ພົນເອກ ຈັນສະໝອນ ຈັນຍາລາດ ຕ້ອນຮັບຄະນະຜູ້ແທນແຫ່ງ ສ ຣັດເຊຍ

ເມື່ອບໍ່ດົນມານີ້, ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ ໄດ້ຕ້ອນຮັບ ທ່ານ ໂດຣບືເຊັຟ ອັນເດຣ ອາເລັກຊານໂດຣວິດ ທີ່ປຶກສາຄະນະອຳນວຍການ ບໍລິສັດ ອູຣານຄີມຈຳກັດ ແຫ່ງ ສ ຣັດເຊຍ ພ້ອມດ້ວຍຄະນະ, ເນື່ອງໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 4-8 ມິຖຸນາຜ່ານມາ.

ໂອກາດນີ້, ທ່ານ ພົນເອກ ຈັນສະໝອນ ຈັນຍາລາດ ໄດ້ກ່າວສະແດງຄວາມຍິນດີຕ້ອນຮັບ ແລະຕີລາຄາສູງຕໍ່ການເດີນທາງມາຢ້ຽມຢາມ ແລະເຮັດວຽກຢູ່ ສປປ ລາວ ໃນຄັ້ງນີ້ ຖືເປັນການເສີມຂະຫຍາຍການຮ່ວມມືອັນເປັນມູນເຊື້ອທີ່ມີມາແຕ່ດົນນານ ແລະ ເປັນການສືບຕໍ່ເພີ່ມທະວີຮັດແໜ້ນການພົວພັນຮ່ວມມື ແລະເສີມຂະຫຍາຍສາຍພົວພັນມິດຕະພາບລະຫວ່າງສອງຊາດ ໃຫ້ນັບມື້ແໜ້ນແຟ້ນຈະເລີນງອກງາມຍິ່ງໆຂຶ້ນ, ຕະຫຼອດໄລຍະທີ່ຜ່ານມາ ສ ຣັດເຊຍ ໄດ້ໃຫ້ການຊ່ວຍເຫຼືອອັນລໍ້າຄ່າແກ່ ສປປ ລາວ ກໍຄືກອງທັບປະຊາຊົນລາວໃນຫຼາຍດ້ານ, ຫວັງວ່າໃນອະນາຄົດຈະສືບຕໍ່ໃຫ້ການຊ່ວຍເຫຼືອ ໂດຍສະເພາະວຽກງານປ້ອງກັນຊາດ ເພື່ອເຮັດໃຫ້ກອງທັບປະຊາຊົນລາວມີບາດກ້າວພັດທະນາຂຶ້ນ ແລະກາຍເປັນກອງທັບທີ່ທັນສະໄໝໃນຕໍ່ໜ້າ.

ທ່ານ ໂດຣບືເຊັຟ ອັນເດຣ ອາເລັກຊານໂດຣວິດ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະສະໜິດສະໜົມທີ່ເຕັມໄປດ້ວຍໄມຕີຈິດມິດຕະພາບອັນຈົບງາມຂອງທ່ານລັດຖະມົນຕີກະຊວງປ້ອງກັນປະເທດໃນຄັ້ງນີ້, ພ້ອມດຽວກັນນີ້ຍັງໄດ້ແຈ້ງຜົນຂອງການພົບປະສອງຝ່າຍຮ່ວມກັບທ່ານ ພົນຕີ ວົງຄຳ ພົມມະກອນ ຮອງລັດຖະມົນຕີກະຊວງປ້ອງກັນປະເທດໃຫ້ທ່ານລັດຖະມົນຕີກະຊວງປ້ອງກັນປະເທດໄດ້ຮັບຊາບຕື່ມອີກ.
ທີ່ມາ: ກະຊວງປ້ອງກັນປະເທດ

• 12/06/2023