ສປປ ລາວ ເປັນເຈົ້າພາບກອງປະຊຸມຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”

ວັນທີ 13 ມິຖຸນາ 2023 ນີ້, ສະຖາບັນການຕ່າງປະເທດໄດ້ເປັນເຈົ້າພາບຈັດກອງປະຊຸມໜ່ວຍງານວິຊາການພາຍໃຕ້ເຄືອຂ່າຍຄັງປັນຍາອາຊີຕາເວັນອອກ, ໃນຫົວຂໍ້: ຂໍ້ລິເລີ່ມ “ໜຶ່ງແລວ, ໜຶ່ງເສັ້ນທາງ”: ການເປັນຄູ່ຮ່ວມເພື່ອສົ່ງເສີມການເຊື່ອມຈອດພາກພື້ນໂດຍການເປັນປະທານກ່າວເປີດກອງປະຊຸມຂອງ ທ່ານ ໄມ ໄຊຍະວົງ ຫົວໜ້າສະຖາບັນການຕ່າງປະເທດຊຶ່ງມີຜູ້ເຂົ້າຮ່ວມຈາກສະຖາບັນການຕ່າງປະເທດ, ຜູ້ຕາງໜ້າຈາກກະຊວງໂຍທາທິການ ແລະຂົນສົ່ງ, ນັກຄົ້ນຄວ້າຈາກບັນດາເຄືອຂ່າຍຄັງປັນຍາອາຊີຕາເວັນອອກ (NEAT) ອາຊຽນ+3.

ຈຸດປະສົງຂອງກອງປະຊຸມແມ່ນເພື່ອຮັບຟັງຄໍາຄິດຄໍາເຫັນ ແລະແລກປ່ຽນບົດຮຽນຂອງແຕ່ລະປະເທດໃນຂອບຂອງອາຊຽນ+3 ກ່ຽວກັບການຈັດຕັ້ງປະຕິບັດຂໍ້ລິເລີ່ມ “ໜຶ່ງແລວ, ໜຶ່ງເສັ້ນທາງ” ຜົນສຳເລັດໃນການຈັດຕັ້ງປະຕິບັດຜ່ານມາໂດຍສະເພາະຂໍ້ສະດວກ, ຂໍ້ຫຍຸ້ງຍາກ ແລະຂໍ້ສະເໜີແນະເພື່ອສົ່ງເສີມການເຊື່ອມໂຍງ ແລະ ເຊື່ອມຈອດພາກພື້ນ.

ທ່ານ ໄມ ໄຊຍະວົງ ໄດ້ຊີ້ໃຫ້ເຫັນຜົນສໍາເລັດຂອງການຮ່ວມມືໃນຂອບຂໍ້ລິເລີ່ມ“ໜຶ່ງແລວ, ໜຶ່ງເສັ້ນທາງ” ທີ່ຍົກຂຶ້ນໂດຍທ່ານ ປະທານ ສີ ຈິ້ນຜິງ ໃນປີ 2013 ຊຶ່ງໃນໄລຍະ 10 ປີຜ່ານມາຂໍ້ລິເລີ່ມດັ່ງກ່າວ ໄດ້ປະກອບສ່ວນອັນສໍາຄັນເຂົ້າໃນການປັບປຸງພື້ນຖານໂຄງລ່າງ, ສ້າງວຽກເຮັດງານທໍາ, ສົ່ງເສີມການເຊື່ອມໂຍງ ແລະເຊື່ອມຈອດໃນພາກພື້ນ ແລະ ສາກົນ, ເຮັດໃຫ້ການໄປມາຫາສູ່ກັນຂອງປະຊາຊົນ ແລະ ການຂົນສົ່ງສິນຄ້າມີຄວາມສະດວກສະບາຍ ແລະວ່ອງໄວຫຼາຍຂຶ້ນ, ສຳລັບ ສປປ ລາວແມ່ນໜຶ່ງໃນບັນດາປະເທດທີ່ໃຫ້ການສະໜັບສະໜູນຂໍ້ລິເລີ່ມດັ່ງກ່າວຕັ້ງແຕ່ຫົວທີ,ເສັ້ນທາງລົດໄຟລາວ-ຈີນແມ່ນໂຄງການທີ່ມີລັກສະນະປະຫວັດສາດ ແລະ ຍຸດທະສາດທີ່ເກີດຂຶ້ນພາຍໃຕ້ຂໍ້ລິເລີ່ມ “ໜຶ່ງແລວ, ໜຶ່ງເສັ້ນທາງ” ໄດ້ເຮັດໃຫ້ ສປປ ລາວ ຫັນປ່ຽນຈາກປະເທດທີ່ບໍ່ມີຊາຍແດນຕິດຈອດກັບທະເລ,ກາຍເປັນປະເທດເຊື່ອມຈອດພາກພື້ນ ແລະສາກົນ.

