ເປີດງານເທສະການອາຫານ ແລະ ໝາກໄມ້ໄທ 2023

ສຳນັກງານສົ່ງເສີມການຄ້າໃນຕ່າງປະເທດທີ່ນະຄອນຫຼວງວຽງຈັນ ຮ່ວມກັບ ລິມປິງ ຊຸບເປີມາເກັດ ສາຂາໂພນສີນວນໄດ້ຈັດງານເທສະການອາຫານ ແລະໝາກໄມ້ໄທ 2023 Thai Food and Fruit Festival 2023 ພາຍໃຕ້ແນວຄິດ “Farm to Table” ໃນວັນທີ 14 ມິຖຸນາຜ່ານມາ,ເປັນກຽດເຂົ້າຮ່ວມຂອງທ່ານນາງ ມໍລະກົດ ສີສະຫວັດ ເອກອັກຄະລາຊະທູດໄທ ປະຈຳ ສປປ ລາວ, ທ່ານ ດາວອນ ພະຈັນທະວົງ ຮອງປະທານສະພາການຄ້າ ແລະອຸດສາຫະກຳແຫ່ງຊາດລາວ ພ້ອມດ້ວຍ ຄະນະທູດຕານຸທູດ ພາກລັດ ແລະ ພາກເອກະຊົນ ແລະແຂກທີ່ຖືກເຊີນເຂົ້າຮ່ວມ.

ທ່ານ ກະວິນ ວິຣິຍະພານິດ ຜູ້ອຳນວຍການສຳນັກງານສົ່ງເສີມການຄ້າໃນຕ່າງປະເທດທີ່ນະຄອນຫຼວງວຽງຈັນ ໄດ້ກ່າວວ່າ: ງານຄັ້ງນີ້ຈັດຂຶ້ນເປັນເວລາ 5 ວັນ(ວັນທີ 14-18 ມິຖຸນາ) ໂດຍໄດ້ຄັດສັນສິນຄ້າຈາກ ລິມປິງຊຸບເປີມາເກັດ ມາຈັດສ່ວນຫຼຸດຫຼາຍກວ່າ 30 ລາຍການ ໂດຍເນັ້ນກຸ່ມໝາກໄມ້ເປັນຫຼັກໃຫ້ຜູ້ເຂົ້າຮ່ວມງານໄດ້ສຳຜັດກັບຄວາມສົດໃໝ່ຈາກສວນ ສອດຄ່ອງກັບແນວຄິດ Farm to Table ເຊັ່ນ: ຖົ່ວລຽນ, ມັງຄຸດ, ໝາກມ່ວງ ແລະອື່ນໆ ນອກຈາກນີ້ຍັງມີອາຫານທະເລສົດໆ ພ້ອມສຳລັບປຸງແຕ່ງ ແລະ ສິນຄ້າອາຫານອື່ນໆທີ່ໜ້າສົນໃຈໃຫ້ທຸກທ່ານໄດ້ເລືອກຊື້ນອກຈາກນີ້ ການຈັດງານໃນຄັ້ງນີ້ຍັງມີກິດຈະກຳສຸດພິເສດຄື: ການນຳສະເໜີອາຫານກຸ່ມ Future Food ທີ່ມີໂປຣຕິນສູງ ໄດ້ແກ່: ຈີ່ນາຍທີ່ຜ່ານການລ້ຽງແບບອໍການິກມານຳສະເໜີເພື່ອເປັນທາງເລືອກໃຫ້ແກ່ຜູ້ບໍລິໂພກ ແລະການເປີດຄົວສະຖານທູດໄທ ທີ່ໄດ້ຮັບກຽດຈາກເອກອັກຄະລາຊະທູດໄທ ປະຈຳ ສປປ ລາວ ມາສາທິດການປຸງແຕ່ງອາຫານລົດຊາດຕາມແບບຕົ້ນສະບັບໄທໂດຍປຸງແຕ່ງດ້ວຍຜະລິດຕະພັນ ເຄື່ອງປຸງຕ່າງໆ ທີ່ຈຳໜ່າຍໃນລິມປິງ.

ການຈັດງານໃນຄັ້ງນີ້ນອກຈາກຈະເປັນການນຳສະເໜີສິນຄ້າລາຄາພິເສດໃຫ້ແກ່ຜູ້ບໍລິໂພກແລ້ວຍັງມີການຈັດກິດຈະກຳອື່ນໆສຳລັບເດັກນ້ອຍພາຍໃນງານເພື່ອໃຫ້ເກີດການມີສ່ວນຮ່ວມພາຍໃນຄອບຄົວ ດັ່ງນັ້ນ ຈຶ່ງຂໍຊວນເຊີນທຸກທ່ານເຂົ້າມາທ່ຽວຊົມງານ ແລະໃນເດືອນຕໍ່ໄປສຳນັກງານຍັງມີການຈັດງານ Thai Fair and Food Festival 2023 ທີ່ລິມປິງ ຊຸບເປີມາເກັດ ສາຂາວິວມໍ ລະຫວ່າງວັນທີ 5-9 ກໍລະກົດ 2023 ທີ່ຈະມີສິນຄ້າອຸປະໂພກອາຫານ ສຸຂະພາບ ຄວາມງາມ ມາໃຫ້ທຸກທ່ານໄດ້ເລືອກຊິມເລືອກຊື້ອີກເຊັ່ນກັນ.

แชร์