ພົບການລັກລອບຊື້-ຂາຍ ສັດປ່າຄຸ້ມຄອງ ແລະສັດສະຫງວນຢູ່ເມືອງຍົມມະລາດ

ໜ່ວຍງານກວດກາປ່າໄມ້ ຫ້ອງການກະສິກຳ ແລະ ປ່າໄມ້ເມືອງຍົມມະລາດ ແຂວງຄຳມ່ວນ ໄດ້ລົງກວດກາຕະຫຼາດບ້ານໂຄກສະຫວ່າງ ເມືອງຍົມມະລາດ ໃນວັນທີ 7 ມິຖຸນາຜ່ານມາຜົນການກວດກາໄດ້ພົບເຫັນການລັກລອບຊື້-ຂາຍສັດປ່າຄຸ້ມຄອງ ແລະສັດສະຫງວນທີ່ຜິດຕໍ່ລະບຽບກົດໝາຍສັດນໍ້າ-ສັດປ່າ ຈໍານວນ 13 ໂຕ ມີນໍ້າໜັກລວມທັງໝົດ 9,5 ກິໂລກຼາມ ແລະຊີ້ນສ່ວນໂຕແລນ 1,5 ກິໂລ ໃນນັ້ນມີສັດປ່າທີ່ຍັງເປັນຈຳນວນ 3 ໂຕ ນໍ້າໜັກລວມ 5,5 ກິໂລລາຍ ລະອຽດມີດັ່ງນີ້: ກວດພົບແລນ (ຍັງເປັນ), ກະຮອກ (ຕາຍ) ຈຳນວນ 7 ໂຕ ນໍ້າໜັກ 2 ກິໂລ, ແລະກະແຕ(ຕາຍ) ຈຳນວນ 0,5 ກິໂລ ສ່ວນເຈົ້າຂອງສັດປ່າແມ່ນໄດ້ລົບໜີໄປທາງທີມງານເຈົ້າໜ້າທີ່ກວດກາປ່າໄມ້ກໍ່ໄດ້ເຮັດບົດບັນທຶກອາຍັດໄວ້ ແລະນຳມາເກັບຮັກສາໃວ້ທີ່ຫ້ອງ ການກະສິກຳ ແລະປ່າໄມ້ເມືອງ.

ຫຼັງຈາກນັ້ນໃນວັນທີ 9 ມິຖຸນາ 2023 ທາງຫ້ອງການກະສິກຳ ແລະປ່າໄມ້ເມືອງ ໄດ້ຈັດພິທີທຳລາຍ ແລະປ່ອຍຄືນສູ່ທຳມະຊາດໂດຍໄດ້ເຊີນບັນດາຫ້ອງການອ້ອມຂ້າງເມືອງ ແລະພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພະຍານ. ຊີ້ນສ່ວນສັດທີ່ຕາຍແລ້ວແມ່ນໄດ້ນຳມາທຳລາຍດ້ວຍວິທີການຝັງດິນສ່ວນແລນທີ່ຍັງເປັນນັ້ນແມ່ນໄດ້ນຳເອົາໄປປ່ອຍຄືນສູ່ທຳມະຊາດ. ພິທີດັ່ງກ່າວເຂົ້າຮ່ວມໂດຍ ທ່ານ ຄູນສີ ແສງດາລາ ຮອງເລຂາພັກເມືອງ, ພ້ອມດ້ວຍ ທ່ານ ບຸນທະໄຫວ ໂດໄລສານ ຮອງເຈົ້າເມືອງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.

แชร์