ກົມປ່າໄມ້ ຮ່ວມກັບ ບໍລິສັດເອວາ ສຶກສາພັດທະນາປ່າໄມ້ ແລະຊີວິດການເປັນຢູ່ປະຊາຊົນ

ພິທີເຊັນບົດບັນ ທຶກຄວາມເຂົ້າໃຈ ເພື່ອສຶກສາຄວາມເປັນໄປໄດ້ເບື້ອງຕົ້ນໃນການພັດທະນາໂຄງການຫຼຸດຜ່ອນການປ່ອຍອາຍພິດເຮືອນແກ້ວຈາກການທໍາລາຍປ່າໄມ້ ແລະ ເຮັດໃຫ້ປ່າໄມ້ຊຸດໂຊມ ລະຫວ່າງ ກົມປ່າໄມ້ ກະຊວງກະສິກຳ ແລະປ່າໄມ້ ກັບ ບໍລິສັດ ເອວາ ທານສະປອດ ເທຣດດີ້ງ ຂາເຂົ້າ-ຂາອອກ ຈຳກັດຜູ້ດຽວ ໄດ້ຈັດຂຶ້ນເມື່ອບໍ່ດົນຜ່ານມານີ້ທີ່ນະຄອນຫຼວງວຽງຈັນໃຫ້ກຽດເຂົ້າຮ່ວມເປັນສັກຂີພະຍານຂອງທ່ານບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນຊີ ແລະການສື່ສານພ້ອມດ້ວຍພາກສ່ວນກ່ຽວຂ້ອງ. ທ່ານນາງ ອາລິຕາ ສຸລິຍະວົງ ປະທານບໍລິສັດ ເອວາ ທານສະປອດ ເທຣດດີ້ງ ຂາເຂົ້າຂາອອກ ຈຳກັດຜູ້ດຽວ ລາຍງານວ່າ: ເອວາ ແມ່ນບໍລິສັດໜຶ່ງທີ່ດຳເນີນການກ່ຽວກັບວຽກງານ ເຣດ+ ໃນລາວ ແລະມີຄວາມສົນໃຈຕໍ່ກັບວຽກງານການຊື້-ຂາຍ ສິນເຊື່ອກາກບອນປ່າໄມ້ໃນລາວກໍ່ຄືວຽກງານ REDD+. ຊຶ່ງເຂດພື້ນທີ່ ທີ່ລັດຖະບານ (ຕາງໜ້າໂດຍກົມປ່າໄມ້, ກະຊວງກະສິກຳ ແລະປ່າໄມ້) ໄດ້ອະນຸມັດໃຫ້ບໍລິສັດເຮັດການສຶກສາຄວາມເປັນໄປໄດ້ມີຈຳນວນ 4 ເຂດ ຄື: ປ່າປ້ອງກັນແຫ່ງຊາດ ພູຫຼວງ-ພູເຂົານົກ, ປ່າປ້ອງກັນແຫ່ງຊາດແຫຼ່ງນໍ້າເຊຕະນວນ-ພູນາກ, ປ່າປ້ອງກັນແຫ່ງຊາດ ແຫຼ່ງນໍ້າ ເຊລະນອງ-ພູໂອງ ແລະປ່າສະຫງວນແຂວງ ພູເກົ້າ-ພູມະໂລງ. ທັງນີ້ກໍ ເພື່ອກ້າວເຂົ້າໄປສູ່ການເຈລະຈາການຊື້-ຂາຍສິນເຊື່ອກາກບອນປ່າໄມ້ ແລະ ການເຂົ້າຫາແຫຼ່ງທຶນແບບຍືນຍົງອີກຮູບແບບໜຶ່ງ ເພື່ອຊ່ວຍເຫຼືອລັດຖະບານ ພັດທະນາປ່າໄມ້ ແລະປັບປຸງຊີວິດການເປັນຢູ່ຂອງປະຊາຊົນບັນດາເຜົ່າ ທີ່ອາໃສຢູ່ໃນປ່າໄມ້ ແລະອ້ອມຮອບປ່າໄມ້ ໃຫ້ດີຂຶ້ນເທື່ອລະກ້າວ.

ສະນັ້ນ, ເພື່ອເຮັດໃຫ້ວຽກງານການຮ່ວມມື ລະຫວ່າງ ບໍລິສັດ ເອວາ ແລະລັດຖະບານແຫ່ງ ສປປ ລາວ ໃນການກ້າວເຂົ້າໄປສູ່ການເຂົ້າເຖິງຕະຫຼາດສິນເຊື່ອກາກບອນປ່າໄມ້ ແບບຍືນຍົງໃນຕະຫຼາດສາກົນ. ບໍລິສັດ ເອວາ ຂໍສັນຍາວ່າຈະສຸມທຸກເຫື່ອແຮງ ເພື່ອເຮັດໃຫ້ວຽກງານດັ່ງກ່າວໄດ້ຖືກຈັດຕັ້ງຢ່າງມີປະສິດພາບ ແລະມີປະສິດທິຜົນໃນອານາຄົດອັນໃກ້ນີ້.

• 16/06/2023