ຮ້ານອາຫານ ມູນເດີໄນ ບຸບເຟ້ທະເລເຜົາ ເນັ້ນຄວາມສະອາດຮອງຮັບແຂກພາຍໃນ ແລະຕ່າງປະເທດ

ຮ້ານອາຫານ ມູນເດີໄນ ບຸບເຟ້ທະເລເຜົາ ເປີດໃຫ້ບໍລິການອາຫານທະເລ ທີ່ມີຄຸນນະພາບ, ສົດ, ໃໝ່, ສະອາດຈາກປະເທດເພື່ອນບ້ານມື້ຕໍ່ມື້, ພ້ອມທັງເນັ້ນການບໍລິການດ້ວຍໃຈ, ວ່ອງ ໄວ, ຮັບປະກັນຄຸນນະພາບໂດຍເນັ້ນຄວາມສະອາດເປັນຫລັກເພື່ອຮອງຮັບລູກຄ້າທັງພາຍໃນ ແລະຕ່າງປະເທດໂດຍສະເພາະໃນປີ 2024 ຈະມາເຖິງນີ້, ສປປ ລາວ ຈະເປັນປະທານອາຊຽນກໍຄືເປັນເຈົ້າພາບຈັດກອງປະຊຸມສຳຄັນຕ່າງໆ, ລວມທັງເປີດປີທ່ອງທ່ຽວລາວ 2024 ທາງຮ້ານໄດ້ມີຄວາມພ້ອມຮອບດ້ານເພື່ອຮອງຮັບແຂກທັງພາຍໃນ ແລະຕ່າງປະເທດ ທີ່ຈະມາຊີມອາຫານໃນຮ້ານດັ່ງກ່າວ.

ທ່ານ ປະເສີດ ສິດທິພອນ ຜູ້ອຳນວຍການ ຮ້ານອາຫານມູນເດີໄນ ໄດ້ໃຫ້ສຳພາດເມື່ອບໍ່ດົນນີ້ວ່າ: ຮ້ານອາຫານ ມູນເດີໄນ ບຸບເຟ້ທະເລເຜົາ ຕັ້ງຢູ່ບ້ານຂຸນຕາທ່າ (ແຄມຂອງ) ເມືອງສີໂຄດຕະບອງ ນະຄອນ ຫລວງວຽງຈັນ, ເລີ່ມເປີດໃຫ້ບໍລິການ 15:30-23:00 ໂມງ, ມີອາຫານທະເລຫລາກຫລາຍປະເພດເປັນຕົ້ນກຸ້ງ, ຫອຍ, ປູ, ປາ, ປາໝຶກ, ກັ້ງ ແລະ ອື່ນໆອີກ. ພ້ອມນັ້ນ, ຍັງມີອາຫານຕາມສັ່ງປະເພດຕ່າງໆ, ມີເຄື່ອງດື່ມ ແລະ ຂອງຫວານ ໄວ້ບໍລິການລູກຄ້າເຊິ່ງບຸບເຟ້ ມີທັງແບບປີ້ງ ແລະຈຸ່ມ,ສາມາດຮອງຮັບລູກຄ້າໄດ້ເຕັມຮ້ານເຖິງ 500 ຄົນ. ນອກຈາກ, ເປີດໃຫ້ບໍລິການບຸບເຟ້ແລ້ວຍັງເປີດໃຫ້ບໍລິການອາຫານຕາມສັ່ງເລີ່ມແຕ່ 10:00 ໂມງເປັນຕົ້ນໄປພ້ອມທັງເປີດໃຫ້ບໍລິການຈັດງານລ້ຽງ, ງານດອງ ແລະງານສ້າງສັນຕ່າງໆ.

