ສປປ ລາວ ເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນຄັ້ງທີ 55

ກອງປະຊຸມເຈົ້າໜ້າທີ່ອາວຸໂສຂົນສົ່ງອາຊຽນຄັ້ງທີ 55 (the 55th ASEAN Senior Transport Officials Meeting) (STOM) ແລະກອງປະຊຸມປິ່ນອ້ອມໃນບັນດາປະເທດສະມາຊິກອາຊຽນ ໄດ້ຈັດຂຶ້ນໃນລະຫວ່າງວັນທີ 6-7 ມິຖຸນານີ້, ທີ່ນະຄອນຫຼວຽງຈັນ. ໂດຍການເປັນປະທານຂອງທ່ານ ງາມປະສົງ ເມືອງມະນີ ລັດຖະມົນຕີກະຊວງ ຍທຂ, ມີທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງ ທັງເປັນຫົວໜ້າຄະນະຝ່າຍລາວພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ບັນດາຜູ້ເຂົ້າຮ່ວມໄດ້ຮັບຟັງການທົບທວນການຈັດຕັ້ງປະຕິບັດບັນດາໜ້າວຽກ, ກິດຈະກໍາ ແລະແຜນງານຕ່າງໆ ທີ່ໄດ້ຕົກລົງກັນໃນກອງປະຊຸມລັດຖະມົນຕີຂົນສົ່ງອາຊຽນຄັ້ງທີ 28 ແລະ ກອງປະຊຸມປິ່ນອ້ອມຕ່າງໆທີ່ໄດ້ຈັດຂຶ້ນຢູ່ບາລີ ປະເທດອິນໂດເນເຊຍໃນທ້າຍປີ 2022 ຜ່ານມາ, ລາຍງານຄວາມຄືບໜ້າການຈັດຕັ້ງແຜນງານປີ 2022-2023 ພາຍໃຕ້ແຜນຍຸດທະສາດຂົນສົ່ງອາຊຽນປີ 2016-2025 (ASEAN Transport Strategic Plan) ແລະ ທົບທວນທ້າຍສະໄໝຂອງແຜນຍຸດທະສາດສະບັບປັດຈຸບັນ ເພື່ອຮ່າງຍຸດທະສາດສະບັບຕໍ່ໄປ, ຕິດຕາມຜົນກອງປະຊຸມຂອງ 4 ໜ່ວຍງານທີ່ຢູ່ໃນແຜນຍຸດທະສາດການຂົນສົ່ງອາຊຽນຄື: ໜ່ວຍງານການຂົນສົ່ງທາງອາກາດ, ໜ່ວຍງານການຂົນສົ່ງທາງບົກ, ໜ່ວຍງານການຂົນສົ່ງທາງທະເລ ແລະ ໜ່ວຍງານການອໍານວຍຄວາມສະດວກດ້ານການຂົນສົ່ງ, ກະກຽມເອກະສານຕ່າງໆທີ່ຈະສະເໜີຮັບຮອງໃນກອງປະຊຸມລັດຖະມົນຕີຂົນສົ່ງອາຊຽນຄັ້ງທີ 29 ທີ່ມີແຜນຈະຈັດຂຶ້ນໃນເດືອນພະຈິກ 2023 ຢູ່ ສປປ ລາວ, ປຶກສາຫາລືຂັ້ນ STOM ເພື່ອຈະເຊີນເອົາປະເທດຕີມໍແລັດສະເຕ ເຂົ້າເປັນຜູ້ສັງເກດການໃນກອງປະຊຸມລະດັບວິຊາການ, ລະດັບໜ່ວຍງານ ແລະ ລະດັບອື່ນໆຂອງຂະແໜງການຂົນສົ່ງ, ຕິດຕາມການປະຕິບັດກິດຈະກໍາທີ່ໄດ້ຮັບການຊ່ວຍເຫຼືອຈາກຄູ່ຮ່ວມພັດທະນາເປັນຕົ້ນແມ່ນສປ ຈີນ, ຍີ່ປຸ່ນ, ສ.ເກົາຫຼີ, ສະຫະລັດອາເມລິກາ ແລະ ປະເທດອື່ນໆ.

