ສາລະວັນ ຈະກໍ່ສ້າງທາງປູຫີນຂົບໄລຍະ 24 ກິໂລແມັດ ມູນຄ່າ 97 ຕື້ກວ່າກີບ

ບໍລິສັດ ຈະເລີນໄຊກໍ່ສ້າງຂົວທາງ, ເຄຫະສະຖານ ແລະ ກໍ່ສ້າງຊົນລະປະທານເປັນຜູ້ຊະນະການປະມູນເປັນບໍລິສັດຮັບເໝົາກໍ່ສ້າງເສັ້ນທາງປູຫີນຂົບແຕ່ແຍກທາງ 15A ບ້ານຄອນສາຍ ເມືອງວາປີ ຫາແຍກທາງ 13 ໃຕ້ ບ້ານແບ່ງດ່ານ ເມືອງລະຄອນເພັງ ແຂວງສາລະວັນ, ຄວາມຍາວ 24 ກິໂລແມັດ, ໃນມູນຄ່າ 97 ຕື້ກວ່າກີບ ແລະບໍລິສັດ TNV ຄໍປໍເລຊັນຈຳກັດ ຊະນະການປະມູນເປັນບໍລິສັດທີ່ປຶກສາໂຄງການດັ່ງກ່າວມູນຄ່າ 1,5 ຕື້ກວ່າກີບ.

ເສັ້ນທາງປູຫີນຂົບດັ່ງກ່າວ, ມີຄວາມຍາວທັງໝົດ 24,40 ກິໂລແມັດ, ກວ້າງ 7-8 ແມັດ, ເປັນເສັ້ນທາງເຊື່ອມຕໍ່ລະຫວ່າງທາງຫຼວງແຫ່ງຊາດ 15A ຫາ ທາງຫຼວງແຫ່ງຊາດເລກທີ 13 ໃຕ້ ແລະ ເປັນເສັ້ນທາງເຊື່ອມຕໍ່ລະຫວ່າງ 2 ເມືອງຄື: ເມືອງວາປີ ແລະເມືອງລະຄອນເພັງ. ແລວເສັ້ນທາງດັ່ງກ່າວແມ່ນຈະສ້າງໄປຕາມແລວທາງເກົ່າທີ່ມີແລ້ວ, ໃນໄລຍະຜ່ານມາໄດ້ມີການສ້ອມແປງບູລະນະຮັກສາເຮັດໃຫ້ສາມາດແກ້ໄຂການສັນຈອນໄປມາຊົ່ວຄາວເທົ່ານັ້ນ ແລະຍັງມີຄວາມຫຍຸ້ງຍາກ,ມີປະຊາຊົນອາໄສຢູ່ຕາມແລວທາງມີຈໍານວນຫຼວງຫຼາຍ ທີ່ຈະໄດ້ນຳໃຊ້ ແລະສັນຈອນໄປມາ ແລກປ່ຽນຊື້-ຂາຍ, ການຜະລິດຂອງປະຊາຊົນ ແລະ ກາຍເປັນທ່າແຮງທີ່ສຳຄັນໃນການພັດທະນາເສດຖະກິດ-ສັງຄົມຂອງແຂວງ. ສຳລັບໜ້າວຽກຈັດຕັ້ງປະຕິບັດຂອງໂຄງການ ມີຄື: ກໍ່ສ້າງເສັ້ນທາງ, ກໍ່ສ້າງຂົວແຜ່ນ 4 ແຫ່ງ, ກໍ່ສ້າງທໍ່ລະບາຍນໍ້າ, ກໍ່ສ້າງຮ່ອງລະບາຍນໍ້າ, ວຽກກັນເຈື່ອນ ແລະວຽກຕົບແຕ່ງອື່ນໆ. ກໍານົດເວລາໃນການກໍ່ສ້າງເສັ້ນທາງດັ່ງກ່າວໃຫ້ສຳເລັດ ແລະສາມາດນໍາໃຊ້ໄດ້ໄລຍະ 4 ປີເລີ່ມແຕ່ປີ 2023-2027.

ການປະມູນດັ່ງກ່າວໄດ້ຈັດຂຶ້ນໃນວັນທີ 14 ມິຖຸນາຜ່ານມາ, ທີ່ຫ້ອງປະຊຸມພະແນກໂຍທາທິການ ແລະຂົນສົ່ງແຂວງ, ໂດຍການເປັນປະທານຂອງທ່ານ ສີທະນົນ ໄຊນິນສຸລິຍະວົງ ຮອງຫົວໜ້າພະແນກ ຍທຂ ແຂວງ, ມີທ່ານຮອງເຈົ້າເມືອງວາປີ, ເມືອງລະຄອນເພັງ, ຕາງໜ້າພະແນກການທີ່ກ່ຽວຂ້ອງອ້ອມຂ້າງແຂວງເຂົ້າຮ່ວມ.

ຂ່າວ-ພາບ: ທິດລານີ ໂຄດໂຍທາ.

แชร์