ລັດຖະບານສືບຕໍ່ໂຄງການສົ່ງເສີມອາຫານທ່ຽງໃນໂຮງຮຽນໃຫ້ມີຄວາມຍືນຍົງ

ໂຄງການສົ່ງເສີ່ມອາຫານທ່ຽງໃນໂຮງຮຽນຢູ່ເມືອງຜົ້ງສາລີ ແຂວງຜົ້ງສາລີ ອົງການອາຫານໂລກໄດ້ມອບໃຫ້ລັດຖະບານເປັນຜູ້ສືບຕໍ່ຈັດຕັ້ງປະຕິບັດຊຶ່ງໄດ້ສະໜອງງົບປະມານອັດຕາກິນໃຫ້ເດັກນ້ອຍ 800 ກີບຕໍ່ຄົນຕໍ່ໜຶ່ງຄາບ, ປັດຈຸບັນໄດ້ຈັດຕັ້ງປະຕິບັດເປັນປົກກະຕິຢູ່ໂຮງຮຽນທັງໝົດ 49 ແຫ່ງໃນທົ່ວເມືອງໃນນີ້ມີໂຮງຮຽນອະນຸບານ 2 ແຫ່ງ ແລະປະຖົມສົມບູນ 47 ແຫ່ງ ພ້ອມນັ້ນຍັງປຸກລະດົມໃຫ້ສັງຄົມມີຄວາມຕື່ນຕົວປະກອບສ່ວນເປັນເງິນວັດຖຸດິບປຸງແຕ່ງອາຫານເພື່ອໃຫ້ເດັກໄດ້ກິນອີ່ມ ມີໂພຊະນາການ ແລະ ມາໂຮງຮຽນເປັນປົກກະຕິ.

ທ່ານ ນາງ ສາວຈັນ ລອດສຸລີ ຫົວໜ້າຫ້ອງການສຶກສາທິການ ແລະກິລາ ເມືອງຜົ້ງສາລີ ໄດ້ລາຍງານ ໃນວັນທີ 10 ພຶດສະພານີ້ວ່າ: ໂຄງການອາຫານທ່ຽງໃນໂຮງຮຽນໄດ້ຮັບການສະໜັບສະໜູນຈາກອົງການອາຫານໂລກຊຶ່ງຢູ່ເມືອງຜົ້ງສາລີໄດ້ຈັດຕັ້ງປະຕິບັດໂດຍການມີສ່ວນຮ່ວມຂອງປະຊາຊົນກໍຄືອໍານາດການປົກຄອງບ້ານ ແລະ ຜູ້ປົກຄອງຂອງນັກຮຽນ, ມາຮອດປັດຈຸບັນອົງການອາຫານໂລກໄດ້ມອບໂອນການຈັດຕັ້ງປະຕິບັດໂຄງການໃຫ້ແກ່ລັດຖະບານສືບຕໍ່ຈັດຕັ້ງປະຕິບັດເປັນທີ່ຮຽບຮ້ອຍແລ້ວ ຈາກນັ້ນລັດຖະບານໄດ້ສະໜອງງົບປະມານອັດຕາກິນໃຫ້ແກ່ເດັກນ້ອຍ 800 ກີບຕໍ່ຄົນຕໍ່ຄາບ ພ້ອມນັ້ນຫ້ອງການສຶກສາທິການ ແລະກິລາເມືອງຜົ້ງສາລີ ໄດ້ວາງແຜນປຸກລະດົມຜູ້ປົກຄອງເດັກພ້ອມກັນສືບຕໍ່ຈັດຕັ້ງປະຕິບັດໂຄງການໃນໂຮງຮຽນເປົ້າໝາຍ 45 ແຫ່ງ ຈາກນັ້ນໄດ້ຂະຫຍາຍການຈັດຕັ້ງປະຕິບັດໂຄງການໃຫ້ອາຫານທ່ຽງແກ່ເດັກນັກຮຽນຊັ້ນອະນຸບານ ແລະຊັ້ນປະຖົມເພີ່ມຕື່ມອີກສະນັ້ນມາຮອດສົກປີ 2022-2023 ລັດຖະບານໄດ້ສະໜອງງົບປະມານອາຫານທ່ຽງໃຫ້ນັກຮຽນທັງໝົດ 49 ແຫ່ງ ໃນນີ້ສາມາດຄັດເລືອກເປັນໂຮງຮຽນຕົວແບບ 5 ແຫ່ງຄື: ໂຮງຮຽນປະຖົມສາຍລົມ, ໂຮງຮຽນປະຖົມຜົ້ງແຊັກ, ໂຮງຮຽນປະຖົມພະຍາສີ, ໂຮງຮຽນປະຖົມຈີ້ໂຈະ ແລະໂຮງຮຽນປະຖົມສາລາເອບີ, ໂລຍະຜ່ານມາໄດ້ເຊື້ອເຊີນບັນດາເມືອງອ້ອມຂ້າງມາຖອດຖອນບົດຮຽນໃນການຈັດຕັ້ງປະຕິບັດຕື່ມອີກ.