ທ່ານ ງາມປະສົງ ເມືອງມະນີ ກ່າວວ່າ: “ໃນໄລຍະ 3 ປີຜ່ານມາ, ສປປ ລາວ ໄດ້ຕັ້ງໜ້າປະຕິບັດແຜນຍຸດທະສາດຂົນສົ່ງອາຊຽນປີ 2016-2025 ພ້ອມທັງປະຕິບັດນະໂຍບາຍການຫັນ ສປປ ລາວ ຈາກປະເທດທີ່ບໍ່ມີທາງອອກສູ່ທະເລ ໄປສູ່ປະເທດເຊື່ອມຈອດ-ເຊື່ອມໂຍງ, ໃນນັ້ນໄດ້ສຳເລັດໂຄງການພື້ນຖານດ້ານການຂົນສົ່ງທີ່ສຳຄັນເປັນຕົ້ນ: ສຳເລັດໂຄງການລົດໄຟລາວ-ຈີນ ເປັນສ່ວນສຳຄັນຂອງໂຄງການເຊື່ອມຕາໜ່າງລົດໄຟສິງກະໂປ-ຄຸນໝິງ, ສຳເລັດໂຄງການກໍ່ສ້າງທາງດ່ວນວຽງຈັນ-ວັງວຽງທີ່ເປັນຊ່ວງທີ 1 ຂອງໂຄງການທາງດ່ວນວຽງຈັນ-ບໍ່ເຕັນ ແລະ ສຳເລັດການເປີດນໍາໃຊ້ທ່າບົກ-ທ່ານາແລ້ງ ຊຶ່ງບັນດາໂຄງການດັ່ງກ່າວໄດ້ປ່ຽນຮູບໂສມຂອງການເຊື່ອມຈອດ-ເຊື່ອມໂຍງຂອງ ສປປ ລາວ ແລະ ອາຊຽນ ໂດຍສະເພາະການເຊື່ອມຈອດທາງບົກ ແລະ ການຄ້າ”.

ທ່ານ ງາມປະສົງ ເມືອງມະນີ ກ່າວໃຫ້ຮູ້ອີກວ່າ: ໃນນາມປະທານກອງປະຊຸມຂະແໜງການຂົນສົ່ງອາຊຽນ ປີ 2023 ນີ້, ສປປ ລາວ ສະເໜີໃຫ້ບັນດາປະເທດສະມາຊິກອາຊຽນ ສືບຕໍ່ສຸມໃສ່ບາງແຜນວຽກດັ່ງນີ້: 1. ການພັດທະນາພື້ນຖານໂຄງລ່າງຂົນສົ່ງຫຼາຍຮູບແບບທີ່ເຊື່ອມສານເປັນລະບົບປະກອບກັບການວາງແຜນນໍາໃຊ້ພື້ນທີ່; 2. ການເຊື່ອມສານດ້ານນະໂຍບາຍ ແລະລະບຽບການຂົນສົ່ງຂ້າມແດນລະຫວ່າງປະເທດອາຊຽນເພື່ອຮັບປະກັນການຍົກລະດັບຄວາມສາມາດໃນການແຂ່ງຂັນດ້ານຂົນສົ່ງ ແລະ ໂຍທາທິການ; 3. ສົ່ງເສີມການແລກປ່ຽນຖານຂໍ້ມູນຂົນສົ່ງ ແລະ ການນໍາໃຊ້ລະບົບທັນສະໄໝໃນວຽກງານຂົນສົ່ງຂ້າມແດນ, 4. ສ້າງເງື່ອນໄຂດຶງດູດການມີສ່ວນຮ່ວມຂອງທຸກພາກສ່ວນໃນການພັດທະນາຂະແໜງຂົນສົ່ງອາຊຽນໂດຍສະເພາະຊຸກຍູ້ການມີສ່ວນຮ່ວມລົງທຶນໃນພື້ນຖານໂຄງລ່າງຂົນສົ່ງໃນຮູບແບບລົງທຶນຮ່ວມລະຫວ່າງພາກລັດ ແລະເອກະຊົນ ເພື່ອຮ່ວມກັນບັນລຸຄາດໝາຍເຮັດໃຫ້ອາຊຽນກາຍເປັນຕະຫຼາດດຽວ ແລະເປັນຖານການຜະລິດຂອງພາກພື້ນ ແລະ ສາກົນ.
ທີ່ມາ:ປະເທດລາວ

แชร์