ມອບ-ຮັບ ໂຄງການກໍ່ສ້າງສະໜາມບິນໜອງຄ້າງ

ພິທີມອບ-ຮັບ ໂຄງການກໍ່ສ້າງສະໜາມບິນໜອງຄ້າງ ເມືອງຊໍາເໜືອ ແຂວງຫົວພັນ ຈັດຂຶ້ນໃນວັນ 15 ພຶດສະພາ 2023 ໃຫ້ກຽດເຂົ້າຮ່ວມຂອງທ່ານ ງາມປະສົງ ເມືອງມະນີ ລັດຖະມົນຕີກະຊວງ (ຍທຂ), ທ່ານ ວັນໄຊ ແພງຊຸມມາ ເຈົ້າແຂວງຫົວພັນ, ທ່ານ ເຈິນ ກັວກ ເຟືອງ ຮອງຄະນະກໍາມະທິການຮ່ວມມືຫວຽດນາມ-ລາວ, ທ່ານ ເຈິ່ນບ໋າວ ເຊີນຜູ້ອໍານວຍການໃຫຍ່ບໍລິສັດຫຸ້ນສ່ວນກະສິກໍາສາກົນຮວ່າງແອງຢາລາຍ, ມີບັນດາຄະນະນໍາເມືອງ, ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້ທ່ານ ພູທອງ ອິນທະແສງ ຫົວໜ້າໂຄງການກໍ່ສ້າງສະໜາມບິນໜອງຄ້າງຕາງໜ້າໃຫ້ເຈົ້າຂອງໂຄງການ, ກ່າວວ່າ: ການກໍ່ສ້າງສະໜາມບິນໜອງຄ້າງແມ່ນໄດ້ຈັດຢູ່ໃນປະເພດ 3C (Aerodrome Code 3C) ຊຶ່ງສາມາດຮອງຮັບເຮືອບິນປະເພດ 70-100 ບ່ອນນັ່ງ ໂຄງການກໍ່ສ້າງສະໜາມບິນໜອງຄ້າງເລີ່ມຕົ້ນຈັດຕັ້ງປະຕິບັດການກໍ່ສ້າງໃນວັນທີ 7 ຕຸລາ 2013, ໂດຍແມ່ນກົມການບິນພົນລະເຮືອນ ກະຊວງ ຍທຂ ເປັນເຈົ້າຂອງໂຄງການພາຍໃຕ້ທຶນກູ້ຢືມຈາກບໍລິສັດຮຸ້ນສ່ວນກະສິກໍາສາກົນຮວ່າງແອງຢາລາຍ ໃນມູນຄ່າທັງໝົດແມ່ນ 82.041.562 ໂດລາ, ໃນນັ້ນ. ມູນຄ່າເບື້ອງຕົ້ນ 74.006.320 ໂດລາ ແລະວຽກເພີ່ມຈໍານວນໜຶ່ງ 8.035.242 ໂດລາ.

ກ່າວມອບໃນຄັ້ງນີ້ໂດຍທ່ານ ເຈິ່ນບ໋າວ ເຊີນ ຜູ້ອໍານວຍການໃຫຍ່ບໍລິສັດຫຸ້ນສ່ວນກະສິກໍາສາກົນ ຮວ່າງແອງຢາລາຍ ແລະກ່າວຮັບໂດຍ ທ່ານ ວຽງໄຊ ສິງຄຳ ຫົວໜ້າກົມການບິນພົນລະເຮືອນ ກະຊວງ ຍທຂ, ພ້ອມທັງໄດ້ມີພິທີເຊັນມອບ - ຮັບໂຄງການ, ໂດຍຊ້ອງໜ້າທ່ານ ງາມປະສົງ ເມືອງມະນີ, ທ່ານ ວັນໄຊ ແພງຊຸມມາ ພ້ອມດ້ວຍແຂກທັງສອງຝ່າຍລາວ-ຫວຽດນາມພາກສ່ວນເຂົ້າຮ່ວມເປັນສັກຂີພິຍານ.
ທີ່ມາ: ປະຊາຊົນ

แชร์