ເຊັນບົດບັນທຶກຄຸ້ມຄອງວຽກພາສີ ແລະການນໍາເຂົ້າ-ສົ່ງອອກສິນຄ້າ ໃຫ້ດີຂຶ້ນ

ໃນວັນທີ 16 ພຶດສາພາ 2023, ທີ່ສະພາການຄ້າ ແລະອຸດສາຫະກໍາແຫ່ງຊາດລາວໄດ້ຈັດພິທີເຊັນບົດບັນທຶກຄວາມເຂົ້າໃຈລະຫວ່າງສະພາການຄ້າ ແລະອຸດສາຫະກໍາແຫ່ງຊາດລາວ ແລະ ກົມພາສີ ກະຊວງການເງິນ ໂດຍການເປັນປະທານຮ່ວມ ແລະ ເຊັນ ຂອງທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ແລະທ່ານ ພູເຂົາຄໍາ ວັນນະວົງໄຊ ຫົວໜ້າກົມພາສີກະຊວງການເງິນ, ມີບັນດາຫົວໜ້າພະແນກ, ຮອງພະແນກ ແລະພະນັກງານວິຊາການ ທັງສອງຝ່າຍເຂົ້າຮ່ວມ.

ບົດບັນທຶກຄວາມເຂົ້າໃຈສະບັບນີ້ ສ້າງຂຶ້ນເພື່ອກໍານົດຫຼັກການ ແລະກົນໄກການຮ່ວມມືລະຫວ່າງສອງຝ່າຍກໍຄືການແລກປ່ຽນຂໍ້ມູນຂ່າວສານ ແລະຄໍາຄິດຄໍາເຫັນ ກ່ຽວກັບການຄຸ້ມຄອງວຽກງານພາສີ ແລະການນໍາເຂົ້າ-ສົ່ງອອກສິນຄ້າ ແນໃສ່ເພື່ອຍົກສູງປະສິດທິພາບ, ປະສິດທິຜົນ ແລະຄວາມໂປ່ງໃສໃນການຈັດຕັ້ງປະຕິບັດກົດໝາຍ ແລະລະບຽບການທີ່ຕິດພັນກັບວຽກງານພາສີ ແລະການຄ້າລະຫວ່າງປະເທດ.

• 17/05/2023