ກອງປະຊຸມປະກອບດ້ວຍ 2 ວາລະ ໂດຍທ່ານຫົວໜ້າສະຖາບັນການຕ່າງປະເທດ ແລະຮອງຫົວໜ້າສະຖາບັນການຕ່າງປະເທດໄດ້ຜັດປ່ຽນກັນເປັນຜູ້ນໍາພາກອງປະຊຸມ ຊຶ່ງມີຜູ້ຕາງໜ້າຈາກເຄືອຂ່າຍຄັງປັນຍາອາຊີຕາເວັນອອກ (NEAT) ອາຊຽນ+3 ຜັດປ່ຽນກັນນໍາສະເໜີບົດ, ສຳລັບ ສປປ ລາວ ໄດ້ຍົກໃຫ້ເຫັນບົດຮຽນໃນການຈັດຕັ້ງປະຕິບັດ ຂໍ້ລິເລີ່ມ “ໜຶ່ງແລວ, ໜຶ່ງເສັ້ນທາງ” ໂດຍສະເພາະຂໍ້ສະດວກ, ຂໍ້ຫຍຸ້ງຍາກ ແລະຂໍ້ສະເໜີແນະ, ສ່ວນໃຫຍ່ແມ່ນໄດ້ຕີລາຄາສູງຕໍ່ຜົນສຳເລັດຂອງການຈັດຕັ້ງປະຕິບັດຂໍ້ລິເລີ່ມ “ໜຶ່ງແລວ, ໜຶ່ງເສັ້ນທາງ” ທີ່ຍາດມາໄດ້ໃນໄລຍະ 10 ປີຜ່ານມາ ຊຶ່ງໄດ້ປະກອບສ່ວນສໍາຄັນໃນການປັບປຸງພື້ນຖານໂຄງລ່າງຂອງບັນດາປະເທດໃນແລວທາງດັ່ງກ່າວ, ເຮັດໃຫ້ການໄປມາຫາສູ່ກັນ ແລະການຂົນສົ່ງສິນຄ້າຂອງບັນດາປະເທດໃນພາກພື້ນມີຄວາມສະດວກວ່ອງໄວຊຶ່ງກາຍເປັນປັດໄຈອັນສໍາຄັນໃນການດຶງດູດການລົງທຶນຈາກພາຍນອກ, ເຖິງຢ່າງໃດກໍຕາມການປະຕິບັດຂໍ້ລິເລີ່ມ “ໜຶ່ງແລວ, ໜຶ່ງເສັ້ນທາງ” ຢູ່ບາງປະເທດຍັງພົບຄວາມຫຍຸ້ງຍາກຍ້ອນປັດໄຈພາຍໃນ ແລະສະພາບການພາຍນອກທີ່ສືບຕໍ່ຜັນແປໄປຢ່າງສັບສົນ.

(ຂ່າວ-ພາບ: ກະຊວງຕ່າງປະເທດ)

แชร์