ບໍລິສັດ ພູເບ້ຍ ມາຍນິງ ຈັດກອງປະຊຸມທົບທວນວຽກງານ 6 ເດືອນ

ວັນທີ 30 ພຶດສະພາ 2023 ບໍລິສັດ ພູເບ້ຍ ມາຍນິງ ໄດ້ຈັດກອງປະຊຸມທົບທວນວຽກງານຫົກເດືອນຄັ້ງທີໜຶ່ງຂອງປີ 2023 ໃນວັນທີ 25 ພຶດສະພາຢູ່ທີ່ໂຮງແຮມ ແລນມາກ ແມ່ຂອງ ຣີເວີຊາຍ ໃນນະຄອນຫຼວງວຽງຈັນ. ຈຸດປະສົງຂອງກອງປະຊຸມແມ່ນເພື່ອສືບຕໍ່ການປຶກສາຫາລືຮ່ວມກັນເພື່ອຜົນສໍາເລັດລະຫວ່າງບໍລິສັດ ແລະ ລັດຖະບານລາວກ່ຽວກັບເນື້ອໃນສໍາຄັນຂອງຜົນປະໂຫຍດຮ່ວມກັນ.

ພະນັກງານລັດຖະບານສາມສິບທ່ານ ແມ່ນມາຈາກສໍານັກງານນາຍົກລັດຖະມົນຕີ, ກະຊວງແຜນການ ແລະການລົງທຶນ, ກະຊວງ ພະລັງງານ ແລະບໍ່ແຮ່, ກະຊວງ ການເງິນ, ກະຊວງຊັບພະຍາກອນທໍາມະຊາດ ແລະສິ່ງແວດລ້ອມ, ກະຊວງ ໂຍທາທິການ ແລະຂົນສົ່ງ, ກະຊວງ ປ້ອງກັນປະເທດ, ລັດຖະບານແຂວງ ໄຊສົມບູນ ແລະຊຽງຂວາງ.

ກອງປະຊຸມໄດ້ເລີ່ມໂດຍການເປີດພິທີຂອງທ່ານ ທອງພັດ ອິນທະວົງ, ຮອງລັດຖະມົນຕີກະຊວງ ພະລັງງານ ແລະ ບໍ່ແຮ່, ທ່ານ ດາລິງ ເຊັງ, ຜູ້ອໍານວຍການໃຫຍ່ ແລະ ປະທານບໍລິຫານບໍລິສັດ ແພນອອສ໌ ຈໍາກັດ, ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ. ທ່ານ ສຸກສະຫວາດ ວົງພູມເຫຼັກ, ຮອງເຈົ້າແຂວງ ໄຊສົມບູນ ແລະ ທ່ານ ບົວເງິນ ຫຸມໄຊຍະພູມ, ຮອງເຈົ້າແຂວງ ຊຽງຂວາງກໍ່ໃຫ້ກຽດເຂົ້າຮ່ວມ.

ຕາງໜ້າຈາກບໍລິສັດ ແພນອອສ໌ ແລະ ບໍລິສັດ ພູເບ້ຍ ມາຍນິງ ມີ ສະຕີບ ກີມໂປ, ຜູ້ອໍານວຍການບໍລິສັດ ພູເບ້ຍ ມາຍນິງ; ໂດມີນິກ ທາວເຊັນ, ຜູ້ຈັດການທົ່ວໄປຝ່າຍກົດໝາຍ, ເມີເຣ ຟິບຊ, ຜູ້ຈັດການທົ່ວໄປຝ່າຍການຄ້າ, ຟີລິບ ແມັກຄໍແມັກ, ຜູ້ອໍານວຍການບໍລິສັດ ຟຣີດາ ຣີເວີ ຈໍາກັດ; ແລະ ເທເວີ ແມັກໄອເວີນ, ຮັກສາການຜູ້ຈັດການທົ່ວໄປຝ່າຍສຶກສາໂຄງການໃໝ່.

