ສົນທະນາການນຳໃຊ້ເງິນສະກຸນທ້ອງຖິ່ນເຂົ້າໃນການຄ້າ ແລະການລົງທຶນລະຫວ່າງປະເທດ

ໃນຕອນບ່າຍຂອງວັນທີ 26 ພຶດສະພາ 2023, ທີ່ໂຮງແຮມຄຣາວ ພລາຊາ, ທະນາຄານແຫ່ງ ສປປ ລາວ (ທຫລ) ໄດ້ຈັດກອງປະຊຸມສົນທະນາ ໃນຫົວຂໍ້: “ການນຳໃຊ້ເງິນສະກຸນທ້ອງຖິ່ນເຂົ້າໃນການຄ້າ ແລະການລົງທຶນລະຫວ່າງປະເທດ” ໄດ້ດຳເນີນໃນຮູບແບບສົນທະນາວິຊາການ Panel Discussion ເປັນຄັ້ງທໍາອິດຂຶ້ນຢ່າງເປັນທາງການໃຫ້ກຽດເປີດພິທີໃນຄັ້ງນີ້ໂດຍທ່ານ ນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ ຊຶ່ງໃຫ້ກຽດເຂົ້າຮ່ວມໂດຍທ່ານ HAN Ye ເລຂານຸການໂທ, ສະຖານທູດຈີນປະຈຳລາວ ພ້ອມດ້ວຍຄະນະ,ກະຊວງ, ທະນາຄານ ແລະຂະແໜງການກ່ຽວຂ້ອງ, ຊຶ່ງແຂກທີ່ຖືກຮັບເຊີນຢູ່ເທິງເວທີຜູ້ສົນທະນາໃນຄັ້ງນີ້ປະກອບມີຈາກພາກສ່ວນ: ທ່ານ ສຸລິສັກ ທໍານຸວົງ ຫົວໜ້າກົມນະໂຍບາຍເງິນຕາ ທຫລ, ທ່ານ Ruan Jing ຮອງຜູ້ອຳນວຍການທະນາຄານ ICBC, ທ່ານ ນັນທະລາດ ແກ້ວປະເສີດ ຮອງຜູ້ອໍານວຍການ ທະນາຄານການຄ້າຕ່າງປະເທດລາວມະຫາຊົນ, ທ່ານ ສອນມາລາ ນວນທະສິງ ຫົວໜ້າພະແນກ, ກະຊວງອຸດສະຫະກໍາ ແລະການຄ້າ, ທ່ານ ປອ. ໄຊບັນດິດ ຣາຊາະພົນ ຮອງປະທານສະພາການຄ້າ ແລະອຸດສາຫະກໍາແຫ່ງຊາດ ແລະທ່ານ ນາງ ສຸພາພອນ ສວນນະວົງ ໃຫ້ກຽດເປັນພິທີກອນສຳພາດ.

