ປະກາດແຕ່ງຕັ້ງສະພາບໍລິຫານບໍລິສັດຮຸ້ນສ່ວນກໍ່ສ້າງ ແລະຜະລິດອຸດສາຫະກໍາເບົາ

ກົມໃຫຍ່ພະລາທິການກອງທັບ, ໄດ້ຈັດພິທີປະກາດການແຕ່ງຕັ້ງສະພາບໍລິຫານບໍລິສັດຮຸ້ນສ່ວນກໍ່ສ້າງ ແລະຜະລິດອຸດສາຫະກໍາເບົາ ຈໍາກັດ ຂຶ້ນໃນວັນທີ 13 ມິຖຸນາ 2023 ພາຍໃຕ້ການເປັນປະທານຂອງສະຫາຍພົນຕີ ຄໍາເພັດ ສີຊານົນ ຫົວໜ້າກົມໃຫຍ່ພະລາທິການກອງທັບ, ມີຄະນະພາບໍລິຫານ ແລະພະນັກງານ, ວິຊາການທີ່ກ່ຽວຂ້ອງເຂົ້າຮ່ວມ. ໃນພິທີໄດ້ຜ່ານຂໍ້ຕົກລົງຂອງກົມໃຫຍ່ພະລາທິການກອງທັບວ່າດ້ວຍການການອະນຸມັດແຕ່ງຕັ້ງແຕ່ງຕັ້ງສະພາບໍລິຫານບໍລິສັດຮຸ້ນສ່ວນກໍ່ສ້າງ ແລະຜະລິດອຸດສາຫະກໍາເບົາ ຈໍາກັດ, ໃນນີ້ກົມໃຫຍ່ພະລາທິການກອງທັບຕົກລົງ, ແຕ່ງຕັ້ງ ພົນຈັດຕະວາ ວົງສັກ ສີພັນດອນ ຮອງຫົວໜ້າກົມໃຫຍ່ພະລາທິການກອງທັບ ເປັນປະທານສະພາບໍລິຫານ, ທ່ານນາງ ວຽງຄອນ ສິດສຸວົງ ປະທານບໍລິສັດໂຊກມຸງຄຸນການຄ້າ ແລະການລົງທຶນຈຳກັດ ເປັນຮອງປະທານສະພາບໍລິຫານ, ພັນເອກ ສົມໃຈ ຄໍາມະນີ ຫົວໜ້າກົມກໍ່ສ້າງ-ຄຸ້ມຄອງຊັບສິນກອງທັບ, ທ່ານ ສີສະຫວາດ ຈັນທະລັງສີ, ພັນໂທ ດວງສີ ແສງອາລຸນ, ທ່ານ ກາສີ ສາຍປະລີນຍາ ແລະທ່ານ ນາງ ສຸມົນຕີ ເຮືອງແສງເປັນກຳມະການ.

ໂອກາດນີ້, ສະຫາຍພົນຕີ ຄໍາເພັດ ສີຊານົນ ກໍໄດ້ໃຫ້ຊີ້ທິດເຍືອງທາງໃຫ້ຄະນະສະພາບໍລິຫານທຸກສະຫາຍ,ຈົ່ງພ້ອມກັນເອົາໃຈໃສ່ຕໍ່ວຽກງານສຶກສາອົບຮົມການເມືອງນໍາພາແນວຄິດເປັນກົກ,ມີຄຸນສົມບັດສິນທໍາປະຕິວັດ,ຄວາມສາມັກຄີພາຍໃນໝູ່ຄະນະ,ບົນພື້ນຖານປະຕິບັດຫຼັກການລວມສູນປະຊາທິປະໄຕ,ເຮັດວຽກເປັນໝູ່ຄະນະ, ແບ່ງວຽກງານໃຫ້ບຸກຄົນຮັບຜິດຊອບລະອຽດຈະແຈ້ງ ແລະ ພ້ອມກັນຈັດຕັ້ງປະຕິບັດວຽກງານຂອງບໍລິສັດຮຸ້ນສ່ວນກໍ່ສ້າງ ແລະ ຜະລິດອຸດສາຫະກໍາເບົາ ຈໍາກັດ ໃຫ້ສອດຄ່ອງກັບເນື້ອໃນສັນຍາທີ່ໄດ້ຕົກລົງກັນຢ່າງເຂັ້ມງວດ ແລະດໍາເນີນທຸກລະກິດໄປດ້ວຍປະສົບຜົນສໍາເລັດຕະຫຼອດໄປ.

ຂ່າວ-ພາບ: ຄໍາປະສົງ ລາດຊະວົງ.

• 16/06/2023