ລັດວິສາຫະກິດນໍ້າມັນເຊື້ອໄຟວຽງຈັນ ຮ່ວມກັບ ຊິໂນລາວ ລົງທຶນຈຳໜ່າຍນໍ້າມັນໃນຮູບແບບຂາຍຍົກ ແລະຂາຍຍ່ອຍ

ວັນທີ 26 ພຶດສະພາ 2023 ນີ້, ບໍລິສັດລັດວິສາຫະກິດນໍ້າມັນເຊື້ອໄຟວຽງຈັນ ກົມໃຫຍ່ພະລາທິການກອງທັບ, ໄດ້ຈັດພິທີເຊັນບົດບັນທຶກຄວາມເຂົ້າໃຈ ( MOU ) ກັບ ບໍລິສັດ ຊິໂນລາວ ລົງທືນ ຈໍາກັດ ເຊິ່ງພິທີເຊັນບົດບັນທຶກດັ່ງກ່າວແມ່ນໄດ້ຈັດຂື້ນຢູ່ທີ່ໂຮງແຮມແລນມາກ, ໂດຍໃຫ້ກຽດເຂົ້າຮ່ວມເປັນປະທານພິທີສັກຂີພະຍານຂອງ ສະຫາຍພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ມີ ສະຫາຍພົນຕີ ຄໍາເພັດ ສີຊານົນ ຫົວໜ້າກົມໃຫຍ່ພະລາທິການກອງທັບ, ຄະນະນໍາກະຊວງ, ຫ້ອງວ່າການກະຊວງ, ຄະນະອໍານວຍການບໍລິສັດ ລັດວິສາຫະກິດນໍ້າມັນເຊື້ອໄຟວຽງຈັນ, ບໍລິສັດ ຊິໂນລາວ ລົງທຶນ ຈໍາກັດ, ບັນດາກົມວິຊາສະເພາະ, ຫ້ອງການ, ພະແນກການ, ພະນັກງານທີ່ກ່ຽວຂ້ອງ ແລະບັນດາທ່ານແຂກທີ່ມີກຽດຖືກເຊີນເຂົ້າຮ່ວມ.

ສະຫາຍພັນເອກ ຈັນທາ ທໍາມະເທວາ ຮອງຫົວໜ້າກົມເສນາພະລາກົມໃຫຍ່ພະລາທິການກອງທັບ, ຫົວໜ້າຄະນະປັບປຸງຫົວໜ່ວຍການຜະລິດ-ທຸລະກິດ ທີ່ຂື້ນກັບກົມໃຫຍ່ພະລາທິການກອງທັບ, ໄດ້ຂື້ນຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການອະນຸມັດໃຫ້ ບໍລິສັດລັດວິສາຫະກິດນໍ້າມັນເຊື້ອໄຟວຽງຈັນ ຈັດຕັ້ງພິທີເຊັນ ບົດບັນທຶກຄວາມເຂົ້າໃຈ (MOU) ກັບ ບໍລິສັດ ຊິໂນລາວ ລົງທຶນ ຈຳກັດ, ກ່ຽວກັບການຮ່ວມທຸລະກິດນໍາເຂົ້ານໍ້າມັນ ແລະສ້າງຕັ້ງ ບໍລິສັດ ລັດວິສາຫະກິດປະສົມ ອີງຕາມໜັງສືສະເໜີຂອງ ບໍລິສັດ ຊິໂນລາວ ລົງທຶນ ຈຳກັດ, ສະບັບເລກທີ 01/ຊນລ ແລະ ສະບັບເລກ ທີ 02/ຊນລ, ລົງວັນທີ 31/03/2023, ອີງຕາມ ໜັງສືສະເໜີຂໍທິດຊີ້ນຳ ຂອງກົມໃຫຍ່ພະລາທິການກອງທັບ ສະບັບເລກທີ 213/ກພລ, ລົງວັນ ທີ 04 ເມສາ 2023,ກະຊວງປ້ອງກັນປະເທດຕົກລົງອະນຸມັດໃຫ້ ບໍລິສັດ ລັດວິສາຫະກິດນໍ້າມັນເຊື້ອໄຟວຽງຈັນ ເຊັນບົດບັນທຶກຄວາມເຂົ້າໃຈ (MOU) ກັບ ບໍລິສັດ ຊິໂນລາວ ລົງທຶນ ຈຳກັດ,ເຊິ່ງຈຸດປະສົງຂອງການເຊັນບົດບັນທຶກຂື້ນໃນຄັ້ງນີ້, ໜື່ງແມ່ນເພື່ອຮ່ວມທຸລະກິດນຳເຂົ້ານໍ້າມັນມາຈຳໜ່າຍຕາມຮູບແບບຂາຍຍົກ ແລະ ຂາຍຍ່ອຍ ໃນ ສ ປປ ລາວ, ສອງ ຮ່ວມສ້າງຕັ້ງບໍລິສັດ ລັດວິສາຫະກິດປະສົມ ເພື່ອກໍ່ສ້າງສາງຮອງສະສົມນໍ້າມັນ ໃນກໍລະນີສຸກເສີນ, ສາງຈໍາໜ່າຍຂາຍຍົກ ແລະສ້າງລະບົບທໍ່ສູບສົ່ງນໍ້າມັນສຳເລັດຮູບ.

