ຍີ່ປຸ່ນ ສືບຕໍ່ມອບທຶນ ມູນຄ່າ 343 ລ້ານເຢັນ ເພື່ອການພັດທະນາຊັບພະຍາກອນມະນຸດ ລະດັບປະລິນຍາໂທ ແລະປະລິນຍາເອກ

ໃນວັນທີ 22 ພຶດສະພານີ້, ທີ່ກະຊວງການຕ່າງປະເທດໄດ້ມີພິທີລົງນາມເອກະສານແລກປ່ຽນໂຄງການທຶນການສຶກສາເພື່ອການພັດທະນາຊັບພະຍາກອນມະນຸດ (ລະດັບປະ ລິນຍາໂທ ແລະປະລິນຍາເອກ) ຫຼື ທຶນ JDS, ມູນຄ່າ 343 ລ້ານເຢັນ ຈາກລັດຖະບານຍີ່ປຸ່ນ ໃຫ້ແກ່ລັດຖະບານ ສປປ ລາວ. ຕາງໜ້າຝ່າຍລາວລົງນາມໂດຍທ່ານ ໂພໄຊ ໄຂຄຳພິທູນ ຮອງລັດຖະມົນຕີກະຊວງການຕ່າງປະເທດ ແລະຝ່າຍຍີ່ປຸ່ນລົງນາມໂດຍທ່ານ ໂຄບະຢະຊິ ເຄນອິຈິ (KOBAYA SHI Kenichi) ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ.

ທຶນ JDS ແມ່ນທຶນການສຶກສາ ລະດັບປະລິນຍາໂທ ແລະປະລິນຍາເອກທີ່ລັດຖະບານຍີ່ປຸ່ນສະໜອງໃຫ້ແກ່ ສປປ ລາວ ເພື່ອແນໃສ່ຍົກລະດັບຄວາມຮູ້-ຄວາມສາມາດ ຂອງພະນັກງານ-ລັດຖະກອນຂອງລາວ. ນັບແຕ່ປີ 1999 ມາຮອດປະຈຸບັນ ສປປ ລາວ ໄດ້ຮັບທຶນການສຶກສາ JDS ລວມທັງໝົດ 474 ທຶນ (ສະເລ່ຍປີລະ 20 ທຶນ) ຊຶ່ງມີບັນດາພະນັກງານຈາກຂະແໜງການສຶກສາ, ສາທາລະນະສຸກ, ກະສິກໍາ ແລະປ່າໄມ້, ໂຍທາທິການ ແລະຂົນສົ່ງ ແລະຂະແໜງການອື່ນໆຂອງ ສປປ ລາວ ໄດ້ຮັບຄັດເລືອກເພື່ອໄປສຶກສາຕໍ່ຢູ່ປະເທດຍີ່ປຸ່ນຊຶ່ງໄດ້ປະກອບສ່ວນສໍາຄັນເຂົ້າໃນການຍົກລະດັບຄຸນນະພາບຂອງບຸກຄະລາກອນລາວ.

ໃນໂອກາດນີ້, ທ່ານ ໂພໄຊ ໄຂຄຳພິທູນ ກໍໄດ້ຕາງໜ້າໃຫ້ລັດຖະບານ ແລະ ປະຊາຊົນລາວສະແດງຄວາມຂອບໃຈຢ່າງຈິງໃຈ ແລະ ຕີລາຄາສູງຕໍ່ການສະໜັບສະໜູນ ຊ່ວຍເຫລືອຂອງລັດຖະບານກໍຄືປະຊາຊົນຍີ່ປຸ່ນຕະຫລອດໄລຍະທີ່ຜ່ານມາໂດຍສະເພາະການຊ່ວຍເຫລືອທາງການເພື່ອການພັດທະນາ (ODA) ຂອງຍີ່ປຸ່ນທີ່ຍັງຢູ່ໃນອັນດັບຕົ້ນຂອງການຊ່ວຍເຫຼືອຈາກຕ່າງປະເທດໃຫ້ແກ່ ສປປ ລາວ (ສະເລ່ຍປະມານ 90-100 ລ້ານໂດລາສະຫະລັດ ຕໍ່ປີ). ວຽກງານການສຶກສາກໍຄືການພັດທະນາຊັບພະຍາກອນມະນຸດແມ່ນຂະແໜງການໜຶ່ງທີ່ລັດຖະບານລາວຖືເປັນບູລິມະສິດສໍາຄັນ ແລະເປັນປັດໄຈສໍາຄັນຕໍ່ການພັດທະນາເສດຖະກິດ-ສັງຄົມຂອງຊາດ ຊຶ່ງໃນໄລຍະຜ່ານມາ, ລັດຖະບານກໍຄືປະຊາຊົນຍີ່ປຸ່ນໄດ້ສະໜັບສະໜູນ ສປປ ລາວ ໃນການພັດທະນາວຽກງານການສຶກສາກໍຄືການພັດທະນາຊັບພະຍາກອນມະນຸດຢ່າງຕໍ່ເນື່ອງ ແລະສະໝໍ່າສະເໝີເປັນຕົ້ນແມ່ນການກໍ່ສ້າງ-ປັບປຸງໂຮງຮຽນຢູ່ໃນເຂດຫ່າງໄກສອກຫລີກ, ການສະໜອງອຸປະກອນການສຶກສາທີ່ຈໍາເປັນ, ການສະໜອງທຶນການສຶກສາ ແລະອື່ນໆ.
ທີ່ມາ: ຂປລ.:ວຽງສະຫວັນ, ເກດສະໜາ

แชร์