ຈຸດປະສົງຂອງການດຳເນີນການຈັດເວທີສົນທະນາວິຊາການ Panel Discussion ໃນຄັ້ງນີ້ເພື່ອສ້າງຄວາມຮັບຮູ້, ຕື່ນຕົວ ແລະລິເລີ່ມໃນການຫັນໄປໃຊ້ສະກຸນເງິນທ້ອງຖິ່ນເຂົ້າໃນການຊຳລະການຄ້າ, ການລົງທຶນຕົວຈິງຂອງພາກທຸລະກິດ, ກອງປະຊຸມໃນຄັ້ງນີ້ຖືວ່າເປັນຄັ້ງທຳອິດ ທີ່ທະນາຄານແຫ່ງ ສປປ ລາວ ໄດ້ຈັດເວທີນີ້ຂຶ້ນເປັນທາງການນັບແຕ່ມີໜໍ່ແໜງການລິເລີ່ມວຽກສົ່ງເສີມການນໍາໃຊ້ສະກຸນເງິນທ້ອງຖິ່ນເຂົ້າໃນການຄ້າ ແລະການລົງທຶນຢູ່ ສປປ ລາວ ແຕ່ຊຸມປີ 2016 ເຖິງ 2019 (ໄລຍະທີ່ ສປປ ລາວ ລິເລີ່ມຫາລືເຈລະຈາ ກັບປະເທດອ້ອມຂ້າງທີ່ມີມູນຄ່າການຄ້າການລົງທຶນສູງເປັນຕົ້ນ ສປ ຈີນ, ສສ ຫວຽດນາມ ແລະ ໄທ). ຊຶ່ງວຽກດັ່ງກ່າວກໍ່ໄດ້ກາຍມາເປັນຮູບປະທຳຂຶ້ນ ໃນເດືອນມັງກອນ ປີ 2020 ໂດຍ ທະນາຄານແຫ່ງ ສປປ ລາວ ແລະທະນາຄານປະຊາຊົນຈີນ ໄດ້ສໍາເລັດການລົງນາມສົ່ງເສີມການນໍາໃຊ້ສະກຸນເງິນທ້ອງຖິ່ນເຂົ້າໃນການຊຳລະສະສາງ ໂດຍເປັນການເປີດທາງໃຫ້ ຄູ່ຄ້າ ແລະຄູ່ລົງທຶນ ຂອງ 2 ປະເທດ ສາມາດນໍາໃຊ້ສະກຸນເງິນທ້ອງຖິ່ນຂອງຕົນເອງຄື: ເງິນກີບ ແລະເງິນຢວນ ເຂົ້າໃນການເຮັດທຸລະກຳຊຳລະລະຫວ່າງກັນໄດ້,ໃນສາກົນພາກພື້ນ ແລະພາຍໃນສະມາຊິກອາຊຽນກໍ່ມີຂະບວນການສົ່ງເສີມການໃຊ້ສະກຸນເງິນທ້ອງຖິ່ນຢ່າງແຜ່ຫຼາຍ ເພື່ອເປັນອຳນວຍຄວາມສະດວກການຄ້າ ແລະການລົງທຶນ ແລະຫັນໄປສູ່ການໃຊ້ຫຼາຍສະກຸນເງິນທີ່ບໍ່ຈຳເປັນຕ້ອງເພິ່ງພາສະກຸນເງິນທີ່ແຂງສະກຸນເງິນໃດໜຶ່ງ, ຊຶ່ງຈະສາມາດສ້າງເງື່ອນໄຂເຮັດໃຫ້ການຄ້າ-ການລົງທຶນ ແລະສະກຸນເງິນທີ່ໃຊ້ໃນການຊຳລະສະສາງ ລະຫວ່າງປະເທດມີຄວາມສົມດຸນຍິ່ງຂຶ້ນ.ຊຶ່ງການລົງນາມດັ່ງກ່າວເປັນພຽງການລິເລີ່ມດ້ານນະໂຍບາຍເທົ່ານັ້ນຍັງຕ້ອງມີຫຼາຍອົງປະກອບທາງດ້ານພື້ນຖານໂຄງລ່າງເປັນຕົ້ນ:ຄວາມພ້ອມຂອງທະນາຄານທຸລະກິດໃນການເຮັດທຸລະກຳຊໍາລະ, ການຮັບຝາກ, ການກໍານົດອັດຕາແລກປ່ຽນໂດຍກົງທີ່ບໍ່ຜ່ານສະກຸນເງິນທີ່ສາມ, ການສ້າງຄວາມເຂົ້າໃຈໃຫ້ແກ່ພາກທຸລະກິດໃນການມີສ່ວນຮ່ວມ ແລະ ອື່ນໆ ເພື່ອກະຕຸກຊຸກຍູ້ວຽກດັ່ງກ່າວໃຫ້ແຂງແຮງຂຶ້ນ, ຄຽງຄູ່ກັນນີ້, ທະນາຄານແຫ່ງ ສປປ ລາວ ຍັງຈະໄດ້ສືບຕໍ່ຄົ້ນຄວ້າຜັກດັນຂອບການຮ່ວມມືດັ່ງກ່າວກັບປະເທດຕ່າງໆ ທີ່ມີມູນຄ່າການຄ້າ-ການລົງທຶນທີ່ສູງກັບ ສປປ ລາວ ໃຫ້ກວ້າງຂວາງອອກຕື່ມອີກເພື່ອເປັນການຮັດແໜ້ນການຮ່ວມມືທາງດ້ານການເງິນ, ການຫຼຸດຜ່ອນການເອື່ອຍອີງການນໍາໃຊ້ສະກຸນເງິນແຂງຂອງສາກົນ ແລະທັງເປັນການສົ່ງເສີມສະຖຽນລະພາບຂອງຄ່າເງິນກີບ.

ຜ່ານການສົນທະນາ-ແລກປ່ຽນ ແລະນຳສະເໜີພາລະບົດບາດມະຫາພາກໃນຂະບວນການສົ່ງເສີມການນໍາໃຊ້ສະກຸນເງິນທ້ອງຖິ່ນກັບບັນດາປະເທດອ້ອມຂ້າງ; ທ່າອ່ຽງການນໍາເຂົ້າ-ສົ່ງອອກ ແລະຫັນການນໍາໃຊ້ສະກຸນເງິນທ້ອງຖິ່ນ (ຢວນ, ບາດ, ດົງ) ເຂົ້າໃນການຄ້າລະຫວ່າງປະເທດ; ການກະກຽມຄວາມພ້ອມຂອງທະນາຄານທຸລະກິດໃນການຈັດຕັ້ງປະຕິບັດວຽກງານສົ່ງເສີມການນໍາໃຊ້ສະກຸນເງິນທ້ອງຖິ່ນ ແລະສະພາບຂອງພາກທຸລະກິດທີ່ໄດ້ມີຄວາມຮັບຮູ້ ຕື່ນຕົວ ແລະໄດ້ລິເລີ່ມໃນການຫັນໄປໃຊ້ສະກຸນເງິນທ້ອງຖິ່ນເຂົ້າໃນການຊຳລະສະສາງການຄ້າ-ການລົງທຶນໃນຕົວຈິງ.

ທັງໝົດແມ່ນເພື່ອສ້າງຄວາມຮັບຮູ້, ເຂົ້າໃຈ ແລະເປັນເອກະພາບໃນສັງຄົມຕໍ່ວຽກງານການຄຸ້ມຄອງການຊໍາລະການຄ້າ ແລະການລົງທຶນລະຫວ່າງປະເທດ ແລະການສົ່ງເສີມການນໍາໃຊ້ເງິນກີບໃນການກໍານົດລາຄາສິນຄ້າ ແລະບໍລິການພາຍໃນ ສປປ ລາວ, ການດຳເນີນການຈັດເວທີສົນທະນາວິຊາການ Panel Discussion ຄັ້ງປະຖົມມະເລີກໃນຄັ້ງນີ້ໄດ້ດຳເນີນເປັນເວລາເຄິ່ງວັນດ້ວຍຜົນສຳເລັດຕາມຈຸດປະສົງ ແລະລະດັບຄາດໝາຍທີ່ວາງໄວ້.

แชร์