ຜູ້ເຂົ້າຮ່ວມໄດ້ຮັບຂໍ້ມູນກ່ຽວກັບການປະກອບສ່ວນດ້ານການເງິນ ແລະເສດຖະກິດໃຫ້ແຂວງໄຊສົມບູນ ແລະລັດຖະບານຂັ້ນສູງກາງເຊິ່ງເຮັດໃຫ້ບໍລິສັດໄດ້ຮັບລາງວັນປະກອບສ່ວນດ້ານສ່ວຍສາອາກອນດີເດັ່ນໃນປີ 2023. ຜູ້ສະເໜີຍັງໄດ້ກ່າວເຖີງຜົນສໍາເລັດຂອງໂຄງການພັດທະນາຊຸມຊົນ ແລະການປະກອບສ່ວນດ້ານເສດຖະກິດ-ສັງຄົມຂອງບໍລິສັດຕໍ່ຊຸມຊົນທ້ອງຖິ່ນ, ແລະສະເໜີກ່ຽວກັບຜົນດໍາເນີນງານດ້ານການຜະລິດ, ສິ່ງແວດລ້ອມ ແລະຄວາມປອດໄພທີ່ເຂັ້ມແຂງ.

ບໍລິສັດໄດ້ສະເໜີຂໍການສະໜັບສະໜູນ ແລະການຊ່ວຍເຫຼືອຈາກລັດຖະບານເພື່ອຊ່ວຍແກ້ບັນຫາທີ່ຕ້ອງໄດ້ແກ້ໄຂເພື່ອຊ່ວຍໃຫ້ບໍລິສັດ ພູເບ້ຍ ມາຍນິງບັນລຸການເຕີບໂຕ ແລະເປົ້າໝາຍການພັດທະນາເພື່ອສືບຕໍ່ສ້າງຜົນປະໂຫຍດໃນ ສປປ ລາວ.

ທ່ານ ດາລິງ ເຊັງ, ຜູ້ອໍານວຍການໃຫຍ່ ແລະປະທານບໍລິຫານບໍລິສັດ ແພນອອສ໌ ຈໍາກັດ ໄດ້ກ່າວຕ້ອນຮັບພະນັກງານ ແລະການນໍາລັດຖະບານລາວ ແລະແຈ້ງການດໍາເນີນທຸລະກິດຍາວນານຂອງແພນອອສ໌ ໃນລາວ.

ທ່ານ ເຊັງ ກ່າວວ່າ: “ບໍລິສັດ ແພນອອສ໌ ແມ່ນປີຕິຍິນດີທີ່ໄດ້ຕ້ອນຮັບທ່ານຮອງລັດຖະມົນຕີ, ບັນດາຮອງເຈົ້າແຂວງ ແລະພະນັກງານລັດຖະບານເຂົ້າສູ່ກອງປະຊຸມ.
“ກອງປະຊຸມດັ່ງກ່າວ ເຮັດໃຫ້ບໍລິສັດ ແພນອອສ໌, ບໍລິສັດ ພູເບ້ຍ ມາຍນິງ ແລະ ລັດຖະບານ ລາວ ສືບຕໍ່ປຶກສາຫາລືຮ່ວມກັນ ແລະບັນລຸຜົນໄດ້ຮັບທີ່ດີເພື່ອສ້າງຜົນປະໂຫຍດໃຫ້ປະຊາຊົນລາວໃນປະຈຸບັນ ແລະໃນຕໍ່ໜ້າ.”

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ ກ່າວຕື່ມວ່າ: “ກອງປະຊຸມຍັງເປີດໂອກາດໃຫ້ບໍລິສັດ ພູເບ້ຍ ມາຍນິງ ປຶກສາຫາຄວາມຍືນຍົງຂອງການລົງທຶນໃນຕໍ່ໜ້າຂອງ ແລະການປະກອບສ່ວນດ້ານເສດຖະກິດ ແລະສັງຄົມອັນຍາວນານຂອງພວກເຮົາໃນລາວ.”

• 31/05/2023