ໂຊກໄຊພັດທະນາ ສຳເລັດໂຄງການກໍ່ສ້າງໂຮງຮຽນ 5 ແຫ່ງ ເມືອງຮຸນ

ພິທີມອບ-ຮັບໂຄງການກໍ່ສ້າງໂຮງຮຽນ 5 ແຫ່ງ ພາຍໃນເມືອງຮຸນ ແຂວງອຸດົມໄຊ ໄດ້ຈັດຂຶ້ນໃນວັນທີ 12 ມິຖຸນາ 2023 ພາຍໃຕ້ການເປັນປະທານຂອງທ່ານນາງ ນວມຄຳ ຈັນທະບູລີ ຮອງຫົວໜ້າກົມສາມັນສຶກສາ, ຫົວໜ້າໂຄງການພັດທະນາການສຶກສາເພື່ອການຈ້າງງານ (EESDP), ເປັນກຽດເຂົ້າຮ່ວມມີທ່ານ ກິສອນ ແສນປັນຍາ ຮອງເຈົ້າເມືອງໆຮຸນ, ທ່ານ ສົມສັກ ສຸພິໄລ ຫົວໜ້າພະແນກສຶກສາທິການ ແລະກິລາແຂວງອຸດົມໄຊ ພ້ອມດ້ວຍພາກສ່ວນກ່ຽວຂ້ອງ, ຄູອາຈານ ແລະ ນ້ອງນັກຮຽນ.

ທ່ານ ອຸດອນ ນິດທະວົງ ຮອງປະທານບໍລິສັດໂຊກໄຊພັດທະນາກໍ່ສ້າງຈຳກັດຜູ້ດຽວໄດ້ຂຶ້ນລາຍງານການຈັດຕັ້ງປະຕິບັດການກໍ່ສ້າງໂຮງຮຽນ 5 ແຫ່ງໂດຍຫຍໍ້ ເຊິ່ງມີເນື້ອໃນບາງຕອນກ່າວວ່າ: ໂຄງການກໍ່ສ້າງໂຮງຮຽນ 5 ແຫ່ງ ທີ່ເມືອງຮຸນ ແມ່ນທຶນກູ້ຢືມຈາກທະນາຄານ ADB,ໄດ້ເລີ່ມລົງມືກໍ່ສ້າງແຕ່ວັນທີ 24 ກຸມພາ 2021 ໂດຍມີ ມສ ເມືອງຮຸນ, ມສ ດອນເມືອງ, ມຕົ້ນ ບ້ານນາ, ມຕົ້ນວັງລໍ່າ ແລະ ມຕົ້ນມົກພອດ. ການກໍ່ສ້າງປະກອບມີ: ຫ້ອງຮຽນ, ຫໍພັກ, ຫ້ອງການ, ຫໍສະມຸດ ແລະຫ້ອງທົດລອງ, ມີມູນຄ່າກໍ່ສ້າງທັງໝົດ 9 ຕື້ກວ່າກີບ ໂດຍແມ່ນບໍລິສັດໂຊກໄຊພັດທະນາກໍ່ສ້າງ ຈຳກັດຜູ້ດຽວເປັນຜູ້ຮັບເໝົາ ມາຮອດປະຈຸບັນແມ່ນສຳເລັດ 100%. ເຊິ່ງໃນໄລຍະການຈັດຕັ້ງປະຕິບັດໂຄງການກໍ່ສ້າງແມ່ນເຫັນວ່າມີ ຂໍ້ຫຍຸ້ງຍາກຫຼາຍດ້ານເປັນຕົ້ນ: ການລະບາດຂອງພະຍາດໂຄວິດ-19, ນໍ້າມັນຂາດຕະຫຼາດ, ນໍ້າມັນແພງ, ອັດຕາເງິນເຟີ້ສູງເຊິ່ງເປັນສາເຫດເຮັດໃຫ້ການກໍ່ສ້າງພົບຄວາມຫຍຸ້ງຍາກ ແລະມີຄວາມຫຼ້າຊ້າ.

ຈາກນັ້ນ, ທັງສອງຝ່າຍແມ່ນໄດ້ເຊັນບົດບັນທຶກມອບ-ຮັບການກໍ່ສ້າງຮ່ວມກັນ. ຕາງໜ້າຝ່າຍລັດຖະບານໂດຍທ່ານ ນາງ ນວມຄຳ ຈັນທະບູລີ ຮອງຫົວໜ້າກົມສາມັນສຶກສາ, ຫົວໜ້າໂຄງການພັດທະນາການສຶກສາເພື່ອການຈ້າງງານ ແລະຕາງໜ້າຜູ້ຮັບເໝົາໂດຍທ່ານ ນາງ ຂັນແກ້ວ ນິດທະວົງ ປະທານບໍລິສັດໂຊກໄຊພັດທະນາກໍ່ສ້າງ. ໃນໂອກາດນີ້ທ່ານ ນາງ ນວມຄໍາ ຈັນທະບູລີ ກໍ່ໄດ້ກ່າວມອບອາຄານຮຽນ 5 ແຫ່ງ ໃຫ້ຂັ້ນເມືອງເພື່ອນຳໃຊ້ ແລະປົກປັກຮັກສາໃຫ້ເກີດປະໂຫຍດ ແລະ ສາມາດນຳໃຊ້.

ຂ່າວ: ບຸນນິກ 

แชร์