ລັດຖະມົນຕີກະຊວງການເງິນ ເນັ້ນໃຫ້ເຈົ້າໜ້າທີ່ດ່ານພາສີບໍ່ເຕັນ ເອົາໃຈໃສ່ຮອບດ້ານເພື່ອສະກັດກັ້ນອັດຊ່ອງຫວ່າງຕ້ານການຮົ່ວໄຫຼ

ໃນວັນທີ 10 ພຶດສະພາຜ່ານມາ, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນພ້ອມດ້ວຍຄະນະໄດ້ລົງຢ້ຽມຢາມບັນດາດ່ານພາສີພ້ອມທັງຊີ້ນຳວຽກງານພາສີປະຈຳແຂວງເນື່ອງໃນໂອກາດທີ່ໄປເຄື່ອນໄຫວເຮັດວຽກທີ່ແຂວງຫຼວງນໍ້າທາໂດຍການຕ້ອນຮັບຂອງທ່ານ ບຸນແອງ ພັນທະວົງ ຫົວໜ້າພາສີປະຈຳແຂວງຫຼວງນໍ້າທາ.

ທ່ານ ບຸນແອງ ພັນທະວົງ ລາຍງານໃຫ້ຮູ້ເຖິງສະພາບຄວາມຫຍຸ້ງຍາກ ແລະສິ່ງທ້າທາຍຕໍ່ວຽກງານຂອງພາສີປະຈຳແຂວງໂດຍສະເພາະພື້ນຖານໂຄງລ່າງຂອງພາສີ ແຂວງຫຼວງ້າທາ ຍັງບໍ່ໄດ້ມາດຖານເທົ່າທີ່ຄວນ ແລະຢູ່ກະແຈກກະຈາຍເຮັດໃຫ້ການຄຸ້ມຄອງ ແລະການບໍລິການຕໍ່ຜູ້ປະກອບການຍັງພົບຄວາມຫຍຸ້ງຍາກ, ຊັກຊ້າເຊັ່ນການນຳເຂົ້າ-ສົ່ງອອກສິນຄ້າ ໂດຍສະເພາະຢູ່ດ່ານພາສີສາກົນບໍ່ເຕັນ. ປັດຈຸບັນ, ມີສາງຢູ່ສາມຈຸດ ແລະສາງ ຍັງມີຄວາມແອອັດ, ຄັບແຄບບໍ່ສາມາດອຳນວຍຄວາມສະດວກໄດ້ເທົ່າທີ່ຄວນໃນການນຳເຂົ້າ-ສົ່ງອອກສິນຄ້າ; ແຕ່ເຖິງຢ່າງໃດກໍຕາມ, ໂດຍການຊີ້ນຳ-ນຳພາ ຂອງຄະນະພັກ, ຄະນະນໍາກະຊວງການເງິນກໍຄືກັມພາສີ, ພາສີປະຈຳແຂວງຈະເອົາໃຈໃສ່ໃນການຄຸ້ມຄອງ ແລະຈັດເກັບລາຍຮັບເຂົ້າງົບປະມານໃຫ້ໄດ້ຕາມລະດັບຄາດໝາຍເຊິ່ງຜ່ານການຈັດຕັ້ງປະຕິບັດຕົວຈິງການເກັບລາຍຮັບໃນໄລຍະ 04 ເດືອນ ປີ 2023 ຜ່ານມາສາມາດຈັດເກັບລາຍຮັບໄດ້ທັງໝົດ 325 ຕື້ກວ່າກີບ, ທຽບໃສ່ແຜນການປີປະຕິບັດໄດ້ 33,50%, ທຽບໃສ່ 04 ເດືອນ ປີ 2022 ປະຕິບັດໄດ້ພຽງ 139 ຕື້ກວ່າກີບ, ເພີ່ມຂື້ນ 133% ທຽບໃສ່ໄລຍະດຽວກັນ.

ການລົງເຄື່ອນໄຫວເຮັດວຽກຄັ້ງນີ້, ທ່ານ ສັນຕິພາບ ພົມວິຫານ ໄດ້ມີຄຳເຫັນໂອ້ລົມ ແລະໃຫ້ທິດຊີ້ນຳຕໍ່ເຈົ້າໜ້າທີ່ພາສີແຂວງຫຼວງນໍ້າທາ ວ່າ: ຜ່ານການລາຍງານຂອງຫົວໜ້າພາສີປະຈຳແຂວງເຫັນໄດ້ວ່າໃນໄລຍະຜ່ານມາການປະຕິບັດໜ້າທີ່ການເມືອງຂອງເຈົ້າໜ້າທີ່ພາສີໄດ້ເອົາໃຈໃສ່ຕໍ່ວຽກງານວິຊາສະເພາະຂອງຕົນໂດຍສະເພາະແມ່ນການຄຸ້ມຄອງການຈັດເກັບລາຍຮັບເຂົ້າງົບປະມານສາມາດບັນລຸໄດ້ລື່ນແຜນ ໃນ 4 ເດືອນຜ່ານມາສະແດງໃຫ້ເຫັນເຖິງຄວາມຮັບຜິດຊອບ, ຄວາມເອົາໃຈໃສ່ຂອງການນຳທ້ອງຖິ່ນກໍຄືພະແນກການເງິນແຂວງທີ່ໄດ້ບຸກບືນ, ສູ້ຊົນ ສາມາດເກັບລາຍຮັບໄດ້ລື່ນແຜນ. ແຕ່ເຖິງຢ່າງໃດກໍຕາມ, ພາສີປະຈຳແຂວງຕ້ອງໄດ້ເອົາໃຈໃສ່ຕື່ມໃນປັບປຸງກັນໄກການຄຸ້ມຄອງການຈັດເກັບລາຍຮັບຄຽງຄູ່ກັບການນໍາໃຊ້ເຄື່ອງມືທັນສະໄໝຊ່ວຍຈັດເກັບລາຍຮັບ ແລະເປັນການອັດຊ່ອງຫວ່າງກໍຄືການຕ້ານການຮົ່ວໄຫຼຂອງລາຍຮັບ ແລະ ເພື່ອເປັນການອຳນວຍຄວາມສະດວກ ແລະຫຼຸດຜ່ອນຂັ້ນຕອນໃນການແຈ້ງພາສີ.

แชร์