ລາວ-ມາເລເຊຍ ຮ່ວມມືດ້ານພະລັງງານ ແລະພັດທະນາແຫລ່ງຜະລິດ

ລັດວິສາຫະກິດໄຟຟ້າລາວ ແລະບໍລິສັດ ທີເອັນບີ ພາວເວີ ເຈນເນີເຣຊັນ ປະເທດມາເລເຊຍ (TNB Power Generation Sdn. Bhd.) ຮ່ວມລົງນາມບົດບັນທຶກຊ່ວຍຈໍາ ວ່າດ້ວຍການສຶກສາຄວາມເປັນໄປໄດ້ໃນການຮ່ວມມືດ້ານພະລັງງານ ແລະພັດທະນາແຫລ່ງຜະລິດຢູ່ລາວ ໃນອະນາຄົດ, ຖືເປັນບາດກ້າວສຳຄັນໜຶ່ງຂອງ ສປປ ລາວ ໃນການເປັນໝໍ້ໄຟຟ້າແຫ່ງອາຊຽນ.

ພິທີລົງນາມບົດບັນທຶກຊ່ວຍຈໍາວ່າດ້ວຍການສຶກສາຄວາມເປັນໄປໄດ້ໃນການຮ່ວມມືດ້ານພະລັງງານ ແລະພັດທະນາແຫລ່ງຜະລິດຊື້-ຂາຍພະລັງງານໄຟຟ້າ ລະຫວ່າງ ລາວ ແລະມາເລເຊຍ ໄດ້ຈັດຂຶ້ນໃນວັນທີ 25 ພຶດສະພາ 2023 ທີ່ນະຄອນຫລວງວຽງຈັນ, ຮ່ວມລົງນາມໂດຍທ່ານ ຈັນທະບູນ ສຸກອາລຸນ ຜູ້ອໍານວຍການໃຫຍ່ລັດວິສາຫະກິດໄຟຟ້າລາວ ແລະທ່ານ ດາໂຕະ ອິນເດຣາ ອິລ ບາຮາຣິນ ດິນ (Dato Ir. Baharin Din) ປະທານສະພາບໍລິຫານບໍລິສັດ ທີເອັນບີ ພາວເວີ ເຈນເນີເຣຊັນ ປະເທດມາເລເຊຍ, ມີທ່ານ ແອັດດີ້ ອີຣາວານ ມາໝຸດ ເອກອັກຄະຣາຊະທູດມາເລເຊຍ ປະຈໍາລາວ, ມີການນຳຂອງກະຊວງ ແລະ ພາກສ່ວນກ່ຽວຂ້ອງສອງຝ່າຍ ເຂໄ້າຮ່ວມເປັນສັກຂີພິຍານ.

ບໍລິສັດ ທີເອັນບີ ພາວເວີ ເຈນເນີເຣຊັນ ເປັນບໍລິສັດຊັ້ນນຳຂອງໄຟຟ້າແຫ່ງຊາດຂອງປະເທດມາເລເຊຍ ໃນການລົງທຶນດ້ານພະລັງງານ, ມີການຮ່ວມມືກັບລັດວິສາຫະກິດໄຟຟ້າລາວໃນໄລຍະຜ່ານມາ, ໃນການສຶກສາຄວາມເປັນໄປໄດ້ ເພື່ອຊື້-ຂາຍພະລັງງານໄຟຟ້າຂ້າມຊາຍແດນໃນພາກພື້ນອາຊຽນເປັນຄັ້ງທໍາອິດພາຍໃຕ້ໂຄງການຮ່ວມມືດ້ານພະລັງງານໄຟຟ້າລະຫວ່າງ 3 ປະເທດ ລາວ-ໄທ ແລະມາເລເຊຍ ໃນການສົ່ງອອກໄຟຟ້າໄປຂາຍຢູ່ສິງກະໂປ, ປະກອບ ສ່ວນເຮັດໃຫ້ປະເທດລາວ ກາຍເປັນໝໍ້ໄຟຟ້າແຫ່ງອາຊຽນຢ່າງແທ້ຈິງ.

ການຮ່ວມລົງນາມສຶກສາຄວາມເປັນໄປໄດ້ໃນຮ່ວມມືດ້ານພະລັງງານ ແລະພັດທະນາແຫລ່ງຜະລິດເພື່ອຊື້-ຂາຍໄຟຟ້າລະຫວ່າງລາວ ແລະມາເລເຊຍໃນຄັ້ງນີ້ໄດ້ກາຍເປັນຄູ່ຮ່ວມຍຸດທະສາດທາງທຸລະກິດດ້ານພະລັງງານລະຫວ່າງສອງບໍລິສັດ ໂດຍນໍາໃຊ້ແຫລ່ງພະລັງງານໝູນວຽນທີ່ປະເທດລາວມີທ່າແຮງ, ນອກຈາກ ເປັນຜູ້ສະໜອງພະລັງງານໃຫ້ບັນດາປະເທດໃກ້ຄຽງແລ້ວ, ສປປ ລາວ ຍັງມີວິໄສທັດໃນການຈັດຕັ້ງປະຕິບັດໝໍ້ໄຟຟ້າແຫ່ງອາຊຽນ ດ້ວຍການຊື້-ຂາຍ ແລະ ແລກປ່ຽນໄຟຟ້າພາຍໃນພາກພື້ນອາຊຽນ.

ທ່ານ ຈັນທະບູນ ສຸກອາລຸນ ກ່າວວ່າ: ປັດຈຸບັນ, ສປປ ລາວ ເປັນຜູ້ນຳໃນດ້ານການພັດທະນາແຫລ່ງຜະລິດພະລັງງານນຳ້ເຊິ່ງມີເຖິງ 80 ແຫລ່ງຜະລິດພະລັງງານທີ່ກຳລັງຜະລິດຢູ່, ໃນການຮ່ວມມືກັບ TNB ໃນຄັ້ງນີ້, ພວກເຮົາສາມາດເພີ່ມປະລິມານການຜະລິດ ແລະກໍເປັນກຽດທີ່ໄດ້ຮ່ວມມືກັບ TNB ຈົນນຳມາເຖິງການເຊັນບົດບັນທຶກຄວາມເຂົ້າໃຈຄັ້ງນີ້ໃນການໃນການຮ່ວມມືດ້ານພະລັງງານທົດແທນ ແລະພັດທະນາແຫລ່ງຜະລິດ ຢູ່ ສປປ ລາວ ແລະເປັນໂອກາດໃຫ້ແກ່ການຮ່ວມມືທາງທຸລະກິດອື່ນໆລະຫວ່າງສອງຝ່າຍ

แชร์