ບໍລິສັດ ພູເບ້ຍ ມາຍນິງ ໄດ້ຮັບໃບຢັ້ງຢືນການຄຸ້ມຄອງສານໄຊຢານາຍຂອງສາກົນ

ບໍລີສັດ ພູເບ້ຍ ມາຍນິງ ໄດ້ຮັບໃບຢັ້ງຢືນການຄຸ້ມຄອງສານໄຊຢານາຍໃນການປະຕິບັດຕາມລະບຽບຫຼັກການຢ່າງຄົບຖ້ວນຢູ່ໂຄງການຂຸດຄົ້ນ-ປຸງແຕ່ງຄໍາ-ເງິນ ບ້ານ ຫ້ວຍຊາຍ ຕາມຫຼັກການຄຸ້ມຄອງສານໄຊ​ຍານາຍຂອງສາກົນ (Cyanide Code) ຈາກສະຖາບັນຄຸ້ມຄອງສານໄຊຍານາຍສາກົນ (ICMI).

ການກວດສອບ ໄດ້ດໍາເນີນໂດຍຊ່ຽວຊານເອກະລາດ ແລະໄດ້ຮັບການຍອມຮັບຈາກ ICMI ໃນວັນທີ 23 ມີນາ 2023. ຜູ້ກວດສອບປະເມີນພາກການສະໜອງຂອງບໍລິສັດ ຕາມຫຼັກການຄຸ້ມຄອງສານໄຊ​ຍານາຍຂອງສາກົນ ແລະພົບວ່າໄດ້ປະຕິບັດຕາມຫຼັກການຂົນສົ່ງ ແລະມາດຕະຖານປະຕິບັດເພື່ອຄຸ້ມຄອງສານໄຊຍານາຍ.

ຫຼັກການດັ່ງກ່າວແມ່ນໂຄງການແບບສະໝັກໃຈເຊິ່ງຖືກອອກແບບມາເພື່ອປັບປຸງການຈັດຕັ້ງປະຕິບັດການຄຸ້ມຄອງສານໄຊຍານາຍຂອງສາກົນໃນອຸດສາຫະກຳຂຸດຄົ້ນຄໍາ. ຈຸດປະສົງເພື່ອເພີ່ມທະວີຄວາມປອດໄພຂອງຜູ້ອອກແຮງງານທີ່ອາດສໍາຜັດກັບສານໄຊຍານາຍ, ຫຼຸດຜ່ອນຜົນກະທົບດ້ານສິ່ງແວດລ້ອມຈາກສານໄຊຍານາຍ, ແລະ ເສີມຂະຫຍາຍວິທີການຕອບໂຕ້ໃນກໍລະນີເກີດອຸປະຕິເຫດ ຫຼື ມີການຮົ່ວໄຫຼ. ບໍລິສັດຕ້ອງມີການກວດສອບອີກໃນສາມປີຂ້າງໜ້າເພື່ອສືບຕໍ່ຮັກສາການປະຕິບັດຕາມຫຼັກການດັ່ງກ່າວ.

ໂຄງການບ້ານຫ້ວຍຊາຍ ໄດ້ຮັບການຢັ້ງຢືນການຄຸ້ມຄອງສານດັ່ງກ່າວຄັ້ງທຳອິດໃນປີ 2012 ໃນໄລຍະກ່ອນການດຳເນີນງານ, ແລະໄດ້ຮັບການຢັ້ງຢືນການຄຸ້ມຄອງເຕັມສ່ວນໃນປີ 2013. ເຂດດໍາເນີນງານ ໄດ້ຮັບຢັ້ງຢືນຄືນໃນປີ 2016, ມີການປະເມີນໃນປີ 2019 ແລະ ສໍາເລັດຂັ້ນຕອນປະເມີນອີກຄັ້ງໃນປີ 2022. ໂຄງການບ້ານຫ້ວຍຊາຍ ນຳໃຊ້ສານໄຊຢານາຍເຂົ້າໃນຂະບວນການຜະລິດປຸງແຕ່ງແຮ່ແຕ່ບໍ່ມີການນຳໃຊ້ສານດັ່ງກ່າວຢູ່ໂຄງການຂຸດຄົ້ນ-ປຸງແຕ່ງທອງ-ຄຳພູຄຳ.

ທ່ານ ດາລິງ ເຊັງ, ຜູ້ອໍານວຍການໃຫຍ່ ແລະປະທານບໍລິຫານບໍລິສັດ ແພນອອສ໌ ຈໍາກັດ ກ່າວຊົມເຊີຍພະນັກງານບໍລິສັດ ພູເບ້ຍ ມາຍນິງ ທີ່ໄດ້ຮັບໃບຢັ້ງຢືນ, ເນັ້ນໃຫ້ເຫັນເຖິງຄວາມສໍາຄັນຂອງການເກັບຮັກສາ ແລະການຂົນສົ່ງສານໄຊຢານາຍໃຫ້ປອດໄພທີ່ພວກເຮົາປະຕິບັດຢູ່ເຂດດໍາເນີນງານຂອງພວກເຮົາ.

ທ່ານ ດາລິງ ເຊັງ ກ່າວວ່າ: “ຢູ່ ບໍລິສັດ ແພນອອສ໌, ການຄຸ້ມຄອງສານໄຊຢານາຍທີ່ມີຄວາມຮັບຜິດຊອບ ແລະປອດໄພ ແມ່ນພື້ນຖານຫຼັກຂອງການດໍາເນີນງານພວກເຮົາໃນລາວ. ມັນແມ່ນຄວາມພະຍາຍາມຂອງພະນັກງານພວກເຮົາຜູ້ທີ່ສືບຕໍ່ຈັດຕັ້ງປະຕິບັດຂັ້ນຕອນຄຸ້ມຄອງສານໄຊຢານາຍທີ່ປອດໄພ ແລະມີປະສິດທິພາບຫຼາຍທີ່ສຸດໃນປະຈຸບັນ ຢູ່ໂຮງງານບ້ານຫ້ວຍຊາຍ.”

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງກ່າວຕື່ມວ່າ: “ພວກເຮົາພາກພູມໃຈທີ່ໄດ້ຮັບການຢັ້ງຢືນຄືນເປັນຄັ້ງທີຫ້າ, ເຊິ່ງສະແດງໃຫ້ເຫັນຜົນສໍາເລັດຂອງພວກເຮົາເພື່ອສ້າງໃຫ້ໄດ້ມາດຕະຖານສາກົນ ແລະການຈັດຕັ້ງປະຕິບັດດີທີ່ສຸດຂອງອຸດສາຫະກໍາ.”

แชร์