ຫຼວງພະບາງ ສົ່ງອອກແຮ່ເຫຼັກ 3 ແສນກວ່າໂຕນ ໄປຍັງ ສປ ຈີນ ໂດຍຜ່ານສະຖານີລົດໄຟລາວ-ຈີນ

ທ່ານ ຄຳຂັນ ຈັນທະວີສຸກ, ເຈົ້າແຂວງຫຼວງພະບາງ ໄດ້ລາຍງານສະພາບການຈັດຕັ້ງປະຕີບັດແຜນເສດຖະກິດ ແລະສັງຄົມທີ່ຕິດພັນກັບວຽກງານຂະແໜງພະລັງງານ ແລະບໍ່ແຮ່ໃຫ້ທ່ານລັດຖະມົນຕີ ກະຊວງພະລັງານ ແລະບໍ່ແຮ່ ໄດ້ຮັບຊາບໃນໂອກາດເດີນທາງມາເຮັດວຽກຢູ່ແຂວງຫຼວງພະບາງ ດັ່ງນີ້:

ກະກຽມເຮັດວຽກລ່ວງໜ້າຂອງໂຄງການກໍ່ສ້າງເຂື່ອນນໍ້າຂອງຫຼວງພະບາງພ້ອມທັງກໍ່ສ້າງບ້ານຈັດສັນໃໝ່ (ບ້ານຫ້ວຍຢໍ້) ແລະຍົກຍາຍປະຊາຊົນສໍາເລັດແລ້ວ 100%. ປັດຈຸບັນ, ແມ່ນພວມດໍາເນີນກໍ່ສ້າງຮາກຖານເຂື່ອນຄື: ເຮືອນຈັກໄຟຟ້າສໍາເລັດ 82,10%, ປະຕູລະບາຍນຳ້ລົ້ນ 18,84%, ຊ່ອງທາງເດີນເຮືອ 17,01%, ຄັນຄູກັ້ນນຳ້ 36,14 %, ງານຂຸດດິນເບື້ອງຂວາ 69,35% ແລະທາງປາຜ່ານ 24,70%.

ສ່ວນວຽກທໍລະນີສາດ ແລະ ແຮ່ທາດ: ປັດຈຸບັນ, ມີບັນດາໂຄງການທີ່ໄດ້ຮັບອະນຸຍາດ ຈໍານວນ 13 ບໍລິສັດ, ມີ 16 ກິດຈະການ, ມີເນື້ອທີ່ສໍາປະທານທັງໝົດ 1.347,77 ກມ2 ຄື: ຊອກຄົ້ນແຮ່ທາດ 03 ກິດຈະການ; ສໍາຫຼວດແຮ່ທາດ 07 ກິດຈະການ; ຂຽນບົດວິພາກເສດຖະກິດ-ເຕັກນິກ 03 ກິດຈະການ; ຂຸດຄົ້ນ-ປຸງແຕ່ງແຮ່ທາດ 03 ກິດຈະການ.


- ຂຸດຄົ້ນແຮ່ຄໍາໄດ້ 101.609 ໂຕນ, ທຽບໃສ່ແຜນການປະຕິບັດໄດ້ 99,39%; ປຸງແຕ່ງແຮ່ຄໍາໄດ້ 106.331,06 ໂຕນ, ທຽບໃສ່ແຜນການເຫັນວ່າປະຕິບັດໄດ້ລື່ນແຜນການ 4% ເນື່ອງຈາກວ່າໄດ້ເອົາແຮ່ທີ່ຄ້າງສະໜາມມາປຸງແຕ່ງເພີ່ມ; ໃນນີ້ມີແຮ່ຄໍາສະເລ່ຍ 3 ກຼາມ/ໂຕນ ແລະ ຫຼອມໂລຫະຄໍາໄດ້ 28 ແທ່ງ, ນໍ້າໜັກ 273.500 ກຼາມ;
- ຜະລິດແຮ່ອະໂລຫະໄດ້ຈໍານວນ 366.061 ແມັດກ້ອນ, ປະຕິບັດໄດ້ 78,55% ຂອງແຜນການ, ແລະ ຈໍາໜ່າຍໄດ້ 207.645 ແມັດກ້ອນ, ປະຕິບັດໄດ້ 30,41% ຂອງແຜນການ, ສາເຫດທີ່ການຜະລິດ ແລະ ການຈໍາໜ່າຍ ບໍ່ໄດ້ຕາມແຜນການ ເນື່ອງຈາກວ່າມີບາງບໍລິສັດໄດ້ສະເໜີຂໍຢຸດກິດຈະການຊົ່ວຄາວ ແລະ ບໍ່ໄດ້ດໍາເນີນການຂຸດຄົ້ນ.
ສິ່ງທີ່ພົ້ນເດັ່ນ ແມ່ນໄດ້ເອົາໃຈໃສ່ໃນການຕິດຕາມກວດກາ ແລະ ຊຸກຍູ້ບັນດາໂຄງການຂຸດຄົ້ນແຮ່ທາດ (ແບບທົດລອງ) ຕາມນະໂຍບາຍໃໝ່ຂອງລັດຖະບານ, ເຊິ່ງມີທັງໝົດ 11 ບໍລິສັດ, ມີເນື້ອທີ 428,35 ເຮັກຕາ. ໃນນີ້ຂຸດຄົ້ນແຮ່ເຫຼັກ ມີ 01 ບໍລິສັດ ໄດ້ຈໍານວນ 2.000 ກວ່າໂຕນ (ບໍ່ທັນໄດ້ສົ່ງອອກເທື່ອ); ຂຸດຄົ້ນຫີນມາໂບ້ 01 ບໍລິສັດ (ຍັງບໍ່ທັນໄດ້ຂຸດຄົ້ນເທື່ອ) ແລະ ຂຸດຄົ້ນຄໍາຕົກຂ້ອນ 09 ບໍລິສັດ ໄດ້ຈໍານວນ 5.884,80 ກຼາມ.
ນອກຈາກນີ້, ໄດ້ເອົາໃຈໃສ່ໃນການຕິດຕາມກວດກາ ການສົ່ງອອກແຮ່ເຫຼັກ ເພື່ອໄປຈໍາໜ່າຍຢູ່ຕ່າງປະເທດ (ສປ ຈີນ) ຂອງບັນດາບໍລິສັດຕ່າງໆ, ໂດຍຜ່ານສະຖານີລົດໄຟຫຼວງພະບາງ ໄດ້ຈໍານວນທັງໝົດ 344.793,90 ໂຕນ, ໃນນີ້ມີແຮ່ເຫຼັກ 341.787,09 ໂຕນ ແລະ ແຮ່ຫາຍາກ 3.006,81 ໂຕນ.
ທີ່ມາ: ຂ່າວສານຫຼວງພະບາງ, TargetMagazine

แชร์