ວິຣະຖາວອນຈັດກິດຈະກຳສົ່ງເສີມສິດທິເດັກ

ການສະເຫຼີມສະຫຼອງວັນເດັກນ້ອຍສາກົນ ວັນທີ 1 ມະຖຸນາ ກໍຄືວັນປູກຕົ້ນໄມ້ແຫ່ງຊາດໃນປີນີ້ມີຫຼາຍພາກສ່ວນໄດ້ສຸມໃສ່ຈັດໃຫ້ມີກິດຈະກຳຫຼາຍຢ່າງໃນການຮ່ວມສະເຫຼີມສະຫຼອງວັນດັ່ງກ່າວຢ່າງເປັນຂະບວນຟົດຟື້ນໂດຍສະເພາະຕາມສຳນັກງານອົງການທັງພາກລັດ ແລະເອກະຊົນໂດຍສະເພາະໃນສະຖາບັນການສຶກສາມີຫຼາຍໂຮງຮຽນຮ່ວມກັນຈັດກິດຈະກຳສະເຫຼີມສະຫຼອງວັນເດັກນ້ອຍສາກົນຂຶ້ນ.

ໃນວັນທີ 31 ພືດສະພາ 2023 ທີ່ໂຮງຮຽນວິຣະຖາວອນ ນະຄອນຫຼວງວຽງຈັນ ໄດ້ຈັດກິດຈະກຳ ສະເຫຼີມສະຫຼອງວັນ ເດັກນ້ອຍສາກົນ 1 ມິຖຸນາ 2023 ຂຶ້ນໂດຍມີທ່ານນາງ ນີລາວັນ ວິຣະຖາວອນ ຜູ້ປະກອບການຜູ້ອຳນວຍການໂຮງຮຽນພ້ອມດ້ວຍພໍ່ແມ່ຜູ້ປົກຄອງ ແລະນັກຮຽນເຂົ້າຮ່ວມຈັດກິດຈະກຳໃນຄັ້ງນີ້.

ໂອກາດນີ້ ທ່ານ ນາງ ນີລາວັນ ວິຣະຖາວອນ ໄດ້ກ່າວວ່າ: ເພື່ອເປັນການຮ່ວມສະເຫຼີມສະຫຼອງວັນອັນມີຄວາມໝາຍສຳຄັນດັ່ງກ່າວທາງໂຮງຮຽນໄດ້ຮ່ວມກັບຜູ້ປົກຄອງ ແລະນັກຮຽນນັບແຕ່ຫ້ອງລ້ຽງເດັກອະນຸບານຈັນເຖິງມັດທະຍົມສຶກສາສົມບູນຂອງໂຮງຮຽນພ້ອມກັນຈັດກິດຈະກຳສະຫຼອງວັນເດັກນ້ອຍສາກົນຂຶ້ນເຊິ່ງນອກຈາກຈັດໃຫ້ມີການສະແດງສິລະປະວັນນະຄະດີ ຟ້ອນ ຮ້ອງເພັງ ຂັບລຳ ລະຄອນເວທີ ຂອງບັນດານັກຮຽນໃນແຕ່ລະຊັ້ນພາຍໃນງານຍັງຈັດໃຫ້ມີຫ້ອງວາງສະແດງການຫຼີ້ນເກມຕ່າງໆ ລວມມີອີກຫຼາຍກິດຈະກຳເພື່ອສົ່ງເສີມສິດທິເດັກໃນການກ້າສະແດງອອກ.

ທ່ານຜູ້ອຳນວຍການໂຮງຮຽນຍັງໃຫ້ຮູ້ຕຶ່ມອີກວ່າ: ສະເພາະໂຮງຮຽນພວກເຮົານອກຈາກເນັ້ນການຮຽນການສອນທີ່ມີຄຸນະພາບທຽບເທົ່າກັບລະດັບສາກົນແລ້ວສິ່ງໜຶ່ງຄືການເອົາໃຈໃສ່ສິດທິເດັກໃນການສົ່ງເສີມແນວຄວາມຄິດຜ່ານບັນດາກິດຈະກຳການເຄື່ອນໄຫວຫຼາຍຢ່າງພາຍໃນຫ້ອງຮຽນ ແລະນອກຫ້ອງຮຽນນັບຖືການຕັດສິນໃຈຂອງນັກຮຽນສົ່ງເສີມແນວຄວາມຄິດກ້າສະແດງອອກຄຽງຄູ່ກັບການແນະແນວທັກສະຄວາມຄິດສ້າງສັນອັນເປັນປະໂຫຍດໃນການພັດທະນາການຮຽນຮູ້ ຄຸນສົມບັດ ສິນທຳປະຕິວັດເພື່ອສ້າງໃຫ້ເປັນຊັບພະຍາກອນບຸກຄົນທີ່ເຕັມໄປດ້ວຍຄວາມຮູ້ຄວາມສາມາດປະກອບສ່ວນສ້າງສາພັດທະນາປະເທດຊາດອະນາຄົດ.

แชร์