ອົງການ KOICA ໃຫ້ທຶນ 9 ລ້ານໂດລາ ສືບຕໍ່ໂຄງການພັດທະນາຊົນນະບົດຢູ່ 3 ແຂວງພາກໃຕ້

ເມື່ອບໍ່ດົນມານີ້, ກະຊວງກະສິກຳ ແລະປ່າໄມ້ຮ່ວມກັບອົງການຮ່ວມມືສາກົນ ສ.ເກົາຫຼີ (ກອຍກາ) ຫຼື Korea International Cooperation Agency (KOICA) ແລະສະຖາບັນພັດທະນາຊົນນະບົດ ສ.ເກົາຫຼີ ໄດ້ຈັດພິທີເປີດໂຄງການພັດທະນາຊົນນະບົດແບບປະສົມປະສານ ຢູ່ 3 ແຂວງພາກໃຕ້ຂອງ ສປປ ລາວ ທີ່ໄດ້ຮັບການສະໜັບສະໜູນທຶນຈາກລັດຖະບານ ສ.ເກົາຫຼີ.

ພິທີຈັດຂຶ້ນຢູ່ໂຮງແຮມປາກຊ່ອງແດນງາມ ເມືອງປາກຊ່ອງ ແຂວງຈໍາປາສັກ ໂດຍການເຂົ້າຮ່ວມຂອງທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກຳ ແລະ ປ່າໄມ້, ທ່ານນາງ ມີຢ່ອງຈິນ ຄິມ ຫົວໜ້າອົງການ KOICA ປະຈໍາ ສປປ ລາວ, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ, ທ່ານ ຂັນຕີ ສີລະວົງສາ ຮອງເຈົ້າແຂວງໆເຊກອງ, ພ້ອມກັນນັ້ນກໍມີການນໍາຈາກພາກສ່ວນກ່ຽວຂ້ອງຂອງສູນກາງ, ຂອງແຂວງ, ເມືອງ, ຊ່ຽວຊານປະຈໍາໂຄງການ ແລະການຈັດຕັ້ງບ້ານ, ຄະນະພັດທະນາບ້ານເປົ້າໝາຍຂອງໂຄງການ 20 ບ້ານໃນ 3 ແຂວງ ຈໍາປາສັກ, ສາລະວັນ ແລະເຊກອງເຂົ້າຮ່ວມ.

ລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສ.ເກົາຫຼີ ໄດ້ຮ່ວມກັນຈັດຕັ້ງປະຕິບັດໂຄງການພັດທະນາຊົນນະບົດແບບມີສ່ວນຮ່ວມຕາມຫຼັກການແຊມາອຸນດົງ ແຕ່ປີ 2013–2019 ຢູ່ແຂວງວຽງຈັນ ແລະແຂວງສະຫວັນນະເຂດ. ຈາກການຈັດຕັ້ງປະຕິບັດໂຄງການ ເຫັນວ່າມີຜົນສໍາຢ່າງໜ້າເພິ່ງພໍໃຈ. ຍ້ອນແນວນັ້ນ, ເພື່ອເປັນການຜັນຂະຫຍາຍຜົນສໍາເລັດການຈັດຕັ້ງປະຕິບັດໂຄງການ ແລະ ສືບຕໍ່ໃນການແກ້ໄຂຄວາມທຸກຍາກຂອງປະຊາຊົນ, ອົງການ KOICA ຈຶ່ງໄດ້ສືບຕໍ່ສະໜັບສະໜູນງົບປະມານ ຈໍານວນ 9 ລ້ານໂດລາສະຫະລັດ ເພື່ອຈັດຕັ້ງປະຕິບັດໂຄງການຢູ່ ແຂວງຈໍາປາສັກ, ສາລະວັນ ແລະແຂວງເຊກອງກວມເອົາ 4 ເມືອງ, 20 ບ້ານ.

ໂຄງການດັ່ງກ່າວມີໄລຍະການຈັດຕັ້ງປະຕິບັດ 5 ປີ ເລີ່ມແຕ່ເດືອນພະຈິກ ປີ 2021- ເດືອນຕຸລາ ປີ 2026. ຈຸດປະສົງກໍ່ເພື່ອສະໜັບສະໜູນການພັດທະນາຊົນນະບົດແບບມີສ່ວນຮ່ວມຕາມນະໂຍບາຍ 3 ສ້າງ ໂດຍນໍາໃຊ້ຮູບແບບເຊມາອູດົງຂອງ ສ.ເກົາຫຼີ, ເພື່ອສ້າງຄວາມເຂັ້ມແຂງໃຫ້ພະນັກງານແຕ່ສູນກາງຮອດທ້ອງຖິ່ນ ແລະການນໍາຊຸມຊົນໃນການສ້າງແຜນພັດທະນາຊຸມຊົນ, ການຜະລິດກະສິກໍາ, ການແປຮູບ, ການຕະຫຼາດ ແລະ ການສ້າງສະຫະກອນກະສິກໍາ, ປັບປຸງຊີວິດການເປັນຢູ່ຂອງປະຊາຊົນແນ່ໃສ່ສ້າງກິດຈະກໍາທີ່ສ້າງລາຍຮັບໃຫ້ຊາວກະສິກອນ ແລະປັບປຸງສະພາບແວດລ້ອມພາຍໃນບ້ານ.

ໃນພິທີຍັງມີການຕັດແຖບຜ້າເປີດໂຄງການພ້ອມທັງລັ່ນຄ້ອງ 9 ບາດ ເພື່ອເປັນນີມິດໝາຍອັນດີ ແລະ ເປັນສີລິມຸງຄຸນແກ່ການເປີດໂຄງການ. ນອກນີ້ການນໍາ ແລະ ແຂກທີ່ເຂົ້າຮ່ວມພິທີຍັງໄດ້ເຄື່ອນໄຫວຢ້ຽມຢາມກິດຈະກໍາຂອງໂຄງການຢູ່ບ້ານຫຼັກ 35 ເມືອງປາກຊ່ອງ ພ້ອມທັງປ່ອຍປ້າຍດຳເນີນກິດຈະກໍາພັດທະນາຢູ່ພາຍໃນບ້ານຕື່ມອີກ.
ທີ່ມາ: ສູນຂ່າວຊາວພາກໃຕ້

แชร์