ນາຍົກລັດຖະມົນຕີ ພົບປະກັບຜູ້ນຳປະເທດເພື່ອນມິດໃນໂອກາດເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 42

ຄະນະຜູ້ແທນຂັ້ນສູງຂອງລາວນຳໂດຍ ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ເດີນທາງເຖິງສະຫນາມບິນສາກົນ ເມືອງລາບວນ ບາໂຈ, ສາທາລະນະລັດ ອິນໂດເນເຊຍ ໃນວັນທີ 9 ພຶດສະພາ 2023, ເພື່ອເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 42, ພາຍໃຕ້ຄໍາຂວັນ “ອາຊຽນມີຄວາມສໍາຄັນ: ສູນກາງແຫ່ງການຈະເລີນເຕີບໂຕ”, ທີ່ຈະມີຂຶ້ນໃນວັນທີ 10-11 ພຶດສະພາ 2023, ຕາມຄໍາເຊື້ອເຊີນຂອງ ພະນະທ່ານ ໂຈໂກ ວີໂດໂດ, ປະທານາທິບໍດີ ແຫ່ງ ສາທາລະນະລັດ ອິນໂດເນເຊຍ, ໃນຖານະເປັນປະທານອາຊຽນ ປີ 2023.

ໃນຕອນແລງ, ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະກໍ່ໄດ້ພົບປະສອງຝ່າຍກັບ ພະນະທ່ານ ໂຈໂກ ວີໂດໂດ, ປະທານາທິບໍດີ ແຫ່ ສາທາລະນະລັດ ອິນໂດເນເຊຍ. ໃນການພົບປະ, ພະນະທ່ານ ສອນໄຊ ສີພັນດອນ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ການເຊື້ອເຊີນມາເຂົ້າຮ່ວມກອງປະຊຸມສຸດຍອດຜູ້ນຳອາຊຽນເປັນຄັ້ງທຳອິດພາຍຫຼັງທີ່ທ່ານໄດ້ຮັບການເລືອກຕັ້ງໃຫ້ດຳລົງຕຳແໜ່ງເປັນນາຍົກລັດຖະມົນຕີ ແຫ່ງ ສປປ ລາວ. ພ້ອມນີ້, ກໍ່ສະແດງຄວາມເຊື່ອຫມັ້ນວ່າ ພາຍໃຕ້ການນຳພາອັນປີຊາສາມາດຂອງ ພະນະທ່ານ ໂຈໂກ ວິໂດໂດ ການເປັນປະທານອາຊຽນອາຊຽນຂອງອິນໂດເນເຊຍ ໃນປີ 2023 ນີ້ຈະໄດ້ຮັບຜົນສຳເລັດຢ່າງຈົບງາມ. ພ້ອມນີ້, ສອງຝ່າຍໄດ້ຕີລາຄາສູງຕໍ່ການພົວພັນຮ່ວມມື ລາວ-ອິນໂດເນເຊຍ ທີ່ສືບຕໍ່ຮັກສາໄດ້ການພົວພັນທີ່ດີນຳກັນຕະຫຼອດມາ, ສອງຝ່າຍໄດ້ມີການພົບປະແລກປ່ຽນການຢ້ຽມຢາມເຊິ່ງກັນ ແລະກັນ, ໄດ້ມີການຮ່ວມມື ແລະໃຫ້ການສະໜັບສະໜູນຊ່ວຍເຫຼືອກັນທັງໃນຂອບການຮ່ວມມືສອງຝ່າຍ ແລະ ຫຼາຍຝ່າຍ ໃນໄລຍະຜ່ານມາ. ພ້ອມນີ້, ສອງຝ່າຍ ໄດ້ເຫັນດີເປັນເອກະພາບກັນ ຈະເພີ່ມທະວີຊຸກຍູ້ການພົວພັນຮ່ວມມືກັນໃຫ້ຫຼາຍຂຶ້ນເປັນຕົ້ນການຄ້າ-ການລົງທຶນ, ການສົ່ງເສີມການຮ່ວມມືສອງຝ່າຍພາກເອກະຊົນ ດ້ານພະລັງງານເຊື້ອໄຟ, ການພັດທະນາໂຄງລ່າງການເຊື່ອມໂຍງ-ເຊື່ອມຈອດ, ການທ່ອງທ່ຽວ ແລະ ອື່ນໆ, ຈະສືບຕໍ່ຊຸກຍູ້ພາກສ່ວນກ່ຽວຂ້ອງຂອງສອງຝ່າຍ ປະສານສົມທົບກັນເພື່ອຈັດຕັ້ງປະຕິບັດບັນດາຂໍ້ຕົກລົງຂອງການນຳສອງປະເທດ ໄດ້ເຫັນດີແລ້ວນັ້ນ ໃຫ້ປະກົດຜົນເປັນຈິງ, ມີຫມາກຜົນສູງສຸດ ແລະ ນຳເອົາຜົນປະໂຫຍດມາສູ່ປະຊາຊາດສອງປະເທດ ລາວ-ອິນໂດເນເຊຍ. ສອງຝ່າຍ ເຫັນດີໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະກັນໃນຂອບການຮ່ວມມືອາຊຽນ, ອາເຊັມ, ສປຊ ແລະອື່ນໆ, ໂດຍສະເພາະການສະໜັບສະໜູນ ສປປ ລາວ ໃນການເປັນປະທານອາຊຽນ ໃນປີ 2024 ໃຫ້ປະສົບຜົນສຳເລັດຢ່າງຈົບງາມ.

