ຍົກລະດັບຄວາມຮູ້ໃຫ້ພະນັກງານນຳທ່ຽວ

ສະຖາບັນສື່ມວນຊົນ ວັດທະນະທຳ ແລະທ່ອງທ່ຽວ ຈັດພິທີເປີດຊຸດຝຶກອົບຮົມພະນັກງານນຳທ່ຽວລະດັບຊາດຄັ້ງທີ 28 ຂຶ້ນວັນທີ 6 ມິຖຸນາ 2023 ຢູ່ສະຖາບັນດັ່ງກ່າວ.

ໂອກາດນີ້, ທ່ານ ນາງ ເພັນປະພາ ພົງສາ ຮອງຫົວໜ້າ ສສວທ ກ່າວວ່າ: ໂດຍອີງຕາມທິດຟື້ນຟູການທ່ອງທ່ຽວ ແລະສະພາບການທ່ອງທ່ຽວລວມເຖິງການບໍລິການໃນປັດຈຸບັນທີ່ຍັງພົບກັບຄວາມຫຍຸ້ງຍາກບາງບັນຫາທີ່ເປັນສິ່ງທ້າທາຍໂດຍສະເພາະທາງດ້ານການບໍລິການມີການຂາດແຄນແຮງງານໃນຂະແໜງທ່ອງທ່ຽວໃນນີ້ປັນຫາທີ່ພວກເຮົາກຳລັງປະເຊີນຢູ່ໃນເວລານີ້ແມ່ນບັນຫາການຂາດແຄນພະນັກງານນຳທ່ຽວສົ່ງຜົນໃຫ້ຫຼາຍບໍລິສັດບໍ່ສາມາດໃຫ້ບໍລິການທີ່ຮັບປະກັນຄຸນນະພາບການບໍລິການທ່ອງທຽວໄດ້ສະນັ້ນອີງໃສ່ພາລະບົດບາດ ແລະແຜນກິດຈະກຳປະຈຳປີຂອງ ສສວທ ຈຶ່ງໄດ້ມີການກະກຽມຝຶກອົບຮົມພະນັກງານນຳທ່ຽວລະດັບຊາດຄັ້ງນີ້ຂຶ້ນໂດຍມີຈຸດປະສົງເພື່ອສ້າງຖັນແຖວພະນັກງານນຳທ່ຽວໃຫ້ມີຄວາມເຂັ້ມແຂງ ແລະມີຈໍານວນພຽງພໍກັບຄວາມຕ້ອງການຕົວຈິງຂອງການທ່ອງທ່ຽວລາວ.

ການເຝີກອົບຮົມຄັ້ງນີ້ຈະໃຊ້ເວລາ 56 ວັນ ປະກອບມີ 24ວິຊາຮຽນ ແລະໄດ້ເຊື້ອເຊີນຜູ້ມາບັນຍາຍພິເສດຈາກກົມກອງກ່ຽວຂ້ອງເພື່ອມາໃຫ້ຄວາມຮູ້ເພີ່ມເຕີມກ່ຽວກັບການທ່ອງທ່ຽວລາວໂດຍສະເພາະຈາກກົມຄຸ້ມຄອງທຸລະກິດທ່ອງທ່ຽວ, ກົມພັດທະນາການທ່ອງທ່ຽວ ແລະກົມໂຄສະນາການທ່ອງທ່ຽວລວມໄປເຖິງສະມາຄົມທຸລະກິດທ່ອງທ່ຽວ ແລະສະມາຄົມພະນັກງານນຳທ່ຽວ ໃນລາຍວິຊາຮຽນຫຼັກຈະມີທັງພາກທິດສະດີ ແລະພາກ ປະຕິບັດຕົວຈິງ ຮ່ວມນຳໂດຍການລົງພື້ນທີ່ແຫຼ່ງທ່ອງທ່ຽວຕົວຈິງ ໂດຍມີຄະນະກຳມະການຕິດຕາມໃຫ້ຄະແນນຕາມເກນທີ່ກຳນົດໄວ້ພາຍຫຼັງທີ່ສໍາເລັດການອົບຮົມແລ້ວ ສສວທ ຈະໄດ້ສົ່ງລາຍຜູ້ຊື່ທີ່ໄດ້ຮັບການຢັ້ງຢືນການອົບຮົມໃຫ້ກັບກົມຄຸ້ມຄອງທຸລະກິດທ່ອງທ່ຽວເພື່ອອອກບັດນຳທ່ຽວໃນຂັ້ນຕໍ່ໄປ.
ຂ່າວ: ວຽງຈັນໃຫມ່

แชร์