ບານເຕະພິການຕາລາວ ຄວ້າໄຊເໜືອ ເຈົ້າພາບ 3-0 ອາຊຽນ ພາຣາເກມ

ທັບນັກກິລາບານເຕະຄົນພິການຕາທີມຊາດລາວ ລົງປະເດີມສະໜາມນັດທຳອິດກໍສ້າງຜົນງານໄດ້ຢ່າງໂດດເດັ່ນ ໄລ່ເອົາຊະນະ ເຈົ້າພາບ ກຳປູເຈຍ ໄປແບບຂາດຮອຍ 3-0 ປະ ຕູ ຊຶ່ງໄດ້ຈາກການເໝົາຍິງຄົນດຽວຂອງ ສົມສັກ ດວງວິໄລ ລູກຫຼານຂອງຊາວເມືອງມໍລະດົກໂລກ ຫຼວງພະບາງ ຊ່ວຍທັບບານເຕະຄົນພິການຕາທີມຊາດລາວ ເກັບ 3 ແຕ້ມທຳອິດ ມີລຸ້ນເຂົ້າຮອບ ຊີງຫຼຽນຄຳ ແຕ່ຕ້ອງຊະນະ ມາເລເຊຍ ໃນນັດທີ 2 ກ່ອນຈະພົບກັບ ໄທ ໃນນັດສົ່ງທ້າຍຂອງຮອບຄັດເລືອກ ໃນວັນທີ 6 ມິຖຸນານີ້.

ການແຂ່ງຂັນບານເຕະຄົນພິການຕາງານກິລາຄົນພິການອາຊຽນ ຄັ້ງທີ 12 ຫຼື ອາຊຽນ ພາຣາເກມ ໄດ້ເປີດສາກຂຶ້ນເປັນທາງການໃນຕອນແລງມື້ນີ້ 4 ມິຖຸນາ 2023 ທີ່ສະໜາມບານເຕະຄົນພິການຕາສະໜາມກິລາແຫ່ງຊາດ ມໍລະດົກ ເຕໂຊ ນະຄອນຫຼວງພະນົມເປັນ ຣາຊະອານາຈັກກຳປູເຈຍ, ໃຫ້ກຽດເຂົ້າຮ່ວມຊົມໂດຍທ່ານ ຫັນມານີ ສະມາຊິກສະພາແຫ່ງຊາດກຳປູເຈຍ ແລະທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະກິລາ ທັງເປັນປະທານຄະນະກຳມະການພາຣາແລມປິກແຫ່ງຊາດລາວ ຫຼື ຄພລ ແລະທ່ານ ບົວແກ້ວ ພູມວົງໄຊ ເອກອັກຄະລັດຖະທູດລາວ ປະຈຳກຳປູເຈຍ ພ້ອມດ້ວຍຄະນະ ແລະບັນດາກອງເຊຍຊາວກຳປູເຈຍ ເຂົ້າຮ່ວມຢ່າງຫຼວງຫຼາຍ.

ການແຂ່ງຂັນກິລາບານເຕະຄົນພິການຕາງານກິລາອາຊຽນພາຣາເກມ ມີ 4 ຊາດ ເຂົ້າຮ່ວມ ປະກອບມີ ສປປ ລາວ, ໄທ, ມາເລເຊຍ ແລະ ເຈົ້າພາບ ກຳປູເຈຍ ທັງ 4 ຊາດດັ່ງກ່າວຈັດເປັນກຸ່ມດຽວແຂ່ງຂັນພົບກັນໝົດຄັດເລືອກເອົາທີ 1-2 ໄປຊີງຫຼຽນຄຳ ແລະທີ 3 ໄປຊີງຫຼຽນທອງ.

ຜົນງານນັດທຳອິດຂອງນັກກິລາຄົນພິການຕາທີມຊາດລາວ ກໍເຮັດໃຫ້ພໍ່ແມ່ປະຊາຊົນລາວບໍ່ຜິດຫວັງ ສາມາດໄລ່ເອົາຊະນະ ກຳປູເຈຍ ເຈົ້າພາບ ໄປແບບຂາດຮອຍ 3-0 ປະຕູ ຊຶ່ງໄດ້ຈາກການເໝົາຍິງຄົນຂອງ ສົມສັກ ດວງວິໄລ ລູກຫຼານຂອງຊາວເມືອງມໍລະດົກໂລກ ແຂວງຫຼວງພະບາງ ຊ່ວຍທີມຊາດລາວ ເກັບ 3 ແຕ້ມສຳຄັນ ມີລຸ້ນເຂົ້າຊີງຫຼຽນຄຳ ແຕ່ຕ້ອງຜ່ານດ່ານທີ 2 ທີ່ມີຄິວລົງສະໜາມພົບກັບ ທີມຊາດມາເລເຊຍ ໃນວັນທີ 5 ມິຖຸນາ 2023 ເວລາ 17:00 ໂມງ ກ່ອນຈະໄດ້ພົບກັບ ຄູ່ປັບເກົ່າ ທີມຊາດໄທ ໃນວັນທີ 6 ມິຖຸນາໃນມື້ຖັດໄປ.
ຂ່າວໂດຍ: ສົງການ ພັນແພງດີ

แชร์