ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງອຸດົມໄຊ ສະໄໝທີ IX ໄດ້ຈັດຂຶ້ນ ໃນວັນທີ 29 ພຶດສະພາຜ່ານມາທີ່ສະໂມສອນແຂວງໂດຍການເຂົ້າຮ່ວມເປັນກຽດຂອງສະຫາຍ ສິນລະວົງ ຄຸດໄພທູນ ກຳມະການກົມການເມືອງສູນກາງພັກປະທານສູນກາງແນວລາວສ້າງຊາດຜູ້ຊີ້ນຳແຂວງອຸດົມໄຊພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

 

ສະຫາຍ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກເລຂາພັກແຂວງ ເຈົ້າແຂວງອຸດົມໄຊ ກ່າວວ່າ: ກອງປະຊຸມຄັ້ງນີ້ຈະໄດ້ລົງເລິກຕີລາຄາບັນດາຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ແລະແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ເວົ້າລວມ, ເວົ້າສະເພາະການນຳພາ-ຊີ້ນຳຢ່າງຮອບດ້ານຂອງຄະນະບໍລິຫານງານພັກແຂວງຕະຫຼອດໄລຍະກາງສະໄໝ ແຕ່ປີ 2021-2023 ກໍຄືໃນໄລຍະ 2 ປີເຄິ່ງຜ່ານມາ, ຍົກໃຫ້ເຫັນດ້ານດີ-ຜົນງານ, ດ້ານອ່ອນ-ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ພ້ອມທັງຄົ້ນຄວ້າ, ກຳນົດທິດທາງແຜນການແຕ່ນີ້ຮອດປີ 2025 ໃຫ້ມີຄວາມສອດ ຄ່ອງກັບສະພາບຈຸດພິເສດ, ທ່າແຮງ ແລະ ເງື່ອນໄຂຂອງແຂວງ ໄປຄຽງຄູ່ກັບການກຳນົດວິທີການ ແລະ ມາດຕະການໃນການຈັດຕັ້ງປະຕິບັດທີ່ຊັດເຈນ ແນໃສ່ເຮັດໃຫ້ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ ຄັ້ງທີ IX ຂອງແຂວງບັນລຸຜົນສຳເລັດຕາມຈຸດປະ ສົງລະດັບຄາດໝາຍທີ່ວາງໄວ້. ພ້ອມດຽວກັນນັ້ນຍັງເປັນການກວດກາຄືນຄວາມຮັບຜິດຊອບຕໍ່ໜ້າທີ່ການເມືອງຂອງຄະນະບໍລິຫານງານພັກແຂວງຕໍ່ອັນລວມ,ອັນສະເພາະຂອງບຸກຄົນ ເພື່ອແນໃສ່ເສີມຂະຫຍາຍດ້ານດີ ແລະປັບປຸງດ້ານອ່ອນ-ຂໍ້ຄົງຄ້າງໃຫ້ດີຂຶ້ນ. ເພື່ອເຮັດໃຫ້ການປະຕິບັດໜ້າທີ່ການເມືອງບັນລຸຕາມຄາດໝາຍທີ່ວາງໄວ້. ທັງເປັນການຍົກສູງຄວາມສາມາດນຳພາ ແລະລັກສະນະນໍາໜ້າຂອງຄະນະພັກໃຫ້ດີຂຶ້ນ.

 

ກອງປະຊຸມໄດ້ດຳເນີນການທາບທາມຄວາມເຊື່ອໝັ້ນໄວ້ວາງໃຈຕໍ່ການນຳພາລວມ ແລະບຸກຄົນຄະນະບໍລິຫານງານພັກແຂວງສະໄໝທີ IX ພ້ອມທັງດຳເນີນກອງປະຊຸມເປີດກວ້າງຄົບຄະນະກາງສະໄໝຂອງຄະນະບໍລິຫານງານພັກແຂວງສະໄໝທີ IX ແລະກອງປະຊຸມພາຍໃນຄະນະບໍລິຫານງານພັກແຂວງຊຶ່ງຈະດຳເນີນໄປຮອດວັນທີ 2 ມິຖຸນາຈຶ່ງສຳເລັດ.

ຂ່າວ-ພາບ: ໄມພອນ