ທ່ານ ລີປ່າວ ຢ່າງ ຮອງລັດຖະມົນຕີ ກະຊວງແຮງງານ ແລະສະຫວັດດີການສັງຄົມ(ຮສສ) ໄດ້ກ່າວວ່າ: ການຈັດສົ່ງເຂົ້າສານຈະເລີ່ມຈັດຕັ້ງປະຕິບັດໃນເດືອນກໍລະກົດ ຫາ ກັນຍາ 2023 ເພື່ອຊ່ວຍເຫລືອຜູ້ດ້ອຍໂອກາດທີ່ບໍ່ສາມາດເຂົ້າເຖິງການຄໍ້າປະກັນດ້ານສະບຽງອາຫານ. ນອກຈາກນີ້, ຍັງເຮັດໃຫ້ກະຊວງ ຮສສ ບັນລຸຕົວຊີ້ວັດໃນແຜນວຽກຈຸດສຸມກ່ຽວກັບການປັບປຸງລະບົບສະຫວັດດີການສັງຄົມໃຫ້ກຸ່ມຜູ້ດ້ອຍໂອກາດໃຫ້ສາມາດເຂົ້າເຖິງການບໍລິການສັງຄົມສົງເຄາະທີ່ມີປະສິດທິພາບດີຂຶ້ນ ເຊິ່ງການຊ່ວຍເຫລືອດັ່ງກ່າວ, ເປັນການປະກອບສ່ວນສຳຄັນ ໃຫ້ລັດຖະບານລາວ ໃນການແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າໂດຍສອດຄ່ອງຕາມແນວທາງນະໂຍບາຍຂອງພັກ ແລະລັດຖະບານທີ່ກຳນົດໄວ້.

 

ເປົ້າໝາຍຂອງການຊ່ວຍເຫລືອແມ່ນອີງໃສ່ຄະແນນຊີ້ວັດຈາກຄວາມປອດໄພດ້ານສະບຽງອາຫານຂອງປະຊາກອນ, ການຂາດສານອາຫານ ແລະຄວາມທຸກຍາກ, ລວມທັງພື້ນທີ່ທີ່ມີໄພອຶດຫິວທີ່ລະບຸໂດຍລັດຖະບານ ແລະ ການກວດສອບຄວາມປອດໄພດ້ານອາຫານທີ່ມີຄວາມຖີ່ສູງ ຂອງອົງການອາຫານໂລກ ເຊິ່ງກຳນົດວ່າແຕ່ລະ ຄົນທີ່ອາໄສຢູ່ພາຍໃນພື້ນທີ່ເປົ້າໝາຍຈະໄດ້ຮັບເຂົ້າສານ ຈຳນວນ 8,4 ກິໂລກຣາມ,ການຊ່ວຍເຫລືອດ້ານສະບຽງອາຫານນີ້, ຈະຊ່ວຍໃຫ້ຫລຸດຊ່ອງວ່າງໃນການຂາດອາຫານແກ່ຄອບຄົວທີ່ມີຄວາມສ່ຽງສູງ ໂດຍສະເພາະໃນລະດູຝົນ ຫລືລະດູຂາດແຄນອາຫານເນື່ອງຈາກເຂົ້າທີ່ສະສົມໄວ້ບໍ່ພຽງພໍທີ່ຈະຊ່ວຍໃຫ້ຮອດລະດູການເກັບກ່ຽວ. ນອກຈາກນີ້, ການຊ່ວຍເຫລືອດັ່ງກ່າວຈະຊ່ວຍໃຫ້ບັນດາຄອບຄົວຮັບມືກັບຄ່າໃຊ້ຈ່າຍໃນການດຳລົງຊີວິດທີ່ນັບມື້ນັບສູງຂຶ້ນເຊິ່ງມີປັດໄຈມາຈາກອັດຕາເງິນເຟີ້, ຜົນກະທົບທາງເສດຖະກິດ ທີ່ສືບເນື່ອງມາຈາກການລະບາດຂອງພະຍາດ ໂຄວິດ-19.

 

ທ່ານ ຢານ ເດວບາເຣີ ຜູ້ອຳນວຍການ ແລະຕາງໜ້າອົງການອາຫານໂລກປະຈຳ ສປປ ລາວ ກ່າວວ່າ: ໃນຖານະເປັນອົງການມະນຸດສະທຳທີ່ໃຫຍ່ທີ່ສຸດໃນໂລກ ແມ່ນໜ້າທີ່ຂອງພວກເຮົາ ເພື່ອໃຫ້ແນ່ໃຈວ່າປະຊາຊົນມີອາຫານພຽງພໍໃນເວລາທີ່ເກີດວິກິດການຕ່າງໆ. ດັ່ງທີ່ຮູ້ນຳກັນແລ້ວວ່າປັດຈຸບັນ 60% ຂອງປະຊາຊົນລາວ ກຳລັງຫາທຸກວິທີທາງໃນການຮັບມື ເພື່ອຫາລາຍຮັບເພື່ອມາຈຸນເຈືອຄອບຄົວ; 16% ຂອງປະຊາກອນໃນເຂດຊົນນະບົດແມ່ນຜະເຊີນກັບບັນຫາດ້ານຄວາມບໍ່ໝັ້ນຄົງດ້ານອາຫານຕ້ອງສະໜັບສະໜູນຊ່ວຍເຫລືອຢ່າງຮີບດ່ວນເພື່ອຊ່ວຍໃຫ້ພວກເຂົາສາມາດ ກັບມາລຸກຂຶ້ນຢືນໄດ້ອີກຄັ້ງຫລັງຈາກຜະເຊີນກັບສົ່ງທ້າທາຍໃນໄລຍະທີ່ຜ່ານມາ ກ່ອນທີ່ເສດຖະກິດຂອງປະເທດຈະກັບມາຟື້ນໂຕອີກຄັ້ງ.

ຂ່າວ: ກິດຕາ