ສື່ມວນຊົນ ລາວ-ຈີນ ຮ່ວມສໍາພາດການປະຕິບັດຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”

ໃນວັນທີ 6 ມິຖຸນາ 2023 ສື່ມວນຊົນລາວ ຈາກຂະແໜງການຕ່າງໆ ອ້ອມຂ້າງສູນກາງ ຮ່ວມກັບ ສື່ມວນຊົນ ຈາກ ສປ ຈີນ ກໍຄື ໜັງສືພິມປະຊາຊົນລາຍວັນຈີນ ຈັດພິທີ ສຳພາດ ກ່ຽວກັບການຈັດຕັ້ງປະຕິບັດ ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ທີ່ນະຄອນຫຼວງວຽງຈັນ ໂດຍເຂົ້າຮ່ວມຂອງທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ, ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ທັງເປັນຫົວໜ້າບັນນາທິການໃຫຍ່ໜັງສືພິມປະຊາຊົນ, ທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວແຫ່ງ ສປປ ລາວ, ທ່ານສະຖານທູດຈີນ ປະຈໍາ ສປປ ລາວ, ມີຜູ້ຕາງໜ້າຈາກສື່ສິ່ງພິມ, ວິທະຍຸ ແລະໂທລະພາບເຂົ້າຮ່ວມ.

ທ່ານ ສະຫວັນຄອນ ຣາຊມຸນຕຣີ ໄດ້ແລກປ່ຽນຄວາມຄິດເຫັນຕໍ່ຜົນສໍາເລັດການຮ່ວມມືໃນການປະຕິບັດຂໍ້ລິເລີ່ມ ໜຶ່ງແລວໜຶ່ງເສັ້ນທາງລະຫວ່າງ ສອງຊາດ ລາວ-ຈີນ ວ່າ: ການສ້າງພື້ນຖານໂຄງລ່າງໃນການສັນຈອນ ກໍ່ຄື ການຄົບຄ້າສະມາຄົມຂອງມວນມະນຸດ ແມ່ນປັດໄຈໜຶ່ງທີ່ສໍາຄັນ ແລະເປັນສິ່ງຈໍາເປັນທີ່ສຸດໃນຊີວິດປະຈໍາວັນ ໃນນັ້ນ ທ່ານໄດ້ຍົກເອົາ 3 ເນື້ອໃນມາແລກປ່ຽນ ຄື:1) ສື່ມວນຊົນລາວມີພາລະບົດໃນການກະຈາຍຂໍ້ມູນຂ່າວສານສູ່ສັງຄົມທັງພາຍໃນ ແລະ ຕ່າງປະເທດ; 2) ຄວາມສໍາເລັດໃນການຮ່ວມມືລາວ-ຈີນ ໂດຍສະເພາະ ແມ່ນການປະຕິບັດ ໜຶ່ງແລວໜຶ່ງເສັ້ນທາງຢູ່ ສປປ ລາວ; 3) ການຮ່ວມມືລະຫວ່າງສື່ມວນຊົນລາວ ແລະ ສື່ມວນຊົນຈີນ.