ທ່ານ ປະເສີດ ສິດທິພອນ ຍັງໃຫ້ຮູ້ອີກວ່າ: ຮ້ານອາຫານມູນເດີໄນເປີດໃຫ້ບໍລິການ ປີ 1990 ເລີ່ມຈາກເປັນຮ້ານເບຍ ມີພຽງ 4-5 ໂຕະ, ຈາກນັ້ນກໍໄດ້ຂະຫຍາຍຮ້ານມາເລື້ອຍໆ ແລະປັດຈຸບັນ ໄດ້ຂະຫຍາຍກິດຈະການຫລາຍບໍລິການເພື່ອເປັນທາງເລືອກແກ່ລູກຄ້າເຊັ່ນ: ບຸບເຟ້ລະເທເຜົາ, ອາຫານຕາມສັ່ງ, ຮັບຈັດງານລ້ຽງ ແລະ ງານດອງ. ທັງນີ້, ກໍເພື່ອຕອບສະໜອງໃຫ້ທັນກັບຄວາມຮຽກຮ້ອງຕ້ອງການຂອງສັງຄົມທີ່ມີຄວາມຕ້ອງການການບໍລິການທີ່ຫລາກຫລາຍ. ສະນັ້ນຈຶ່ງເຮັດໃຫ້ຮ້ານອາຫານມູນເດີໄນ ສາມາດດຳເນີນທຸລະກິດການບໍລິການ ໄດ້ມາຮອດປັດຈຸບັນ ແລະໃນອະນາຄົດ, ຮ້ານອາຫານມູນເດີໄນຈະສືບຕໍ່ປັບປຸງການບໍລິການຕ່າງໆ ໃຫ້ດີຂຶ້ນກວ່າເກົ່າເພື່ອຮອງຮັບແຂກທັງພາຍໃນ ແລະຕ່າງປະເທດທີ່ຈະເຂົ້າມາໃຊ້ບໍລິການພາຍໃນຮ້ານໃຫ້ໄດ້ຮັບປະທານອາຫານດ້ວຍຄວາມປະທັບໃຈ ແລະມີຄວາມສຸກ.

ຮ້ານອາຫານ ມູນເດີໄນ ບຸບເຟ້ທະເລເຜົາ ເລີ່ມເປີດໃຫ້ບໍລິການແຕ່ປີ 2020 ເປັນຕົ້ນມາເພື່ອຕອບສະໜອງໃຫ້ຄົນທີ່ມັກກິນອາຫານທະເລຢ່າງເຕັມອີ່ມເຊິ່ງມີສອງປະເພດລາຄາ ໃນນັ້ນ 219.000 ກີບຕໍ່ຄົນ ບໍ່ລວມເຄື່ອງດື່ມ ແລະລາຄາ 245.000 ກີບຕໍ່ຄົນ ແມ່ນລວມເຄື່ອງດື່ມ, ສຳລັບເດັກນ້ອຍຄວາມສູງ ບໍ່ເກີນ 0,90 ແມັດແມ່ນບໍ່ເສຍຄ່າ, ແຕ່ 0,91 - 1,30 ແມັດ ຈ່າຍ 50% ແລະ ຄວາມສູງ ແຕ່ 1,31 ແມັດ ຂຶ້ນໄປຈ່າຍໃນລາຄາເຕັມ. ສະເພາະບຸບເຟ້ທະເລຊ່ວງສວຍ ແມ່ນທາງຮ້ານຕັກເສີບໃຫ້ ຫລັງຈາກນັ້ນນັບແຕ່ເວລາ 15:30 ໂມງ ແມ່ນສາມາດຕັກໄດ້ເອງ. ພິເສດເຄື່ອງທະເລສົດທຸກປະເພດສາມາດຊື້ກັບບ້ານໄດ້ໂລລະ 190.000 ກີບ. ສຳລັບລູກຄ້າທ່ານໃດທີ່ສົນໃຈ ຢາກໄປກິນອາຫານອາທະເລ ສາມາດຕິດຕໍ່ໄດ້ທີ່ 020 55333373, 020 77227722 ແລະ 021 217073. ຂ່າວ-ພາບ: ກິດຕາ

แชร์