ເພື່ອຮັບປະກັນການຈັດຕັ້ງປະຕິບັດໂຄງການໃຫ້ອາຫານທ່ຽງໃນໂຮງຮຽນມີຄວາມຍືນຍົງໄດ້ປຸກລະດົມໃຫ້ປະຊາຊົນມີຄວາມຕື່ນຕົວປະກອບສ່ວນດ້ວຍຄວາມສະໝັກໃຈຕາມເງື່ອນໄຂ ແລະ ຄວາມ ເໝາະສົມ ຕົວຢ່າງ: ໃນເຂດເທດສະບານເມືອງ ຜູ້ປົກຄອງໄດ້ຕື່ນຕົວປະກອບສ່ວນ 15.000 ກີບ ຫຼື 10.000 ກີບ ສ່ວນຢູ່ເຂດຫ່າງໄກສອກຫຼີກໄດ້ຕື່ນຕົວປະກອບສ່ວນ 1.000-5.000 ກີບຕໍ່ມື້ ນອກນີ້ຍັງໄດ້ປະກອບສ່ວນພືດຜັກຕາມລະດູການ, ອົງການອາຫານໂລກຍັງໄດ້ລະດົມທຶນຊ່ວຍເປັນຕົ້ນ ເຂົ້າ, ອາຫານ ແລະປາກະປ໋ອງຄຽງຄູ່ກັບການຊ່ວຍຊຸກຍູ້ການຜະລິດກະສິກໍາການປູກຝັງ- ລ້ຽງສັດ ເຊັ່ນ: ປູກພືດຜັກຕາມລະດູການ, ລ້ຽງເປັດ-ໄກ່.

ທ່ານນາງ ສາວຈັນ ລອດສຸລີ ກ່າວວ່າ: ຜ່ານການຈັດຕັ້ງປະຕິບັດໂຄງການເຫັນໄດ້ວ່ານັກຮຽນມາໂຮງຮຽນເປັນປົກກະຕິບໍ່ມີອັດຕາປະລະການຮຽນເຮັດໃຫ້ເດັກຄ້າງຫ້ອງຫຼຸດລົງ, ນອກນີ້ຍັງສ້າງຄວາມສາມັກຄີກັບເດັກນ້ອຍຄອບຄົວທີ່ທຸກຍາກກໍມີສິດໄດ້ກິນອາຫານເທົ່າທຽມກັນ. ຄຽງຄູ່ກັນນັ້ນກໍຍັງມີສິ່ງທ້າທາຍເປັນຕົ້ນ: ກຸ່ມບ້ານທີ່ຢູ່ເຂດຫ່າງໄກສອກຫຼີກ, ໄກຕະຫຼາດຈະບໍ່ໄດ້ກິນຕາມແບບໂພຊະນາການຍ້ອນການໄປ-ມາຫາສູ່ ພົບກັບຄວາມຫຍຸ້ງຍາກ, ເສັ້ນທາງທຸລະກັນດານພ້ອມນັ້ນການແຕ່ງອາຫານທ່ຽງໃນແຕ່ລະມື້ຜູ້ປົກຄອງມີການຜັດປ່ຽນໝູນວຽນເປັນແຕ່ລະມື້.

แชร์