ທ່ານ ວັນໄຊ ຕະວິນຍານ ໄດ້ໃຫ້ສໍາພາດວ່າ: ໃນໄລຍະ 10 ປີຜ່ານມາ, ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ໄດ້ສ້າງໂອກາດ ແລະຜົນປະໂຫຍດຢ່າງໃຫຍ່ຫຼວງໃຫ້ແກ່ປະເທດຕ່າງໆໃນໂລກ. ທັງສ້າງສາຍພົວພັນຄູ່ຮ່ວມມື ທີ່ໃກ້ຊິດກວ່າເກົ່າ, ຍຶດໝັ້ນການເດີນຕາມເສັ້ນທາງທີ່ສາມັກຄີ ແລະຮ່ວມກັນ, ເຊື່ອມຈອດກັນ ແລະ ພັດທະນາຮ່ວມກັນ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ. ທັງໝົດນີ້ ກໍເພື່ອຮັບປະກັນຜົນປະໂຫຍດຂອງຊາດ ກໍຄື ການພົວພັນລະຫວ່າງສອງຊາດ ລາວ-ຈີນ ໃຫ້ປະສົບຜົນສຳເລັດໃນທຸກໆດ້ານຢ່າງຈົບງາມ. ໃນນາມສື່ມວນຊົນ ກໍຄື ໜັງສືພິມປະຊາຊົນສຽງຂອງສູນກາງພັກ ໃນໄລຍະຜ່ານມາ ແມ່ນເຫັນດີ ແລະສະໜັບສະໜູນຢ່າງເຕັມທີ່ ສະແດງອອກຢູ່ບ່ອນວ່າ: ໄດ້ນໍາເອົາຂໍ້ລິເລີ່ມໜຶ່ງແລວໜຶ່ງເສັ້ນທາງມານໍາສະເໜີ ອອກຂ່າວທາງໜັງສືພິມ,ເຟສບຸກ,ເວບໄຊ ນັບແຕ່ ສປ ຈີນມີການອອກນະໂຍບາຍນີ້ເປັນຕົ້ນມາ,ພ້ອມທັງໄດ້ຊີ້ແຈງອະທິບາຍໃຫ້ປະຊາຊົນລາວຮັບຮູ້ ແລະ ເຂົ້າໃຈຢ່າງກວ້າງຂວາງ.

        ທ່ານ Ma Xiaoning ຫົວໜ້າບັນນາທິການໃຫຍ່ ໜັງສືພິມປະຊາຊົນປະຈໍາວັນສາກົນແຫ່ງປະເທດຈີນ ກ່າວວ່າ: ຈຸດປະສົງຂອງການສໍາພາດຮ່ວມກັນຄັ້ງນີ້ ແມ່ນເພື່ອສະແດງໃຫ້ປະຊາຊົນຈີນທົ່ວປະເທດເຫັນຮູບພາບທີ່ສວຍງາມອັນພົ້ນເດັ່ນຂອງປະເທດລາວ ແລະ ກໍ່ເປັນການສະແດງເຖີງເລື່ອງເລົ່າຕ່າງໆຂອງ ສປ.ຈີນ ເພື່ອເຮັດໃຫ້ສອງຊາດລາວ-ຈີນ ສາມາດເຊື່ອມໂຍງ ແລະ ກົມກຽວໃນການພັດທະນາຕາມຄວາມມຸ່ງມາດປາຖະໜາຂອງຕົນ ເພື່ອນໍາເອົາຜົນປະໂຫຍດສູງສຸດມາໃຫ້ປະຊາຊົນສອງຊາດ. ຂ້າພະເຈົ້າເຊື່ອວ່າສື່ມວນຊົນລາວ-ຈີນ  ຈະຄົ້ນເຫັນໃນດ້ານຂຽນຂ່າວລາຍງານກ່ຽວກັບການຮ່ວມມືແບບຄູ່ຮ່ວມຍຸດທະສາດທີ່ສຳຄັນ ແລະມີຄວາມໝາຍເປັນຢ່າງຍິ່ງຮອບດ້ານອັນປະເສີດລະຫວ່າງສອງປະເທດໃຫ້ຈະແຈ້ງຕື່ມ, ເພື່ອໄດ້ຮັບປະສິດທິຜົນຫຼາຍຂຶ້ນ ແລະສາມາດເຫັນພາບໃນການດໍາລົງຊີວິດການເປັນຢູ່ທີ່ມີຄວາມສຸກປະຊາຊົນສອງປະເທດໃຫ້ເປັນອັນທີ່ດຶງດູດມວນຊົນເຂົ້າອ່ານ.

