ແຂວງສາລະວັນ ພິທີຈັດສົ່ງອັດຖິທະຫານອາສາສະໝັກ ແລະຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມກັບຄືນປະເທດ ຈຳນວນ 16 ອັດຖິ, ຈັດຂື້ນໃນກາງເດືອນພຶດສະພາທີ່ຜ່ານມານີ້ຢູ່ທີ່ກອງບັນຊາການທະຫານແຂວງສາລະວັນ, ເຂົ້າຮ່ວມໃນພິທີໂດຍສະຫາຍ ປອ ດາວວົງ ພອນແກ້ວ ເລຂາພັກແຂວງເຈົ້າແຂວງໆສາລະວັນ, ສໍາລັບ ສສ ຫວຽດນາມ ນຳໂດຍສະຫາຍ ພັອ ຮ່ວາງວັນເຢິ້ນ ຮອງເລຂາຫົວໜ້າການເມືອງທະຫານແຂວງເທື່ອທຽນເຫວ້, ມີບັນດາສະຫາຍໃນຄະນະປະຈຳພັກແຂວງ, ກຳມະການພັກແຂວງ, ຄະນະປະຕິບັດງານພິເສດຂອງແຂວງສາລະວັນ, ເຊກອງ ແລະ ສສ ຫວຽດນາມ, ກຳລັງປະກອບອາວຸດ ປກຊ - ປກສ ແຂວງ, ພະນັກງານການນຳພະແນກການອ້ອມຂ້າງແຂວງ ແລະອົງການຈັດຕັ້ງມະຫາຊົນເຂົ້າຮ່ວມ.

 

ສະຫາຍ ພົນຈັດຕະວາ ພູວັນ ພິມມະຈັນ ຄະນະປະຈໍາພັກແຂວງເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງ, ໄດ້ຂຶ້ນຜ່ານບົດສະດຸດີໂດຍມີເນື້ອໃນວ່າ: ໃນທ່າມກາງບັນຍາກາດທີ່ໂສກເສົ້າເສຍດາຍ, ອາໄລ, ອາວອນນີ້ໄດ້ມີການນໍາພັກລັດຂອງພະແນກການອ້ອມຂ້າງແຂວງ, ພະນັກງານ, ທະຫານ, ຕໍາຫຼວດ, ນັກຮຽນຮູ້, ນັກສຶກສາ. ປັນຍາຊົນ ແລະ ມວນຊົນຊາວແຂວງສາລະວັນ ແລະ ຄະນະປະຕິບັດງານພິເສດແຂວງເຊກອງ ໄດ້ພ້ອມກັນມາເຕົ້າໂຮມເພື່ອໄຫວ້ອາໄລເຖິງດວງວິນຍານ ແລະວັດສົ່ງ ຮ່າງອັດຖິ ຂອງທະຫານອາສາສະໝັກ ແລະ ຊ່ຽວຊານ ຫວຽດນາມ ຈຳນວນ 16 ຮ່າງອັດຖິ ໃນນັ້ນ ຂຸດຄົ້ນຈາກແຂວງເຊກອງ ໄດ້ 5 ຮ່າງອັດຖິ, ແຂວງສາລະວັນ 11 ຮ່າງອັດຖິ ພວກສະຫາຍເຫຼົ່ານັ້ນຍ່ອມເສຍສະຫຼະຊີວິດ, ເລືອດ ເນື້ອໃນປາງສົງຄາມຢູ່ດິນແດນຂອງແຂວງສາລະວັນ ແຂວງເຊກອງ, ເພື່ອແລກເອກະລາດອະທິປະໄຕ ແລະຜືນແຜ່ນດິນອັນຄົບຖ້ວນຂອງຊາດລາວ-ຫວຽດນາມ ພວກສະຫາຍມີຄວາມຈົງຮັກພັກດີ, ອັນບໍລິສຸດຜຸດຜ່ອງຢ່າງບໍ່ມີຂອບເຂດຕໍ່ສອງປະເທດລາວ-ຫວຽດນາມ ແລະເພື່ອໃຫ້ໄດ້ມາເຊິ່ງຄວາມສົມບູນພູນສຸກຂອງປະຊາຊົນລາວກໍ່ຄືແຂວງສາລະວັນ ແລະແຂວງເຊກອງໃນທຸກວັນນີ້ໄຊຊະນະດັ່ງກ່າວພວກເຮົາຂໍ ສະແດງຄວາມໄຫວ້ອາໄລ ແລະ ຮູ້ບຸນຄຸນຢ່າງລົ້ນເຫຼືອຕໍ່ດວງວິນຍານຂອງບັນດາພະນັກງານ - ນັກຮົບທະຫານອາສາສະໝັກ ແລະຊ່ຽວຊານ ຫວຽດນາມທີ່ເສຍສະຫຼະຊີວິດໃນປາງສົງຄາມ ເຊິ່ງຕະຫຼອດໄລຍະຜ່ານມາ ປະຊາຊົນລາວບັນດາເຜົ່າ ເວົ້າລວມ, ເວົ້າສະເພາະ ປະຊາຊົນຊາວ ແຂວງສາລະວັນ ແຂວງເຊກອງ ມີຄວາມຊາບຊຶ້ງ ແລະຈົດຈຳຈາລຶກບຸນຄຸນຢ່າງບໍ່ມີວັນຫຼົງລືມໄດ້,ມູນເຊື້ອການຮ່ວມມືສຳພັນສູ້ຮົບລະຫວ່າງສອງຊາດ ລາວ-ຫວຽດນາມ ແມ່ນເປັນສັນຍາລັກທີ່ສະຫວ່າງ ສະໄຫວ ແລະຢືນຢັນໄດ້ວ່າ: ການຮ່ວມມືຊ່ວຍເຫຼືອເຊິ່ງກັນ ແລະກັນ ລະຫວ່າງກອງທັບປະຊາຊົນລາວ ແລະກອງທັບປະຊາຊົນຫວຽດນາມ ເຊິ່ງແມ່ນການປະສານສົມທົບທີ່ມີປະສິດທິຜົນສູງເຊິ່ງຜົນງານ ແລະຄຸນງາມຄວາມດີຂອງບັນດາສະຫາຍພະນັກງານນັກຮົບຈະກາຍເປັນແວ່ນແຍງອັນໃສແຈ້ງໃຫ້ແກ່ລູກຫຼານຄົນຮຸ່ນຫຼັງໄດ້ຮໍ່າຮຽນ ແລະສືບຫທອດເອົາຊົ່ວກາລະນານ.

 

ຈາກນັ້ນຄະນະຜູ້ແທນທັງສອງຝ່າຍ ແລະພາກສ່ວນທີ່ກ່ຽວຂ້ອງກໍ່ໄດ້ວາງພວງມະລາເພື່ອລະນຶກເຖິງຄວາມຮູ້ບຸນຄຸນຂອງພະນັກງານ-ນັກຮົບທະຫານອາສາສະໝັກ ແລະຊ່ຽວຊານ ຫວຽດນາມ ທີ່ເສຍສະຫຼະຊີວິດໃນປາງສົງຄາມໃນຄັ້ງນີ້ພ້ອມນຳເອົາຮ່າງອັດຖິດັ່ງກ່າວຂຶ້ນສູ່ລົດ ແລະນຳສົ່ງກັບຄືນປະເທດຫວຽດນາມຢ່າງສົມກຽດ.

----

ຂ່າວ: ທິດລານີ ໂຄດໂຍທາ