ໃນວັນດຽວກັນ, ທ່ານ ສອນໄຊ ສີພັນດອນ ພ້ອມດ້ວຍຄະນະຍັງໄດ້ພົບປະສອງຝ່າຍກັບ ພະນະທ່ານ ຕາອຸລ ມາຕັນ ຣວກ,ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ, ເຊິ່ງສອງຝ່າຍເຫັນດີຈະເພີ່ມທະວີການພົວພັນຮ່ວມມື ດ້ານການຄ້າ, ການລົງທຶນ, ການທ່ອງທ່ຽວ ແລະອື່ນໆ ໃຫ້ຫຼາຍຂຶ້ນຕື່ມ. ພ້ອມນີ້ ກໍ່ໄດ້ປຶກສາຫາລືກັນກ່ຽວກັບການຈັດຕັ້ງກົນໄກການຮ່ວມມືສອງຝ່າຍເປັນຕົ້ນແມ່ນການຈັດກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມືສອງຝ່າຍ (JC), ປຶກສາຫາລືກ່ຽວກັບການແລກປ່ຽນທີ່ດິນເພື່ອປຸກສ້າງສະຖານທູດຂອງກັນ ແລະກັນເພື່ອເຮັດຫນ້າທີ່ເປັນຂົວຕໍ່ລະຫວ່າງສອງຝ່າຍ,ໂດຍສະເພາະການຮ່ວມມືລະຫວ່າງສອງກະຊວງການຕ່າງປະເທດລາວ ແລະ ຕີມໍ-ເລສເຕ ໃຫ້ນັບມື້ແຫນ້ນແຟ້ນຍິ່ງຂຶ້ນໃນຕໍ່ຫນ້າ. ສປປ ລາວ ໄດ້ໃຫ້ການສະໜັບສະໜູນ ຕີມໍ ເລສເຕ ໃນການເຂົ້າເປັນສະມາຊິກອາຊຽນ ແລະຍິນດີຈະແລກປ່ຽນບົດຮຽນກ່ຽວກັບການເຂົ້າເປັນສະມາຊິກອາຊຽນໃຫ້ແກ່ຝ່າຍ ຕີມໍ- ເລສເຕ, ເຊິ່ງຈະເປັນປະໂຫຍດໃນການກະກຽມຄວາມພ້ອມດ້ານຕ່າງໆ ກໍ່ຄືການຈັດຕັ້ງປະຕິບັດແຜນດຳເນີນງານເພື່ອກ້າວໄປສູ່ການເປັນສະມາຊິກຂອງຄອບຄົວອາຊຽນຢ່າງສົມບູນ. ໃນຂະນະດຽວກັນ, ພະນະທ່ານ ຕາອຸລ ມາຕັນ ຣວກ ກໍ່ໄດ້ສະແດງຄວາມຂອບໃຈຕໍ່ຝ່າຍລາວທີ່ໄດ້ໃຫ້ການຊ່ວຍເຫຼືອ ແລະສະໜັບສະໜູນ ຕີມໍ-ເລສເຕ ໃນການເຂົ້າເປັນສະມາຊິກຂອງຄອບຄົວອາຊຽນ. ພ້ອມນີ້, ກໍ່ໄດ້ເຫັນດີໃຫ້ມີການພົບປະແລກປ່ຽນການຢ້ຽມຢາມສອງຝ່າຍໃນໂອກາດທີ່ມີຄວາມສະດວກນຳກັນ.

แชร์