ອາຍຸເປັນພຽງຕົວເລກ! ອີລອນມັສ ຈ້າງເດັກອັດສະລິຍະ ອາຍຸພຽງ 14 ປີ ຮ່ວມທິມຊັອຟແວຣ໌ SpaceX

ບໍລິສັດ ສະເປດ ເອັກຊ໌ (SpaceX) ຜູ້ຜະລິດຍານອາວະການຍັກໃຫຍ່ ຊຶ່ງເຈົ້າຂອງແມ່ນ ອີລອນມັສ, ເສດຖີອັນດັບໜຶ່ງຂອງໂລກໃນປັດຈຸບັນໄດ້ຮັບພະນັກງານໃໝ່ອາຍຸພຽງ 14 ປີເທົ່ານັ້ນ ເຂົ້າມາເຮັດວຽກຮ່ວມກັບທິມວິສະວະກໍາຊັອຟແວຣ໌ຂອງບໍລິສັດ.

ຊຶ່ງເດັກນ້ອຍຄົນນີ້ ຊື່ວ່າ: ໄຄຣານ ຄວາຊີ (Kairan Quazi) ເປັນເດັກອັດສະລິຍະທີ່ມີຄວາມຄິດ ແລະໄອເດຍຂ້ອນຂ້າງເກັ່ງ,ຊຶ່ງຈົບການສຶກສາຈາກມະຫາວິທະຍາໄລ ຊານຕາ ຄລາຣາ (Santa Clara University) ດ້ານວິສະວະກໍາສາດ ແລະເປັນນັກສຶກສາທີ່ມີອາຍຸນ້ອຍທີ່ສຸດຂອງວິທະຍາໄລດັ່ງກ່າວ. ນອກນັ້ນ, ເຂົາຍັງເຄີຍຝຶກງານດ້ານປັນຍາປະດິດ ຫຼືເອໄອ ກັບບໍລິສັດ Intel Labs ນຳອີກ.

ເສັ້ນທາງຊີວິດຂອງ ໄຄຣານ ຄວາຊີ ຖືວ່າບໍ່ທໍາມະດາ, ເພາະເຂົາສາມາດເວົ້າໄດ້ຢ່າງຄ່ອງແຄ້ວໄດ້ຕັ້ງແຕ່ອາຍຸ 2 ປີ ແລະເປັນຄົນມັກເລົ່າເລື່ອງຂ່າວທີ່ໄດ້ຍິນຜ່ານວິທະຍຸ ໃຫ້ເພື່ອນຮ່ວມຫ້ອງ ແລະຄູອາຈານໃນໂຮງຮຽນອະນຸບານຟັງປະຈໍາ. ເມື່ອຄວາມອັດສະລິຍະຂອງເດັກນ້ອຍຄົນນີ້ ໄດ້ພັດທະນາຢ່າງກ້າວກະໂດດ, ພໍ່ແມ່ຂອງເຂົາສົ່ງໄປຮຽນໃນວິທະຍາໄລຊຸມຊົນໃນຄາຣິຟໍເນຍໃນອາຍຸພຽງ 9 ປີເທົ່ານັ້ນ ແລະປີດຽວກັນ, ເຂົາກໍ່ຖຶກປະເມີນຈາກນັກວິທະຍາສາດວ່າ: ລາວມີຄວາມສາມາດທາງດ້ານມັນສະໝອງ (IQ) ຢ່າງຫຼວງຫຼາຍ.

ຫຼ້າສຸດ, ໄຄຣານ ຄວາຊີ ໄດ້ໂພສຂໍ້ຄວາມຜ່ານບັນຊີ LinkedIn ຂອງຕົນເມື່ອວັນທີ 8 ມິຖຸນາ 2023 ວ່າ: ຂ້ອຍຕ້ອງການເຮັດວຽກກັບບໍລິສັດທີ່ໂດ່ງດັງທີ່ສຸດໃນໂລກ ແລະເຮັດໃຫ້ ອີລອນມັສ ສົນໃຈເດັກນ້ອຍຄົນນີ້ແລ້ວດຶງເຂົາມາຮ່ວມທິມວິສະວະກໍາຂອງສະເປດເອັກຊ໌.

ທີ່ມາ: Target magazine

แชร์