຸມເຄືອມາຮອດປະຈຸບັນມີທັງໝົດ 20 ຕື້ກວ່າກີບ.

ທ່ານ ສຸລິຍາ ຈັນທະວົງ ຮອງຫົວໜ້າລັດວິສາຫະກິດໄຟຟ້າລາວສາຂາແຂວງ ໄດ້ລາຍງານການເກັບກູ້ໜິ້ສິນຄ່າກະແສໄຟຟ້າ ໃນປີ 2022 ແລະ ແຜນການເກັບກູ້ປີ 2023 ຕໍ່ກອງປະຊຸມປຶກສາຫາລືທີ່ຈັດຂຶ້ນໃນວັນທີ 14 ມິຖຸນາຜ່ານມາໃຫ້ຮູ້ວ່າ: ການເກັບກູ້ໜິ້ສິນໃນໄລຍະຜ່ານມາມີທັງຂໍ້ສະດວກ, ຂໍ້ຫຍຸ້ງຍາກ, ຈຸດດີ, ຈຸດອ່ອນ ແລະ ຂໍ້ຄົງຄ້າງ, ຊຶ່ງມີໜີ້ສິນທີ່ຄ້າງຄຸມເຄືອແຕ່ລະປະເພດຊົມໃຊ້ກະແສໄຟຟ້າ ເຊັ່ນ: ໜີ້ສິນດ້ານຊົນລະປະທານ 4 ຕື້ກວ່າກີບ, ລັດບໍລິຫານ 14 ຕື້ກວ່າກີບ ແລະ ອື່ນໆ ຈຳນວນ 1,6 ຕື້ກວ່າກີບ. ການແກ້ໄຂໜີ້ສິນຜ່ານມາແມ່ນໄດ້ມີການປຶກສາຫາລື, ສັງລວມໜີ້ສິນໃນແຕ່ລະໄລຍະ ແຈ້ງໃຫ້ລູກຄ້າຮັບຮູ້ ແລະເພື່ອຢັ້ງຢືນໄວ້.

ສຳລັບທິດທາງແຜນການສູ້ຊົນ ໃນປີ 2023 ເພີ່ມທະວີໃນການເກັບໜີ້ສິນທີ່ຄ້າງຊຳລະທຸກປະເພດ ໃຫ້ໄດ້ 54% ໜີ້ສິນ ປີ 2022 ຫຼື ປະມານ 9 ຕື້ກວ່າກີບ, ສູ້ຊົນເກັບກູ້ໜີ້ສິນ 7 ປະເພດ ຍົກເວັ້ນ(ລັດບໍລິຫານ ແລະ ຊົນລະປະທານ) ໃຫ້ໄດ້ 100% ແລະ ສູ້ຊົນເກັບໜີ້ສິນທີ່ຈຳໜ່າຍພະລັງງານໄຟຟ້າອອກທຸກປະເພດໃນປີ 2023 ໃຫ້ບັນລຸໄດ້ 97%ຂຶ້ນໄປ. ຈາກນັ້ນ, ຜູ້ເຂົ້າຮ່ວມກໍ່ໄດ້ປະກອບຄຳຄິດເຫັນ,ລາຍງານເຖີງສະພາບລວມ,ບັນຫາຂໍ້ຄົງຄ້າງທີ່ເກີດຂຶ້ນໃນແຕ່ລະຂົງເຂດວຽກງານ ຕໍ່ກັບການຄ້າງຊໍາລະໜີ້ສິນຄ່າກະແສໄຟຟ້າ ແລະຄົ້ນຄວ້າຢ່າງພາວະວິໃສຊອກວິທີທາງແກ້ໄຂ,ຂອດຂັ້ນການຊໍາລະໜີ້ສິນຄ່ານໍາໃຊ້ກະແສໄຟຟ້າເພື່ອເຮັດໃຫ້ວຽກງານດັ່ງກ່າວບັນລຸໄດ້.

แชร์