ພາຍຫຼັງຈົບພິທີທາງການແລ້ວ, ສື່ມວນຊົນຂອງ 2 ປະເທດ ລາວ-ຈີນ ກໍ່ໄດ້ສໍາພາດໂຄງການພັດທະນາກວມລວມໄຊເສດຖານະຄອນຫຼວງວຽງຈັນ ກ່ຽວກັບ ໂຄງການຮ່ວມມືດໍາເນີນຂໍ້ປະຕິບັດ “ໜຶ່ງແລວໜຶ່ງເສັ້ນທາງ ”ເພື່ອແນ່ໃສ່ເອົາຜົນປະໂຫຍດມາສູ່ປະຊາຊົນຂອງສອງຊາດ ລາວ-ຈີນ ເພື່ອໄດ້ຮັບສິດທິຜົນເຊິ່ງກັນ ແລະ ກັນ. ໂດຍໃນປີນີ ສປ ຈີນ ໄດ້ສະເໜີໂຄງການຮ່ວມມືດໍາເນີນຂໍ້ປະຕິບັດ “ໜຶ່ງແລວໜຶ່ງເສັ້ນທາງ ”ຄົບຮອບ 10 ປີແລ້ວ ເນື່ອງຈາກວ່າໄດ້ຮັບການເອົາໃຈໃສ່ຊີ້ນໍານໍາພາຂອງພັກ, ລັດຖະບານສອງປະເທດໃນການແຕ້ມແຜນຍຸດທະສາດການພັດທະນາແບບຮອບດ້ານ,  ຈຶ່ງເຮັດໃຫ້ປະຊາຊົນສອງຊາດລາວ-ຈີນ ມີຄວາມໄວ້ເນື້ອເຊື່ອໃຈ ແລະເຄົາລົບເຊິ່ງກັນ ແລະກັນ ເຊີ່ງມັນສະແດງເຫັນເຖິງໝາກຜົນການຊຸກຍູ້ສົ່ງເສີມທີ່ເປັນທ່າແຮງດ້ານແນວຄິດການເມືອງ, ແລວທາງເສດຖະກິດ  , ດ້ານການລາຍງານຂ່າວຕ່າງໆໃນໜັງສືພີມຂອງສອງປະເທດລາວ-ຈີນ, ພ້ອມດຽວກັນນັ້ນ ບໍລິສັດທາງລົດໄຟລາວ-ຈີນ ແລະ ລົດໄຟລາວ-ຈີນ ໂຄງການພັດທະນາກວມລວມໄຊເສດຖານະຄອນຫຼວງວຽງຈັນ ກໍ່ເປັນແບບຢ່າງຮູບປະທໍາໃນການຮ່ວມມືດໍາເນີນຂໍ້ປະຕິບັດ “ໜຶ່ງແລວໜຶ່ງເສັ້ນທາງ” ທີ່ໄດ້ມາດຕະຖານສູງ. ມາຮອດປະຈຸບັນ，ມີທັງໝົດ 151 ປະເທດ, 32 ອົງການຈັດຕັ້ງສາກົນ ໄດ້ລົງນາມເຊັນສັນຍາຮ່ວມມືກັບ ສປ ຈີນ ໃນການຮ່ວມມືດໍາເນີນຂໍ້ປະຕິບັດ “ໜຶ່ງແລວໜຶ່ງເສັ້ນທາງ ” ໃນ 10 ປີທີ່ຜ່ານມາ, ພາຍຫຼັງທີ່ລິເລີ່ມການລົງທຶນໂຄງການມາຮອດປະຈຸບັນນໍາໃຊ້ງົບປະມານຕົວຈິງທັງໝົດພັນຕື້ໂດລາສະຫະລັດ, ມີບັນດາໂຄງການທັງໝົດ 3.000 ກວ່າໂຄງການທີ່ຮ່ວມມືກັນ, ເຊິ່ງສາມາດສ້າງວຽກເຮັດງານທໍາພາຍໃນປະເທດໄດ້ ເຖີງ 42.000 ລ້ານກວ່າຕໍາແໜ່ງ, ນອກນັ້ນຍັງໄດ້ຍົກລະດັບການເປັນຢູ່ ແລະຫຼຸດພົ້ນຈາກຄວາມທຸກຍາກທັງໝົດ 40 ລ້ານຄົນ, ເຊິ່ງທ້າຍປີນີ້ລັດຖະບານຈີນຈະໄດ້ຈັດຕັ້ງການຮ່ວມມືສາກົນຂັ້ນສູງ ຄັ້ງທີ 3 ຂຶ້ນພາຍໃຕ້ການຮ່ວມມືດໍາເນີນຂໍ້ປະຕິບັດ “ໜຶ່ງແລວໜຶ່ງເສັ້ນທາງ ”ຕື່ມອີກ.

แชร์