ສຟລ ເປີດກອງປະຊຸມພົບປະສະມາຊິກ

ເມື່ອວັນທີ 24 ພຶດສະພາ 2023 ທີ່ສະພາການຄ້າ ແລະອຸດສະຫະກຳແຫ່ງຊາດລາວ ນະຄອນຫຼວງວຽງຈັນ ສະມາຄົມເຟີນິເຈີລາວ ຫຼື ສຟລ ໄດ້ຈັດກອງປະຊຸມພົບປະສະມາຊິກ ສຟລ ໃນການກະກຽມຄວາມພ້ອມຂອງການຈັດງານວາງສະແດງເຄື່ອງເຮືອນລາວ ຄັ້ງທີ 6 ປະຈຳປີ 2023 ພາຍໃຕ້ການເປັນປະທານຂອງທ່ານ ທອງດຳ ສີຫາມາຍາ ປະທານສະມາຄົມເຟີນິເຈີລາວ, ພ້ອມນີ້ກໍມີຄະນະປະທານ, ບັນດາໂຮງງານສະມາຊິກ, ພະນັກງານ ແລະສື່ມວນຊົນເຂົ້າຮ່ວມ.


ທ່ານ ທອງດຳ ສີຫາມາຍາ ກ່າວວ່າ: ວຽກງານວາງສະແດງສີນຄ້າຖືວ່າມີຄວາມສຳຄັນທີ່ສຸດສຳລັບຫົວໜ່ວຍທຸລະກິດເຟີນີເຈີຂອງພວກເຮົາເພື່ອໄດ້ໃຫ້ນຳເອົາຜະລິດຕະພັນໃໝ່ໆ ທີ່ເປັນສີໄມ້ລາຍມືຂອງນາຍຊ່າງລາວເຮົາບວກກັບໄມ້ທີ່ມີຄຸນຄ່າສູງມີຄຸນນະພາບດີມາວາງສະແດງ-ຂາຍ ໃຫ້ຜູ້ເຂົ້າມາຊົມງານໄດ້ມີໂອກາດຈັບຈ່າຍ-ຊື້ຂາຍທັງເປັນການຕອບສະໝອງຕາມຄວາມຮຽກຮ້ອງຕ້ອງການຂອງສັງຄົມປະຈຸບັນ ແລະກ້າວເຂົ້າຫາຕະຫຼາດສາກົນໃນໂອກາດຕໍ່ໄປເນື່ອງຈາກວ່າມາເຖິງເວລານີ້ທຸລະກິດໄມ້ລາວກໍ່ມີຄວາມອາດສາມາດ ແລະຄວາມພ້ອມໃນລະດັບໜຶ່ງແລ້ວ.

ສະນັ້ນໃນກອງປະຊຸມຄັ້ງນີ້ຈື່ງມີການພົບປະບັນດາເຈົ້າຂອງໂຮງງານທີ່ເປັນສະມາຊິກ ແລະນອກສະມາຊິກເພື່ອລະດົມໃຫ້ເຂົ້າມາເປັນສະມາຊິກ, ມີການລາຍງານຜົນງານການເຄື່ອນໄຫວຂອງສະມາຄົມເຟີນິເຈີໃນຜ່ານມາ, ພ້ອມແຈ້ງໃຫ້ຮູ້ກ່ຽວກັບການກະກຽມຈະຈັດງານວາງສະແດງເຄື່ອງເຮືອນລາວຄັ້ງທີ 6 ແລະການກະກຽມຈັດງານສະເຫຼີມສະຫຼອງວັນສ້າງຕັ້ງສະມາຄົມເຟີນິເຈີລາວຄົບຮອບ 20 ປີທີ່ຈະຈັດຂຶ້ນໃນກາງເດືອນກໍລະກົດ 2023 ນີ້ ນອກຈາກນັ້ນຍັງມີການນຳສະເໜີກ່ຽວກັບການສ້າງຕະຫຼາດໄມ້ລາວ ທີ່ຈະເປັນໃບໜ້າໃໝ່ໃຫ້ກັບ ສຟລ ກໍຄືສີນຄ້າໄມ້ລາວໄດ້ມີພື້ນທີ່ວາງຈຳໜ່າຍ ແລະແລກປ່ຽນຊື້-ຂາຍສິນຄ້າໄມ້ທີ່ໄດ້ມາດຕະຖານໄວ້ຮອງຮັບລູກຄ້າທັງພາຍໃນ ແລະຕ່າງປະເທດ.

ທ່ານ ທອງດຳ ສີຫາມາຍາ ຍັງກ່າວຕື່ມອີກວ່າ: ຜ່ານມາການນຳສະເໜີໃນກອງປະຊຸມບັນດາຜູ້ເຂົ້າຮ່ວມຍັງໄດ້ມີການສະເໜີຕື່ມຫຼາຍບັນຫາທີ່ສ້າງສັນເພື່ອໃຫ້ ສຟລ ກໍຄືສະມາຊິກໄດ້ມີການປັບປຸງ ຫຼືພັດທະນາສະມາຄົມ, ຜະລິດຕະພັນສິນຄ້າ, ການຕະຫຼາດກ່ອນກ້າວໄປບຸກຕະຫຼາດພາຍໃນ ແລະຕ່າງປະເທດ ໃຫ້ໄດ້ຫຼາຍຂຶ້ນກວ່າເກົ່າໃນອານາຄົດ.

แชร์