ໃນໂອກາດເຂົ້າຮ່ວມເປັນປະທານພິທີເຊັນບົດບັນທຶກຄວາມເຂົ້າໃຈ ( MOU ) ລະຫວ່າງທັງສອງບໍລິສັດໃນຄັ້ງນີ້, ສະຫາຍພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ກໍ່ໄດ້ມີຄໍາເຫັນໂອ້ລົມຕໍ່ພິທີ, ໂດຍໄດ້ເນັ້ນໜັກໃຫ້ທັງສອງຝ່າຍ,ຈົ່ງເອົາໃຈໃສ່ເປັນເຈົ້າການຍົກສູງຄວາມຮັບຜິດຊອບຂອງຕົນເອງເຂົ້າໃນໜ້າທີ່ວຽກງານວິຊາສະເພາະດ້ວຍຄວາມຮັບຜິດຊອບສູງ, ໂດຍສະເພາະ ດ້ານຂອດການຈັດຕັ້ງປະຕິບັດໃນການນໍາເຂົ້ານໍ້າມັນເຊື້ອໄຟແຕ່ລະຊະນິດທຸກຄັ້ງ, ຕ້ອງໄດ້ເອົາໃຈໃສ່ຕິດຕາມ, ກວດກາ, ຈົດບັນທຶກຢ່າງລະອຽດ, ເປັນຕົ້ນແມ່ນການຮັບ ແລະເບີກຈ່າຍນໍ້າມັນຕ້ອງໄດ້ມີການປະສານສົບກັບຂັ້ນເທິງ ຢ່າງເປັນປະຈໍາ ເພື່ອສະຫຼຸບບັນຊີລາຍງານໃຫ້ໜ່ວຍງານວິຊາສະເພາະກໍ່ຄືການຈັດຕັ້ງທີ່ກ່ຽວຂ້ອງເປັນປົກກະຕິ, ພ້ອມທັງເປັນເຈົ້າການຕ້ານທຸກໆປະກົດການຫຍໍ້ທໍ້ຕ່າງໆທີ່ຈະເກີດຂື້ນພາຍໃນສັງຄົມກໍຄືຢູ່ໃນກອງທັບປະຊາຊົນລາວໃຫ້ທັນການ, ປະສານສົມທົບກັບພາກສ່ວນທີ່ກ່ຽວຂ້ອງເພື່ອພ້ອມກັນຈັດຕັ້ງປະຕິບັດຕາມລະບຽບກົດໝາຍ, ຕາມສັນຍາທີ່ລະບຸໄວ້ແຕ່ລະມາດຕາຢ່າງເຂັ້ມງວດ, ຖືກຕ້ອງ ແລະທັນເວລາ. ຈາກນັ້ນ, ທັງສອງຝ່າຍກໍ່ໄດ້ເຊັນບົດບັນທຶກຄວາມເຂົ້າໃຈຮ່ວມກັນດັ່ງກ່າວໄວ້ເປັນຫຼັກຖານອີກດ້ວຍ.
ຂ່າວ-ພາບໂດຍ: ຄໍາປະສົງ ລາດຊະວົງ.

แชร์