ມວນຊົນ 1.000 ກວ່າຄົນ ເຂົ້າຮ່ວມສະຫຼອງວັນຜູ້ບໍລິຈາກເລືອດໂລກ

ວັນທີ 14 ມິຖຸນາ ແມ່ນວັນຜູ້ບໍລິຈາກເລືອດໂລກ (World Blood Donor Day) ທຸກໆປີປະເທດຕ່າງໆໃນທົ່ວໂລກໄດ້ສະເຫຼີມສະຫຼອງວັນຜູ້ບໍລິຈາກເລືອດໂລກ (WBDD). ກິດຈະກຳດັ່ງກ່າວເປັນການປຸກຈິດສຳນຶກເຖິງຄວາມຈຳເປັນຂອງເລືອດ ແລະຜະລິດຕະພັນເລືອດທີ່ປອດໄພ ແລະເປັນການຂອບໃຈຜູ້ບໍລິຈາກເລືອດທີ່ສະໝັກໃຈ.

ສໍາລັບຢູ່ ສປປ ລາວ, ສະຖາບັນເລືອດແຫ່ງຊາດໄດ້ຈັດກິດຈະກໍາສະເຫຼີມສະຫຼອງວັນຜູ້ບໍລິຈາກເລືອດໂລກຢູ່ທີ່ສູນການຄ້າລາວ-ໄອເຕັກມໍ ໂດຍການເຂົ້າຮ່ວມຂອງ ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ, ຮອງປະທານຄະນະກຳມະການສົ່ງເສີມການບໍລິຈາກເລືອດ-ສົ່ງເລືອດແຫ່ງຊາດ ແລະມີຫຼາຍພາກສ່ວນເຂົ້າຮ່ວມ ປະມານ 1.000 ກວ່າຄົນ; ຄາດວ່າຈະໄດ້ຮັບບໍລິຈາກເລືອດຫຼາຍກວ່າ 500 ຖົງ.

ໃນປີ 2022 ສະຖາບັນເລືອດແຫ່ງຊາດ ແລະສູນເລືອດແຂວງໃນຂອບເຂດທົ່ວປະເທດໄດ້ຮ່ວມກັນປຸກລະດົມ ແລະຈັດຮັບບໍລິຈາກເລືອດ ໄດ້ 67.017 ຖົງ ໃນນີ້, ຢູ່ສູນກາງໄດ້ 31.543 ຖົງ ແລະຢູ່ທ້ອງຖິ່ນໄດ້ 35.747 ຖົງ, ຖ້າທຽບໃສ່ແຜນການປີທົ່ວປະເທດສາມາດປະຕິບັດບັນລຸໄດ້ 104,71%(ລື່ນແຜນການ 4,71% ເທົ່າກັບ 3.017 ຖົງ) ໂດຍນໍາໃຊ້ງົບປະມານໄປທັງໝົດ 50 ຕື້ກວ່າກີບ.

ສຳລັບຄາດໝາຍສູ້ຊົນໃນປີ 2023 ນີ້, ອົງການກາແດງສືບຕໍ່ນໍາພາການເມືອງແນວຄິດພະນັກງານ-ລັດຖະກອນ ແລະອາສາສະໝັກ, ປັບປຸງການຈັດຕັ້ງໃຫ້ເຂັ້ມແຂງ,ມີແບບແຜນວິທີເຮັດວຽກທີ່ມີປະສິດທິຜົນ, ປັບປຸງນິຕິກໍາຂອງອົງການກາແດງແຫ່ງຊາດລາວ ແລະເຜີຍແຜ່ໃຫ້ທົ່ວເຖິງ, ສົ່ງເສີມພະນັກງານເພດຍິງເຂົ້າໃນຕຳແໜ່ງນໍາພາຄຸ້ມຄອງໃຫ້ໄດ້ 5%, ສູ້ຊົນໃຫ້ມີແຫລ່ງທຶນ ແລະອຸປະກອນແຮໄວ້ເພື່ອຊ່ວຍເຫລືອບັນເທົາທຸກ, ປຸກລະດົມຂົນຂວາຍຜູ້ບໍລິຈາກເລືອດໃຫ້ໄດ້ 73.000 ຖົງ ໃນນັ້ນສະຖາບັນເລືອດແຫ່ງຊາດໃຫ້ໄດ້ 30.520 ຖົງ ແລະສູນເລືອດແຂວງໃຫ້ໄດ້ 42.480 ຖົງ.

แชร์