ອຸຍນິເຊັບ ມອບອຸປະກອນໄອທີ ສົ່ງເສີມການມີສ່ວນຮ່ວມຂອງຊຸມຊົນໃນວຽກສັກວັກຊິນ

  ໃນວັນທີ 17 ພຶດສະພາ 2023 ນີ້, ລັດຖະບານອົດສະຕຣາລີ ເເລະລັດຖະບານອີຕາລີ ໄດ້ມອບອຸປະກອນໄອທີ ຜ່ານອົງການອຸຍນີເຊບ ປະຈຳລາວ ໃຫ້ກະຊວງຖະແຫລ່ງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ເພື່ອຊຸກຍູ້ສົ່ງເສີມການມີສ່ວນຮ່ວມຂອງຊຸມຊົນໃນວຽກງານສັກວັກຊິນກັນພະຍາດທົ່ວໄປ ເເລະ ພະຍາດໂຄວິດ-19, ພ້ອມທັງຊຸກຍູ້ວຽກງານໂຄສະນາສິດທິຂອງແມ່ຍິງ ແລະເດັກນ້ອຍ ໃນ ສປປ ລາວ, ຕາງໜ້າມອບໂດຍ ທ່ານ ນາງ Maryam Abdu ວ່າການເເທນຮອງຜູ້ຕາງໜ້າອົງການອຸຍນີເຊບ ປະຈຳລາວ ແລະຕາງໜ້າຮັບໂດຍທ່ານ ໂພສີ ແກ້ວມະນີວົງ, ຮອງລັດຖະມົນຕີກະຊວງ ຖວທ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ອຸປະກອນທີ່ນຳມາມອບໃນຄັ້ງນີ້, ປະກອບມີ: ໂທລະໂຄ່ງ, ແລັບທອບ, ຄອມພິວເຕີຕັ້ງໂຕະ, ເຄື່ອງພິມ, ຈັກໂຟໂຕກອບປີ, ຈໍໂປຣເຈັກເຕີ (LCD) ເເລະ ກ້ອງຖ່າຍຮູບ ເຊິ່ງອຸປະກອນດັ່ງກ່າວຈະຊ່ວຍໃນການຈັດກິດຈະກຳນຳຊຸມຊົນເພື່ອສົ່ງເສີມການສັກວັກຊິນກັນພະຍາດໂຄວິດ-19 ເເລະ ວັກຊິນປົກກະຕິສຳລັບເດັກນ້ອຍ, ພ້ອມທັງຊຸກຍູ້ການສົນທະນາໃນຊຸມຊົນເພື່ອສ້າງຄວາມເຂົ້າໃຈກ່ຽວກັບການລະບາດຂອງພະຍາດ ແລະຜົນດີຂອງວັກຊິນ.

ທ່ານ ນາງ Maryam Abdu ໄດ້ກ່າວວ່າ: ອົງການອຸຍນີເຊບມີຄວາມມຸ່ງໝັ້ນທີ່ຈະສະໜັບສະໜູນລັດຖະບານ ແຫ່ງ ສປປ ລາວ ໃນການປະຕິບັດວຽກງານສື່ສານຄວາມສ່ຽງ ແລະກິດຈະກໍາເພື່ອສົ່ງເສີມການມີສ່ວນຮ່ວມຂອງຊຸມຊົນໃນວຽກງານສັກວັກຊິນກັນພະຍາດທົ່ວໄປ ເເລະວັກຊິນເຂັມກະຕຸ້ນສຳລັບ ໂຄວິດ-19. ອຸປະກອນທີ່ໄດ້ສະໜອງໃນຄັ້ງນີ້, ສະແດງເຖິງການຮ່ວມມືອັນຍາວນານ ເເລະແໜ້ນເເຟ້ນຂອງພວກເຮົາກັບ ລັດຖະບານເເຫ່ງ ສປປ ລາວ ໂດຍສະເພາະໃນປີນີ້ເປັນປິທີ່ອົງການອຸຍນີເຊບ ສະເຫລີມສະຫລອງຄົບຮອບ 50 ປີ ໃນ ສປປ ລາວ ແລະ ຫວັງວ່າອຸປະກອນໄອທີເຫລົ່ານີ້ ຈະເປັນການປະກອບສ່ວນເຂົ້າໃນການ ເສີມສ້າງສາຍພົວພັນຮ່ວມມືດັ່ງກ່າວເພື່ອຜົນປະໂຫຍດຂອງແມ່ຍິງ ແລະເດັກນ້ອຍທຸກຄົນ ໃນ ສປປ ລາວ.

ໂອກາດນີ້, ທ່ານ ໂພສີ ແກ້ວມະນີວົງ ໄດ້ມີຄຳເຫັນວ່າ: ການໃຫ້ຂໍ້ມູນທີ່ຖືກຕ້ອງ ແລະມີຄວາມເໝາະສົມແມ່ນປັດໄຈສໍາຄັນໃນການປົກປ້ອງເດັກນ້ອຍ ແລະຄອບຄົວ ຈາກພະຍາດ ໂຄວິດ-19, ພວກເຮົາຕ້ອງສືບຕໍ່ໃຫ້ຄວາມສໍາຄັນໃນການໃຫ້ຂໍ້ມູນກ່ຽວກັບວິທີການປ້ອງກັນ ເເລະຄວບຄຸມພະຍາດໂຄວິດ-19 ແລະປະຕິບັດສຸຂະອະນາໄມ ເຊິ່ງອຸປະກອນໄອທີ ທີ່ໄດ້ຮັບໃນຄັ້ງນີ້ຈະເປັນການປະກອບສ່ວນອັນດີເຂົ້າໃນວຽກງານດັ່ງກ່າວ.
ຂ່າວ-ພາບ: ກິດຕາ

แชร์